ءماجىلىس دەپۋتاتى بەرىك دۇيسەنبينوۆ قازاقستانعا كەلگەن رەسەيلىكتەردى بەيىمدەۋ ورتالىعىن اشىپ، قازاق ءتىلى مەن تاريحىن وقىتۋدى ۇسىندى. ول دەپۋتاتتىق ساۋالىن پرەمەر-مينيستر ءاليحان سمايىلوۆقا جولدادى، دەپ حابارلايدى “ادىرنا” ۇلتتىق پورتالى.
“قازاقستان قاي زاماندا دا قىسىم كورىپ، ءوز ەلىنەن قاشىپ، بوسقىن بولۋعا ءماجبۇر بولعان تالاي حالىقتى ءوز باسىنداعى قيىنشىلىققا قاراماستان قۇشاق جايا قارسى الىپ، امان الىپ قالعانىنا كۋا. قازاقستان وركەنيەتتى ەل رەتىندە رەسەي شەكاراسىنان ەلىمىزگە باس ساۋعالاپ، سوعىستان قاشقان رەسەيلىكتەرگە پانا قىلدى... وتكەن اپتادا كوشىپ كەلۋشىلەردىڭ باسىم بولىگى استانا مەن الماتىعا، شەكاراداعى وبلىس ورتالىقتارىنا ورنالاسىپ جاتىر. ونسىز دا ىشكى ميگراتسيا سالدارىنان تۇرعىنداردىڭ سانى كۇرت وسكەن ۇلكەن قالالارىمىزعا ينفراقۇرىلىمدىق جانە الەۋمەتتىك-ەكونوميكالىق قىسىم ارتۋدا. نەگىزىنەن اسكەر جاسىنداعى رەسەي ازاماتتارىنىڭ ەلىمىزگە جاپپاي قونىس اۋدارۋى بۇگىنگى پوستكەڭەستىك گەوساياسي جاعدايدا قاتتى الاڭداتىپ وتىر”، - دەدى ول ءماجىلىس وتىرىسىندا.
سونداي-اق، رەسەيلىكتەر قازاقستان كونستيتۋتسياسى مەن زاڭدارىنا قالتقىسىز باعىنۋعا، قازاق ءتىلى مەن سالت-ءداستۇرىن قۇرمەتتەۋگە مىندەتتى ەكەنىن باسا ايتتى.
الايدا بەرىك دۇيسەنبينوۆ ميگراتسيالىق داعدارىستى پايدالانىپ، ەل ىشىندە ىرىتكى سالعىسى كەلەتىندەر بارىن ەسكەرتتى.
«وكىنىشكە قاراي، قازاقستاننىڭ كەيبىر وڭىرلەرىندە ارانداتۋ وقيعالارى بولىپ جاتىر. بۇل دەرەكتەر بويىنشا قىلمىستىق ىستەر قوزعاپ، ارانداتۋشىلاردىڭ ارەكەتتەرىن جول بەرمەي جاتقان قۇزىرلى مەملەكەتتىك ورگاندارعا ريزاشىلىعىمىزدى بىلدىرەمىز. وسىعان بايلانىستى سىزدەن قازاقستاندا قانشا رەسەي ازاماتى بار ەكەنىن انىقتاپ، جاۋاپ بەرۋىڭىزدى سۇرايمىز»، - دەدى دەپۋتات.
ول ۇكىمەت جەدەل تۇردە ءتيىستى ساقتىق شارالارىن قابىلداپ، مۇددەلى مەملەكەتتىك ورگاندارعا تومەندەگىدەي تاپسىرما بەرۋى ءتيىس ەكەنىن اتاپ ءوتتى:
- بىرىنشىدەن، كوشىپ كەلۋشىلەردىڭ قازاقستاندا قالۋعا نيەت بىلدىرگەن ازاماتتارى ءۇشىن; قالالار مەن ەلدى مەكەندەردە بەيىمدەۋ ورتالىقتارىن اشىپ، بۇل ورتالىقتاردا ولارعا: قازاقستان تاريحىمەن، مادەنيەتى مەن تۇرمىس-سالتىمەن، سالت-ءداستۇرى مەن ادەت-عۇرپىمەن تانىستىرۋ، قازاقستان كونستيتۋتسياسى مەن زاڭدارىن ءتۇسىندىرىپ، قۇقىقتىق كەڭەس بەرۋ، قازاق ءتىلى كۋرستارىن اشۋ جانە ءاربىر كوشىپ كەلگەن شەتەل ازاماتىن بەيىمدەۋ ورتالىعىنان ءوتۋدى مىندەتتەۋ;
- ەكىنشىدەن، ءاربىر قونىس اۋدارۋشىنىڭ قوس ازاماتتىق فاكتىسى بويىنشا تەكسەرۋ جانە ناتيجەسى بويىنشا تيەسىلى قۇقىقتىق شارا قولدانۋ;
- ۇشىنشىدەن، اقپاراتتىق قاۋىپسىزدىكتى قاتاڭ باقىلاپ، ياعني، الەۋمەتتىك جەلىلەرگە، كەلۋشىلەردىڭ چاتتارىنا كونتەنت ساراپتاما (Facebook, Tik-Tok, Telegram, Instagram, Vkontakte ي تاعى باسقا) مەن مونيتورينگ جۇرگىزىپ، ۇلتتىق قاۋىپسىزدىككە قاۋىپ توندىرەتىن جانە مەملەكەتىمىزدىڭ جەر تۇتاستىعىنا، تاۋەلسىزدىگىمىزگە كۇمان كەلتىرەتىن جازبالاردىڭ اۆتورلارىن ەرەكشە قاداعالاۋعا الىپ، ونداي ىرىتكى سالۋشىلاردى قاتاڭ جاۋاپكەرشىلىككە تارتىپ، ولاردى ەلدەن شۇعىل الاستاۋ قاجەت دەپ سانايدى.
”ادىرنا” ۇلتتىق پورتالى
