Úskirik aıaz sharpyǵan qystyń kózi qyraýda jylýsyz otyrǵan jupyny úılerge tonnalap tegin kómir túsirip ketetin qaıyrymdy jandardy kezdestirip pe edińiz? Tipti, senbeıtin de shyǵarsyz. Al ılanǵannan kúnniń ózinde mundaı izgilikti adamdarǵa erekshe tańdanyspen alǵys jaýdyryp, aıaǵyna jyǵyla salýyńyz bek múmkin. Nege deısiz ǵoı? Óıtkeni, siz de, biz de myna qoǵamda qaıtarymsyz qaıyrymdylyq jasaıtyn shyn mánindegi jomarttarǵa shólirkep júrmiz. Bizdiń qoǵamnyń mundaı ańsaryn álgi jaqsylyq jasaǵysh jymysqylar jaqsy biledi jáne osy osaldyǵymyzdy utymdy paıdalanady. Olar bir qaraǵanda ǵana osyndaı qaıyrymdy, osyndaı meıirban. Qaı kezde de bular turmysy tómen otbasylarǵa erekshe qamqor, jan-jaqty janashyr kóringisi keledi. Igi isine ıilip, salǵan jerden jat senimniń soıylyn soǵyp shyǵýyńyz op-ońaı mundaıda. Sondyqtan, asyqpańyz, aptyqpańyz, olar – bizdiń júregimizdi materıaldyq muqtajdyqty óteýmen jibitip, izgilikpen izine ertkisi keletin jat aǵym ókilderi. Búginde álem nazary saf dinimizge syzat túsirgen terrorızmdi toqtatýǵa aýyp turǵanda ıek astyndaǵy Iehova kýágerlerinen kóresindi kórmesimizge kim kepil?! Sol sebepti ata dinimizge úsh qaınasa sorpasy qosylmaıtyn qaýipti aǵymnyń aq-qarasyn ajyratyp, jýrnalıstik kózqaraspen zertteý jasaýdy jón sanadyq.
Baıqaısyz ba, qazirgi qoǵam qaýiptiń qaıdan týatynyn tarazylaı almaı qalady keıde. Sebebi, saǵatyna san myńdap quıylatyn aqparattar tasqyny adamdy óresinen jańyldyryp, burys pen durysty baǵamdaýdan ajyratyp barady. Daqpyrttyń ishinen derek izdep, ala-qulanyń arasynan aqıqatty arshý – qıynnyń qıyny. Ǵalamtor betindegi qyzyldy-jasyldy álemnen, jekelegen múdde men jasyryn maqsaty aralasqan aqparattardan, din atyn jamylǵan jymysqy toptardan bizdi tek ishki ulttyq ustyn, eńbekpen jınaǵan shynaıy bilim ǵana qutqarady. Alaıda jetpis jyl boıy saltanat qurǵan qudaısyz qoǵam halyqty ata saltynan ajyratyp jiberdi. Ulttyq tanym taryldy. Tilinen, dininen jerigen materıalıst urpaq qalyptasa bastady.
Egemendik alǵannan keıingi el arasyndaǵy dinı keńistik álsiz, syrtqy aǵymdardyń yqpalyna jyǵyla salatyn solqyldaq edi. Dál osy tusta muhıttyń arǵy betinen «Iehova kýágerleri» degen jańa, jat aǵym júzdegen dinı toptarmen birge Qazaqstanǵa keldi. Ataýy da, kimge kýágerlik etetini de túsiniksiz beımálim senim ıeleri elimizdegi eń kóp turǵyndar shoǵyrlanǵan Almaty qalasynyń mańaıynda mıssııasyn júrgizdi. Bulardyń eń basty artyqshylyǵy – aıyna bir ret túrli tústi ári qymbat qaǵazda «Kúzet munarasy» degen jýrnal shyǵarýy. Mundaı jeke basylymy bar dinı aǵymdar álemde óte sırek. Arysy, jekelegen paraqshalar taratyp, birdi-ekili kitaptar ǵana shyǵarýy múmkin. Al Iehova kýágerlerinde mundaı emes. Bular el arasynda erinbeı úgit aıtýmen qatar, mazmuny jetik, maqsaty aıqyn, sóılemderi aına-qatesiz jazylǵan, kórkem sýretteri óte áserli kitaptar bastyrady.
