Mäjılıs deputaty Berık Düisenbinov Qazaqstanǧa kelgen reseilıkterdı beiımdeu ortalyǧyn aşyp, qazaq tılı men tarihyn oqytudy ūsyndy. Ol deputattyq saualyn premer-ministr Älihan Smaiylovqa joldady, dep habarlaidy “Adyrna” ūlttyq portaly.
“Qazaqstan qai zamanda da qysym körıp, öz elınen qaşyp, bosqyn boluǧa mäjbür bolǧan talai halyqty öz basyndaǧy qiynşylyqqa qaramastan qūşaq jaia qarsy alyp, aman alyp qalǧanyna kuä. Qazaqstan örkeniettı el retınde Resei şekarasynan elımızge bas sauǧalap, soǧystan qaşqan reseilıkterge pana qyldy... Ötken aptada köşıp keluşılerdıŋ basym bölıgı Astana men Almatyǧa, şekaradaǧy oblys ortalyqtaryna ornalasyp jatyr. Onsyz da ışkı migrasiia saldarynan tūrǧyndardyŋ sany kürt ösken ülken qalalarymyzǧa infraqūrylymdyq jäne äleumettık-ekonomikalyq qysym artuda. Negızınen äsker jasyndaǧy Resei azamattarynyŋ elımızge jappai qonys audaruy bügıngı postkeŋestık geosaiasi jaǧdaida qatty alaŋdatyp otyr”, - dedı ol Mäjılıs otyrysynda.Sondai-aq, reseilıkter Qazaqstan Konstitusiiasy men zaŋdaryna qaltqysyz baǧynuǧa, qazaq tılı men salt-dästürın qūrmetteuge mındettı ekenın basa aitty. Alaida Berık Düisenbinov migrasiialyq daǧdarysty paidalanyp, el ışınde ırıtkı salǧysy keletınder baryn eskerttı.
«Ökınışke qarai, Qazaqstannyŋ keibır öŋırlerınde arandatu oqiǧalary bolyp jatyr. Būl derekter boiynşa qylmystyq ıster qozǧap, arandatuşylardyŋ äreketterın jol bermei jatqan qūzyrly memlekettık organdarǧa rizaşylyǧymyzdy bıldıremız. Osyǧan bailanysty sızden Qazaqstanda qanşa Resei azamaty bar ekenın anyqtap, jauap beruıŋızdı sūraimyz», - dedı deputat.Ol Ükımet jedel türde tiıstı saqtyq şaralaryn qabyldap, müddelı memlekettık organdarǧa tömendegıdei tapsyrma beruı tiıs ekenın atap öttı:
- Bırınşıden, köşıp keluşılerdıŋ Qazaqstanda qaluǧa niet bıldırgen azamattary üşın; qalalar men eldı mekenderde beiımdeu ortalyqtaryn aşyp, būl ortalyqtarda olarǧa: Qazaqstan tarihymen, mädenietı men tūrmys-saltymen, salt-dästürı men ädet-ǧūrpymen tanystyru, Qazaqstan Konstitusiiasy men zaŋdaryn tüsındırıp, qūqyqtyq keŋes beru, qazaq tılı kurstaryn aşu jäne ärbır köşıp kelgen şetel azamatyn beiımdeu ortalyǧynan ötudı mındetteu;
- Ekınşıden, ärbır qonys audaruşynyŋ qos azamattyq faktısı boiynşa tekseru jäne nätijesı boiynşa tiesılı qūqyqtyq şara qoldanu;
- Üşınşıden, aqparattyq qauıpsızdıktı qataŋ baqylap, iaǧni, äleumettık jelılerge, keluşılerdıŋ chattaryna kontent saraptama (Facebook, Tik-Tok, Telegram, Instagram, Vkontakte i taǧy basqa) men monitoring jürgızıp, ūlttyq qauıpsızdıkke qauıp töndıretın jäne memleketımızdıŋ jer tūtastyǧyna, täuelsızdıgımızge kümän keltıretın jazbalardyŋ avtorlaryn erekşe qadaǧalauǧa alyp, ondai ırıtkı saluşylardy qataŋ jauapkerşılıkke tartyp, olardy elden şūǧyl alastau qajet dep sanaidy.
”Adyrna” ūlttyq portaly
Ūqsas jaŋalyqtar
