مينيستر عىلىمي ينستيتۋتتىڭ مۇشكىل جاعدايىمەن تانىستى

7056
Adyrna.kz Telegram

قر عىلىم جانە جوعارى ءبىلىم ءمينيسترى ساياسات نۇربەك الماتىداعى عىلىمي-زەرتتەۋ ينستيتۋتتارىنا باردى. ول كەزدەسۋ بارىسىندا قىزمەتكەرلەرمەن تىلدەسىپ، وتىنىشتەرىن تىڭدادى، دەپ حابارلايدى «ادىرنا» ءتىلشىسى.

«مەملەكەت باسشىسى قاسىم-جومارت توقاەۆ ەلىمىزدىڭ عىلىمي الەۋەتىن دامىتۋعا ۇلكەن ءمان بەرىپ وتىرعانىن كوپشىلىك بىلەدى. ويتكەنى، عىلىمي پروگرەسس وتاندىق ەكونوميكانى ودان ءارى دامىتۋدىڭ نەگىزگى اسپەكتىلەرىنىڭ ءبىرى بولىپ ەسەپتەلەدى.

الماتىعا جۇمىس ساپارى بارىسىندا ەكى عىلىمي-زەرتتەۋ ينستيتۋتىندا بولدىم: زوولوگيا، گەنەتيكا جانە فيزيولوگيا.

ينستيتۋت قىزمەتكەرلەرىمەن كەزدەسۋلەر وتكىزىپ، قازاقستان عىلىمىن دامىتۋدىڭ وزەكتى ماسەلەلەرى جونىندە پىكىر الماستىق، سالانىڭ ماسەلەلەرىن تالقىلادىق. گەنەتيكا جانە فيزيولوگيا ينستيتۋتى قىزمەتكەرلەرىنىڭ مال شارۋاشىلىعىنداعى پراكتيكالىق گەنەتيكالىق زەرتتەۋلەرگە ارنالعان ەڭبەكتەرى بەدەلدى Plants جۋرنالىندا جاريالاندى. وسى ۋاقىتقا دەيىن بىردە-ءبىر قازاقستاندىق گەنەتيكتىڭ زەرتتەۋى مۇنداي بەدەلدى باسىلىمعا شىقپادى.

«زوولوگيا ينستيتۋتى» عىلىمي-زەرتتەۋ ينستيتۋتىنىڭ عالىمدارى 800-دەن استام جانۋاردى سيپاتتاپ، قازاقستاننىڭ جويىلىپ بارا جاتقان جانۋارلارىنىڭ قىزىل كىتابىن باسىپ شىعاردى. سونىمەن قاتار، عىلىمي-زەرتتەۋ ينستيتۋتىنىڭ قىزمەتكەرلەرى قازاقستانداعى قۇستاردىڭ كوشى-قونى جانە ولاردىڭ ۆيرۋستىق ينفەكتسيالاردىڭ (سونىڭ ىشىندە كوروناۆيرۋس) تارالۋىنداعى ءرولى سالاسىندا زەرتتەۋلەر جۇرگىزەدى. ايتپاقشى، زوولوگيا ينستيتۋتى بيىل 90 جىلدىق مەرەيتويىن اتاپ وتۋدە.

كەزدەسۋ بارىسىندا عىلىمي-زەرتتەۋ ينستيتۋتتارىنىڭ قىزمەتكەرلەرى ينستيتۋتتاردى ماتەريالدىق-تەحنيكالىق جاراقتاندىرۋ، كادرلاردى دايارلاۋ جانە جاس عالىمداردىڭ ەڭبەك جاعدايىن جاقسارتۋعا بايلانىستى ماسەلەلەردى اشىق ايتتى. كوتەرىلگەن دۇنيەلەر مينيسترلىكتىڭ باقىلاۋىنا الىندى، بىردە-ءبىر ماسەلە نازاردان تىس قالمايدى»،—دەدى ۆەدومستۆو باسشىسى.

ءمينيستردىڭ الماتىداعى ساپارى تۋرالى بەلگىلى جۋرناليست سەرىك ابباس-شاح تا جازدى.

"مىنا فوتولار ءال فارابي 93-تە ورنالاسقان "گەنەتيكا جانە فيزيولوگيا" عىلىمي ينستيتۋتىندا تۇسىرىلگەن (دەسەدى).
تۇسىرىلگەن ۋاقىتى - 1993 جىل ەمەس، 2022 جىل ء(ححى عاسىر، بۇگىنگى كۇن)
عيمارات اپاتتىق جاعدايدا تۇرعانىن سۋرەتتەن كورۋگە بولادى.
بۇگىن بۇل عيماراتقا جاڭا مينيستر كەلىپ، ءبارىن ءوز كوزىمەن كورىپتى (دەپ جاتىر).
عىلىم دا، عيمارات تا رەانيماتسيادا سياقتى.
بۇرىن "اكەسى ولسە دە ەستىرتەدى" دەيتىن پرينتسيپپەن نەگە وسىلاي اشىق ايتىلماعان؟
بۇل سالانى تىرىلتۋگە مىقتى جۇيكە كەرەك، ساياسات مىرزا.
ۋينستون چەرچيلدىڭ "ول رەسەيدi سوقامەن قابىلداپ، سوڭىنا اتوم بومباسىمەن قالدىردى” دەگەنىندەي پرەزيدەنتكە دە سىن.
عىلىم وڭالماي، باسقا سالا وڭالمايدى. ەەە دە…" دەپ جازدى ول ءوزىنىڭ فەيسبۋكتەگى پاراقشاسىندا.


(فوتولار ساياسات نۇربەكتىڭ جانە سەرىك ابباس-شاحتىڭ فەيسبۋكتاعى پاراقشالارىنان)

پىكىرلەر