Jat aǵymnyń maqsaty, mindeti, bir sózben aıtqanda, basty mıssııasy osy basylymdarda baıqalady. Desek te, «Kúzet munarasy» jýrnalynyń mazmunynan túpki maqsatyn ańǵarý óte qıyn. Dinı saýaty joq, ulttyq dińgegi solqyldaq adam úshin túrli tústi jýrnal rýhanı shamshyraq tárizdi kórinedi. Táńirdiń kýágerimiz deıtin atalmysh top ultty bolmysynan aıyryp, óz múddelerine jyǵý úshin neshe túrli ádisti qoldanady. Aldymen, olar ýaǵyzdaryn kóshe-kósheni aralaýmen, qarapaıym adamdardy áńgimege tartyp, qamqorlyq tanytýmen júrgizedi. Jaqsy kıingen, qymbat kóliktegi dáýletti jandarǵa jolaı qoımaıdy. Kerisinshe, jupyny kıimdegi qara jumysshylarmen, materıaldyq kómekke zárý turǵyndarmen tildesedi. Kezdestirgen adamy qarsylyq tanytyp, balaǵattaýǵa deıin barsa da dóreki minez tanytpaı, qarabaıyr sózdersiz, kórkem sóılep, meıirimdi júzben áńgime-dúken qurýǵa tyrysady.
Mundaǵy maqsat – ózderin qudaıdyń sózin sóılep turǵandaı kórkem áser qaldyrý ári sol jumsaq minezi arqyly adamnyń sanasyn baýrap alý. Atap óteıik, Iehova kýágerlerinde materıaldyq másele kóterilgen emes. Úgit júrgizý úshin olar qarjy aıamaıdy. Mynadaı álemdik daǵdarys qyspaqqa alyp turǵan zamanda jýrnaldary da sapaly, kitaptary da kórkem. Sapasy da óte qymbat qaǵazdar. Iehova kýágerleriniń negizgi ereksheligi, tildesetin adamyn rıtorıkalyq suraqtar arqyly baýraıdy. Iaǵnı, jaýaby da, suraǵy da úgitke toly sóılemder qoldanady. Máselen, olar kóshede kezikken kez kelgen janǵa: «Myna ómirdiń máni nede ekenin bilesiz be? Qudaıǵa senesiz be? Qaıyrymdy ister jasaısyz ba? Qudaıdan qorqasyz ba? Aqyret kúnine daıynsyz ba?» – degen syńaıda birneshe suraq qoıý arqyly tosynnan oı salyp kóredi.
Qarasańyz, bul suraqtar ata dinimizde de mańyzdy. Iehovalyqtar qarapaıym adamnyń kóńilin osyndaı jalpylama suraqtarmen ózine qaratady. Olar jergilikti qazaqtardyń tanymyn, túsinigin, kózqarasyn, ulttyq salt-dástúrin, tutas mádenıetin tereń zerttegen. Sol sebepti de eń birinshi júrekti qozǵaıtyn saýaldar qoıyp, qoıan-qoltyq aralasýǵa, emen-jarqyn syrlasýǵa sańylaý izdeıdi. Ekinshi jáne úshinshi kezekte ǵana Isa paıǵambardyń (s.ǵ.s) ómirinen mysaldar keltirip, izgilikti istermen adamnyń kóńilin bosatýǵa kúsh salady. Bul aralyqta adam ıslamdaǵy dúnıetanymynan ajyrap, Quran aıattaryndaǵy adamgershilik qaǵıdattaryn, sońǵy paıǵambarymyz Muhammedtiń (s.ǵ.s) jaqsylyq jasaý jolyndaǵy hadısterin jat aǵymnyń jón-joralǵylarymen aýystyra bastaıdy.
