QR Ǵylym jáne joǵary bilim mınıstri Saıasat Nurbek Almatydaǵy ǵylymı-zertteý ınstıtýttaryna bardy. Ol kezdesý barysynda qyzmetkerlermen tildesip, ótinishterin tyńdady, dep habarlaıdy «Adyrna» tilshisi.
«Memleket basshysy Qasym-Jomart Toqaev elimizdiń ǵylymı áleýetin damytýǵa úlken mán berip otyrǵanyn kópshilik biledi. Óıtkeni, ǵylymı progress otandyq ekonomıkany odan ári damytýdyń negizgi aspektileriniń biri bolyp esepteledi.
Almatyǵa jumys sapary barysynda eki ǵylymı-zertteý ınstıtýtynda boldym: zoologııa, genetıka jáne fızıologııa.
Instıtýt qyzmetkerlerimen kezdesýler ótkizip, Qazaqstan ǵylymyn damytýdyń ózekti máseleleri jóninde pikir almastyq, salanyń máselelerin talqyladyq. Genetıka jáne fızıologııa ınstıtýty qyzmetkerleriniń mal sharýashylyǵyndaǵy praktıkalyq genetıkalyq zertteýlerge arnalǵan eńbekteri bedeldi Plants jýrnalynda jarııalandy. Osy ýaqytqa deıin birde-bir qazaqstandyq genetıktiń zertteýi mundaı bedeldi basylymǵa shyqpady.
«Zoologııa ınstıtýty» ǵylymı-zertteý ınstıtýtynyń ǵalymdary 800-den astam janýardy sıpattap, Qazaqstannyń joıylyp bara jatqan janýarlarynyń Qyzyl kitabyn basyp shyǵardy. Sonymen qatar, ǵylymı-zertteý ınstıtýtynyń qyzmetkerleri Qazaqstandaǵy qustardyń kóshi-qony jáne olardyń vırýstyq ınfekııalardyń (sonyń ishinde koronavırýs) taralýyndaǵy róli salasynda zertteýler júrgizedi. Aıtpaqshy, Zoologııa ınstıtýty bıyl 90 jyldyq mereıtoıyn atap ótýde.
Kezdesý barysynda ǵylymı-zertteý ınstıtýttarynyń qyzmetkerleri ınstıtýttardy materıaldyq-tehnıkalyq jaraqtandyrý, kadrlardy daıarlaý jáne jas ǵalymdardyń eńbek jaǵdaıyn jaqsartýǵa baılanysty máselelerdi ashyq aıtty. Kóterilgen dúnıeler mınıstrliktiń baqylaýyna alyndy, birde-bir másele nazardan tys qalmaıdy»,—dedi vedomstvo basshysy.
Mınıstrdiń Almatydaǵy sapary týraly belgili jýrnalıst Serik Abbas-Shah ta jazdy.
(Fotolar Saıasat Nurbektiń jáne Serik Abbas-Shahtyń Feısbýktaǵy paraqshalarynan)
