Tennısten Qazaqstan áıelder quramasy álem chempıonatyndaǵy alǵashqy matchyn ótkizedi

4821
Adyrna.kz Telegram

8 qarasha kúni Shotlandııanyń Glazgo qalasynda áıelder arasynda tennısten komandalyq álem chempıonaty – Bıllı Djın Kıng kýbogy bastaldy. Atalǵan saıysta el namysyn Iaroslava Shvedova bastaǵan Qazaqstan quramasy qorǵaıdy. 

 Qazaqstandyqtar S tobynda Ulybrıtanııa jáne Ispanııa komandalarymen baq synaıdy. Oıyndar 8 200 kórermen sııatyn Emirates Arena stadıonynyń hard tóseninishindegi kortynda ótedi.

Qazaqstan quramasy sapynda bıylǵy Ýımbldon týrnıriniń jeńimpazy Elena Rybakına, Iýlııa Pýtıneva, Anna Danılına jáne Jibek Qulambaeva bar. 

Match aldynda ótken baspasóz máslıhatynda qurama kapıtany Iaroslava Shvedova qazaqstandyq qyzdardyń mundaı deńgeıdegi jarysqa alǵash ret qatysatynyna qaramastan, olarǵa senetinin málimdedi.

«Bizdiń komanda myqty, tek Zarına Dııas jetispeıdi, degenmen Jibek Qulambaeva qosyldy. Qyzdar bar yqylasymen daıyndalyp jatyr, qarsylasty da zertteýdemiz. Ádettegideı matchqa ázirlenýdemiz. Azııa – Tynyq muhıty aımaǵynda osyndaı turpatta oınaǵandyqtan, bul bizge tańsyq emes. Jeńis úshin bar kúshimizdi salamyz», - dedi Ia.Shvedova.

Qurama kóshbasshysy Elena Rybakına Glazgoǵa álemniń myqty komandalarynyń jınalǵanyn, olardyń árqaısysynyń jeńisten úmitti ekendigin jetkizdi.

«Qazaqstan quramasy úshin bul álem chempıonatynyń alǵashqy fınaly bolmaq. Ár qurama kúshti bolǵandyqtan, báseke ońaıǵa túspeıdi. Jyldyń aıaǵy bolǵanyna qaramastan, qaı-qaısysy da el namysy úshin aıanbaıdy», - dedi 23 jastaǵy sportshy.

Qazaqstannyń ekinshi raketkasy Iýlııa Pýtıneva mundaı dodalarda reıtıngtiń pálendeı ról atqarmaıtynyn aıtty.

«Bıllı Djın Kıng kýbogynda reıtıng eshteńeni sheshpeıdi. Keıde úshinshi nemese tórtinshi júzdikke kiretin oıynshy úzdik 20, 50 nemese 100 tennısshiniń deńgeıinde óner kórsetip, qarsylasyn jeńip ketip jatady. Sondaı-aq keıde reıtıngisi joǵary sportshylar ulttyq qurama úshin básekede joǵary nátıje kórsete almaıdy. Tek munda kortqa shyǵyp, bar sheberligińdi sarp etip, óz komandańa upaı alyp berýdi ǵana oılaý kerek», - dedi Iý.Pýtıneva.

Qazaqstannyń juptyq syndaǵy birinshi raketkasy Anna Danılına AQSh-ta ótken WTA qorytyndy týrnırine qatysqandyqtan, Glazgoǵa keıin ushyp keldi. Ol mundaǵy aýa raıy men kortqa tez beıimdelý qajettigin aıtty.

«Ulttyq quramanyń týrnırdiń fınaldyq kezeńine ótkenine qýanyshtymyn. Men ekinshi ret el namysyn qorǵamaqshymyn. Komandaǵa kómektesemin dep úmittenemin», - dedi quramanyń eń jas oıynshysy Jibek Qulambaeva.

Komandany álem chempıonatynda qoldaý úshin Qazaqstan tennıs federaııasynyń prezıdenti Bolat Ótemuratov arnaıy keldi.

Bıllı Djın Kıng kýbogynyń Glazgodaǵy fınaldyq kezeńi 8-13 qarasha aralyǵynda ótedi. Qazaqstan búgin Ulybrıtanııamen, erteń Ispanııa quramasymen synǵa túsedi.

 

Pikirler