Osylaısha Islam men Iehova kýágerleriniń arajigin ajyrata almaı qalǵan delquly birtindep atadan qalǵan rýhanı dińgeginen qol úzedi. Bizdiń zertteýimizshe, jat aǵymnyń jolyna op-ońaı túsip ketýdiń saldary dinı uqsastyqta jatyr. Jymysqy toptyń ókilderi «Kıeli kitap hıkaıalary», «Izgilik habary» syndy kitaptardy úzdiksiz bastyrady. Munda kádimgi Quran Kárimdegi paıǵambarlar qıssasy túgeldeı derlik baıandalǵan. Alaıda olar kitapta Muhammedke (s.ǵ.s) múlde jýymaıdy jáne moıyndamaıdy. Álgi kitaptardy oqyǵan adam sońǵy paıǵambarymyzdyń esimin umytyp, qaıyrymdylyq is, meıirbandylyq, izgilik, keshirim, jylaǵandy jubatý, súringendi súıeý sekildi Isanyń (s.ǵ.s) ıgi amaldaryna bas ıip ketýi yqtımal. Rasynda da, Iehova kýágerleriniń kitaptary men jýrnaldary bir qaraǵanda túgel izgi amaldarǵa toly. Olar ár sózin meılinshe qazaqtyń saltyna, dástúrine, mádenıetine jaqyndastyryp, uqsastyryp aıtady.
Qudaıdyń aspan men jerdi alty kúnde jaratqany, Adam ata (s.ǵ.s) men Haýa ananyń alma jegen oqıǵasy, Nuh paıǵambardyń (s.ǵ.s) kemesi, jaıyn jutqan Júnistiń (s.ǵ.s) ómiri, Musa (s.ǵ.s) men Perǵaýyn zamany Iehova kýágerleri bastyrǵan kitaptarda jan-jaqty baıandalady. Olar muny joqqa shyǵarmaıdy jáne bulardy dáripteıdi. Alǵash ıehovalyqtarmen tanysqan adam osy uqsastyqty janyna jaqyn qabyldap, qaýipti aǵymnyń ıleýine tez arada ketip qalýy kádik. Barshamyzǵa málim, ata dinimizde de dál osy oqıǵalar aıtylady jáne moıyndalady. Arbalǵan adam osy uqsastyqtardy tarazylaımyn dep shyrmaýǵa túsedi. Sonymen birge, bular qaıǵyrǵannyń kóńilin aýlaý, qınalǵannyń janynan tabylý, rýhanı jáne materıaldyq kómek kórsetý belgilerine basymdyq berý arqyly musylmanshylyqty ustanǵan halyqqa jaqyndaýǵa talpynady.
Sonymen, áńgimege tartyp, múddesine jyǵýdyń ekinshi joly – basylym. Bul týraly áńgime bólek. Óıtkeni, halyq arasynda eń kóp zardap shegetinder «Kúzet munarasy» jýrnalynyń yqpalymen júzege asqan. Úgit taratýshylardyń qoldarynda mindetti túrde kitap toly qorjyn bolady. Eger siz olarmen qaı tilde sóılesseńiz de qıyndyq týdyrmaıdy. Olar qazaq jáne orys tiline jetik. Kitaptary da eki tilde basylǵan. Eń qaýiptisi, basylymdardaǵy kóz toıdyratyn ádemi dızaın, ne emle, ne stılıstıkalyq qatesi joq qazaq tilindegi tartymdy taqyryptar birden baýraıdy. Ásirese, basylymdary meılinshe balalardyń tiline beıimdelip jazylǵan. Al sýretteri ertegi áleminen syr shertip turǵandaı áser qaldyrady. Baspalarynda arnaıy sýretshileri de bar sekildi. Kórdińiz be, jat aǵym babalar amanatyn arqalaǵan balalardy qyzyqtyrýǵa kóshken.
Iehovalyqtardyń ýaǵyzyn júrgizetin «Kúzet munarasy» jýrnaly aıyna bir ret basylady. Bas taqyryptyń astynda: «Iehova qudaıdyń patshalyǵyn jarııalaıdy», – degen uran sóz jazylǵan. Qazaqstandaǵy ult mádenıetine ashyqtan-ashyq soqqy jasap, osylaı túsiniksiz uran sóz jazyp qoıǵan jýrnaldyń ishki mazmuny da túgel teris pıǵyldy tý etedi. Olar halyqtyń arasynan týyndaıtyn kókeıkesti saýaldardy áý bastan biledi. Sondyqtan da, jýrnaldyń ár betinde eń mańyzdy saýaldarǵa jaýap izdeıdi. Jaýap pen suraqty jaı sóılemdermen quraı salmaı, túrli mazmunda qupııalap, eliktire túsedi.
Árıne, álemniń barlyq memleketinde bólimshesi bar dinı uıymǵa qaı-qaısymyz da: «Sizderdi kim qarjylandyrady?» – degen suraq qoıatynymyz anyq. Rýhanı ortalyqtarynda jaýapty qyzmet atqaratyn ókilderi bul saýaldyń týyndaıtynyn baıaǵydan biledi. Bárine jaýaptary daıyn. Qudaı jolyndaǵy sadaqamen jınalǵan qarajat ekenin aıtyp, tanbaı turyp alady. Islamda da sadaqanyń orny erekshe ári Alla razylyǵyna bólenýdiń bir joly osy. Iehovalyqtar da sadaqa berý máselesin múmkindiginshe musylmanshylyqqa jaqyndatyp kórsetkisi keledi. Nátıjesinde, halyqty uqsastyq arqyly orǵa jyǵýdy kózdeıdi.
Jat aǵym basshylyqqa Kıeli kitap jazbalaryn alady. Ókinishtisi, bular dúnıejúzindegi eki mıllıard musylmannyń qasıetti Quran Kárim kitabyna kóz jumyp qaraıdy. Munyń sebebin ózderi de túsindirýden qashqaqtaıdy. Biraq halyqtyń nazaryn ózderine aýdarý úshin bizdiń saltymyzdy, tilimizdi, mádenıetimizdi, senimimizdi jan-jaqty qoldanady. Máselenkı, «Kúzet munarasy» jýrnalyndaǵy keıbir maqalalarǵa kóńil bólseńiz, oıdan quralǵan oqıǵalardy jıi kezdestiresiz. Áńgimelerindegi keıipkerlerdiń esimin qazaqsha tańdap alyp, múmkindiginshe ulttyq tanym-túsinigimizge saı etýge tyrysady. Atalǵan jýrnaldyń kezekti bir sanynda «Júrekti syzdatqan qaıǵy-muń» degen áńgime basylǵan. Qaıǵynyń qara kórpesin jamylǵan Naǵıma esimdi qazaq qyzdyń shynymen de taǵdyry aýyr. Ata-anasy jol apatynan ajal qushyp, sońynan qyzy qaıǵyǵa batady.
«Durysyn Qudaı biledi ǵoı, qalqam. Jylamashy». Bul – asqar taýdaı ákesiniń kózin kórgen dosynyń jubatý sózi. Oqıǵadan adamdardyń máńgi ómir súrmeıtinin, ólimniń bar ekenin bilemiz. Qarapaıym uǵym bolǵanmen, osy áńgimeniń ózegine de ıehovalyqtar óz qudaıyn qosyp qoıady. Maqalanyń máninen uqqqanymyz – qaıǵyny basý úshin tek Iehova qudaıy ǵana qol ushyn sozady-mys. Jat aǵym ókilderi ne sebepti jýrnaldaǵy keıipkerlerdiń esimin qazaqshalady? Maqsaty túsinikti. Tól mádenıetimizdi myqtap meńgergen olar ana tilimiz arqyly ishten iritpekshi. Jýrnaldyń «Isterińdi kim qarjylandyrady?» degen bóliginde: «Uıymnyń qarajaty durys qoldanylady. Bizde qyzmetine aqy alatyn dinbasylar joq. Kýágerler úıme-úı ýaǵyzdaǵandary úshin aqy almaıdy jáne kezdesý ótkizetin jaılarymyz óte qarapaıym», – dep jazylǵan.
Ne uqtyńyz? Olar salǵan jerden óte qarapaıym kóringisi keledi. Bul – bir. Ekinshi, minezin múmkindiginshe kórkem ustaıdy. Túptiń-túbinde maqtamen baýyzdap túsiredi. Úshinshi, qoǵamda jupyny otbasylarǵa qol ushyn sozý arqyly halyqtyń júregin jibitýdi kózdeıdi. Mıllıondaǵan dana túrli tústi kitap, jýrnal basyp shyǵaryp, júzdegen memleketterde ǵıbadathana salý, tabıǵı apat alǵan úılerge qol ushyn sozý bir ǵana sadaqadan jınalǵan qarajat emes. Bul – tórt. Esińizde bolsyn, olar bárin izgilikpen sheshemiz dep shimirikpeı aıtady. Qazaqshaǵa óte sýdaı jáne basylymdary da memlekettik tilde aına-qatesiz basylady. Bul – bes.
«Sender amerıkandyq sektasyńdar ma?» Jýrnaldyń kózge birden túsetin alǵashqy betinde, sonymen birge, ǵalamtordaǵy saıttarynda osyndaı saýaldy úlken qariptermen berip qoıǵan. Bul – halyqtyń kókeıindegi eń negizgi saýal. Olar bul máseleni aldyn ala eskerip, ádeıilep ózderine engizip qoıǵan sııaqty. Al endi jaýabyna úńilip kóreıik: «Iehova kýágerleri óz is-sharalaryn 230-dan asa el men aýmaqta atqarady. Qaı elde turyp jatqanymyzǵa qaramaı, AQSh ne adamı basqa ókimetke emes, Iehova qudaıy men Isa Másihke shyn berilgenbiz», – dep ózderiniń mıssııasyn taıǵa tańba basqandaı aıqyn kórsetedi.
Iehovalyqtardyń bas basqarmasy Nıý-Iork qalasynda ornalasqan. Alaıda olar ýaǵyzdarynda ózge eshbir dindi eskermeı, Isa paıǵambardyń izbasary retinde úgit júrgizedi. Oǵan dálel jylda Isany (s.ǵ.s) eske alý keshi. Dálirek aıtsaq, ólgen kúnin atap ótedi. Jalpy, aptasyna eki ret kezdesý uıymdastyrady. Olar ortada sheńber quryp tura qalady da, mýzykalyq aspaptardy qoldaný arqyly án salady. Ánniń mátini Iehova qudaıyn madaqtaýǵa arnalǵan. Kezdesýge kirýge eshkimge tyıym salynbaǵan. Tipti, bul dindi ustanbasańyz da emin-erkin enip, jón-joralǵylaryna qatysa berýińizge bolady. Bul arqyly olar ashyqtyqty qamtamasyz etip, aqıqatty súıgen syńaı tanytady. Shyn máninde olaı emes.
Búginde Iehova kýágerleri álemniń 240 elinde bar. Kúnnen-kúnge bulardyń qatary tolyǵyp barady. Tipti, jýrnaldary men onlaın betterinde osy dinı aǵymǵa kirgenderdiń sany da anyq jazylypty. Izgilikpen izine ertetinder 8 mıllıon 220 myń 105 adamdy quraıdy. Jyl saıyn Isa Másihti eske alý keshine 20 mıllıonǵa jýyq adam qatysady. On eki aıda 10 mıllıon shamasynda tegin kitaptar taratylyp, úgit-nasıhat jumystary júrgiziledi.
Eń ókinishtisi, «Kúzet munarasy» jýrnalynyń tup-tunyq qazaq tilinde basylýy. Bizdiń tildik turǵyda júrgizgen zertteýimiz nátıje bermedi. Bir bilerimiz, Iehova kýágerleri – qazaqshaǵa sýdaı, óte saýatty jazylǵan jýrnaly bar jalǵyz jat dinı aǵym. Qazaqstandaǵy ózge qaı dinı uıymdardy alyp qarasaq ta, ne qazaqshaǵa, ne orysshaǵa shorqaqtyq tanytyp, til, sóıleý turǵysynan aqsap jatady. Al mynalarda mundaı kemshilik atymen joq. Sonda ıehovalyqtar qazaq tilin qaıdan, qalaı, qashan úırengen? Olardyń bizdiń elge kelgenine 20 shaqty jyl ótti. Az ýaqytta til meńgerýi múmkin emes. Aýyzeki úırense de, jýrnaldaǵydaı jatyq jazatyn deńgeı jat aǵym ókilderinde qalyptasa qoıǵan joq. Demek, bular bizdiń otandyq tilshilerdi tartqan sekildi. Árıne, bul taqyryp qozǵalyp kórmegen jáne «Kúzet munarasy» jýrnalynyń qazaqshasyn kimder jazatyny eshkimdi qyzyqtyrmaıdy da. Kóbine, Iehova kýágerleriniń tili emes, taratatyn zııandy aǵymy týraly jan-jaqty aıtylyp keldi.
Jýrnalda: «Iehova kýágerleri týraly siz ne bilesiz?» – dep saýal tastaıdy. El arasynda aıtylatyn ózderine qatysty teris aqparattarǵa senbeýge shaqyrady. Olardyń aıtýynsha, Iehova – qudaıdyń ózine bergen esimi. Soraqysy – jat aǵym ózderiniń qataryna sonaý Nuhtan bastap Ybyraıym, Ysqaq, Jaqyp, Júsip, Musa jáne Dáýit paıǵambarlardy qosyp alǵandyǵy. Iehovalyqtar Adam ata men Haýa anany túp atamyz ben túp anamyz dep aıtady. Álbette, bul durys. Sonymen birge, eldi adastyrý úshin aqshaǵa ermeıtindikterin, qarapaıym ǵana qudaıdyń quldary ekendikterin sózben ǵana emes, ispen dáleldep baǵady. Eń qyzyǵy, bular hrıstıandyq baǵytqa da moıynsunbaıdy. Hrıstıandardaǵy úshtik týraly ilimge úzildi-kesildi qarsy. Jaratqan ıemiz – jalǵyz Qudaı dep jar salady. Allanyń esimin Iehova dep shatqan qaýipti aǵym ókilderi Qazaqstanda da qyzmetin jalǵastyryp jatyr.
Alǵashqy on jylda bular ózimizdiń Almaty oblysyna qarasty Eńbekshiqazaq aýdanynda dinı úgit júrgizdi. Esik qalasynda Qazaqstan boıynsha bas ǵımaraty ornalasty. Nıý-Iorkte basylǵan taza qazaq tilindegi gazet-jýrnaldary men kitaptary osy Esik qalasynan taratylatyn. Keıinnen Almaty qalasyna kóshirildi. Búginde birneshe oblys ortalyqtarynda Iehova kýágerleriniń ǵıbadathanalary bar.
Olar da bir Qudaıǵa syıynýdy nasıhattaıdy. Olar da ólimnen keıin ómirdiń baryn aıtady. Alaıda Allanyń ámirinen alys, ıslamǵa uqsastyq izdeýdi kezekti bir ádis retinde túsinedi. Olar da sadaqa berýdi súıedi. Muqtaj jandarǵa qol ushyn sozady. Dálel retinde keltirsek, sońǵy on shaqty jyl boıy olar Almaty qalasynda jáne onymen shektesetin kórshiles aýdandarda kóshe-kóshelerdi aralap, tegin kitaptar taratty. Turmysy tómen otbasylarynyń balalaryn kıindirip, qystyq kómir-sýyn túsirip berip júrdi. Áıtpese, ıehovalyqtar Qurandy da, sońǵy paıǵambarymyz Muhammedti de múlde moıyndamaıdy. Halyq kóbine osy uqsastyqtar arqyly arandap qalýy ábden múmkin.
Olardyń dindegi eń óreskel qatelikteri – tozaqty joqqa shyǵarýy. Oǵan dálel retinde ózderiniń Kıeli kitabyndaǵy «Eremııa» degen taraýshany keltiredi. Onyń 7:31 degen aıatynda: «Qudaıdyń ózi adamdardy otqa órteý men azaptaýdy ámir etpegen, júregine túıip, oıyna da almaǵan», – dep jazylypty-mys. Iehovalyqtar osy bir sóılem arqyly manadan beri madaqtaǵan jalǵyz Qudaıyn júregi bar jannyń qataryna qosyp qoıady. Sonymen birge, sonsha súıispenshilik pen meıirimge toly Qudaıdyń tozaqty jaratyp, adamdardy azaptaýy múmkin emes dep sendiredi. Alaıda bular qaıta tirilýdi, aqyret kúnin moıyndaıdy jáne ol sátte Qudaı laıyqty dep tapqandaryna ǵana sońyra jan bitiredi-mis.
Iehovalyqtar taǵdyrdy túgel joqqa shyǵarady. Adam óz taǵdyryna ózi qojalyq etetinin olar «Kúzet munarasy» jýrnalynda ashyq jazady. Qazaqtyń jazmyshyn, peshenesin, mańdaıǵa jazylǵanyn moıyndaýdan kórkem túrde bas tartady. Kórdińiz be, olar qarsylyqtaryn eshýaqytta dóreki túrde ashyqtan-ashyq bildirgen emes. Tek túıinderdi kórkem jolmen sheshýge umtylady. Ata dinimizben taǵy bir uqsastyǵy – músinge tabynýdy joqqa shyǵarý ári Qudaıdyń aldynda báriniń teńdigi. Sondaı-aq, bular saıasatta beıtaraptyq tanytyp, betegeden bıik, jýsannan alasa bolyp kórinip baǵady. Bir qaraǵanda, ózderin jergilikti zańǵa baǵynǵysh, qulaqkesti Qudaıdyń qulyndaı kórsetedi. «Qudaı jalǵyz, sondyqtan shynaıy din de jalǵyz bolý kerek. Ol ilim Taýrat, Zabýr jáne Injilmen sáıkes kelse ǵana shynaıy din bola alady», – deıdi ıehovalyqtar. Munyń alǵashqy sóılemi Islamǵa jat emes, alaıda ekinshi sózinde oqyrmanyn adastyryp áketedi. Iaǵnı, Alladan túsken tórt kitaptyń tóresin, tolyqtyrylǵan jáne ózgertilmeıtin, ár árpin perishte kúzetetin Qurandy óz qatarlaryna qospaıdy.
Dinı saýaty joq adamǵa ózderin: «Musylmanbyz», – dep tanystyratyn qaýipti aǵymnyń adamy Quran týraly da habardar. Dese de, Qurannyń Taýrat, Injil, Zabýrdy joqqa shyǵarmaıtyn aıattaryn alady da, Isanyń Injiline buryp áketedi. Eń jaman jeri, bular Islam dinine Qurannan buryn túsirilgen úsh kitaptyń ózgertilgenin áshkerelegeni úshin aıyp taǵady. Iehova kýágerleri qan berýge, qan alýǵa qarsy. Saıası naýqan kezinde saılaýǵa qatysýǵa jol bermeýge tyrysady. Áskerı qyzmetti, Otan aldyndaǵy mindetti unatpaıdy. Memlekettik meıramdardy toılaýdy kúná dep biledi. Ár ýaǵyzynda qarý ustaýǵa qarsy úgit júrgizedi. Ata Zańǵa, Eltańbaǵa, Ánuranǵa bas ımeıdi. Bir sózben aıtqanda, bular qazaqtyń saltyna syzat túsirip, ǵasyrlar boıǵy asyl senimin aıaqasty etýdi qolǵa alǵan. Osy jolda jat aǵym ókilderi izgilikti, qarapaıymdylyqty, qaıyrymdylyqty qoldanady.
Iehova kýágerleriniń tarıhyna júginsek, 1870 jyly Nıý-Iork qalasynda qurylǵan. Rassel esimdi azamat dinniń negizin qalapty. Alaıda rýhanı jetekshisiniń sózi men isi basqa, azǵyndyqqa ergen adam eken. Keıinnen aǵymdy Rýtterfold degen shyraqshy basqarady. Áý bastan túsiniksiz baǵytta qurylǵan teris aǵymda rasynda da shynaıy senim joq. Ne hrıstıandyqqa, ne musylmanshylyqqa, ne býddızmge bas ımeıtin ıehovalyqtar qandaı maqsatty kózdep júrgenin ózderi de bilmeı qalady. Olar birde Qudaıdyń qyzmetshisimiz dese, birde saıası sebepterin de jasyrmaı is-áreket arqyly kórsetip qoıady. Dúnıejúzilik eki soǵystyń sebepterin, saıası partııalardyń teke-tiresin Isa paıǵambardyń jiberip otyrǵan jazasymen baılanystyrady.
Iehovalyqtar qazirgi tańda qanatyn keńge jaıǵan. Qaýip sol. Ásirese, «Kúzet munarasy» jýrnaly arqyly myńdaǵan qazaqtyń sanasyna teris ıdeıa quıyp jatyr. Negizinen, mundaıda jas balalar zardap shegedi. Shyny kerek, bizdiń ıslamda kórneki quraldar, ata dinimizdi ardaqtaıtyn oqý quraldary azdyq etip tur. Onyń ishinde balalardyń tiline laıyqtalǵan, jeńil mazmundaǵy, túsinýge qolaıly kórkem sýretti ıslam ádebıeti jetkiliksiz. Olar da osy osaldyqty óz maqsattaryna paıdalanyp, ústi-ústine sapaly qaǵazben kórneki kitaptar bastyrýda. Iehova qudaıyn nasıhattaǵan ár mátinniń sońynda olar balalarǵa arnap, taza qazaq tilinde tapsyrmalar usynady. Suraqtar qoıady. Sóıtip, áńgimelerden alǵan áserdi neshe túrli saýaldarmen pysyqtaıdy. Jýrnaldyń «Talqylaýǵa arnalǵan suraqtar» degen taraýynda: «Isanyń týǵan kúni ne sebepti 25 jeltoqsanda toılanady?», «Jalǵan dinnen shyqqan soń ózińe ne dep saýal qoıasyń?» – degen qıturqy saýaldar jetkilikti. Baıqadyńyz ba, suraqtarynyń astarynda da Iehovadan ózgeniń bárin jalǵan dinniń sanatyna jatqyzyp tur.
2011 jyly bekitilgen QR Dinı qyzmet jáne dinı birlestikter týraly Zańynda mıssıonerlik baǵyttaǵy toptarǵa jyl saıyn tirkeýden ótý mindetteldi. Atalǵan zańnyń 9-babynda: «Dinı ádebıetti, dinı mazmundaǵy ózge de aqparattyq materıaldardy, dinı maqsatty zattardy tek qana ǵıbadat úılerinde dinı bilim berý uıymdarynda, turaqty úı-jaılarda taratýǵa jol beriledi», – dep kórsetilgen. Alaıda ıehovalyqtardyń kóshe-kósheni aralap, kórnekilikke toly dinı jýrnaldaryn taratyp júrgenin jıi baıqaımyz. Sonymen birge, osy zańda: «Qaıyrymdylyqty júzege asyrý kezinde dinı qyzmetke tartý maqsatynda Qazaqstan Respýblıkasy azamattyrynyń, sheteldikter men azamattyǵy joq adamdardyń materıaldyq táýeldiligin paıdalanýǵa jol berilmeıdi», – delingen. Bul – 10-baptyń ekinshi tarmaǵy. Iehova kýágerleri bul bapty da belden basyp otyrǵan syńaıly. Turmysy tómen úılerdi ádeıi izdep, materıaldyq kómekke tartý arqyly úgit júrgizýin qoıar emes.
TÚIIN:
Biz zertteý maqalamyzda ıehovalyqtardyń tarıhyna toqtalǵan joqpyz. Oqyrmanǵa ol onsyz da tanys. Biz Islam men Iehovany múmkindiginshe qatar qoıyp, jat aǵymnyń jarǵa jyǵatyn qaýipti is-áreketterin tizbeleýge tyrystyq. Taldaýǵa, aq-qarasyn ajyratýǵa kúsh saldyq. Búginde halyq izgilikpen izine ertetin aǵymnyń teris ýaǵyzyn ata dinimizge uqsastyryp aıtýynan kóp zardap shegedi. Sondyqtan, biz de múmkindiginshe sol uqsastyq faktorlaryn maqalamyzǵa ózek etip alyp, halyqty bóten dinniń kórkem de kórneki qazaq tilinde shyǵatyn basylymdaryna eltip qalmaýǵa shaqyrdyq. Ókinishtisi sol, ıek astyndaǵy Iehovany qazaq tilinde nasıhattap otyrǵan ózimizdiń qandastarymyz ekendigi. Óıtkeni, jat aǵymnyń jýrnalyndaǵy jatyq ta kórkem tildi qaýipti nasıhattardy arnaıy mamandar, qalamy ushqyr jýrnalıst ıakı bilikti, sóılem quraýǵa júırik fılologtyń jazǵany ap-aıqyn ańǵarylady. Abaılańyz, tozaqty joqqa shyǵaryp, Alla sózin aıaqqa taptaǵan teris aǵymnyń tyrnaǵyna iligip ketpeńiz.
Qýanysh TUNǴATAR
