Qazaqstan Prezidentı Qasym-Jomart Toqaev januarlarǧa jauapkerşılıkpen qarau mäselelerı boiynşa Qazaqstan Respublikasynyŋ keibır zaŋnamalyq aktılerıne özgerıster men tolyqtyrular engızu turaly zaŋǧa qol qoidy. Būl qūjat qaŋǧybas itter men mysyqtarǧa qatysty qūqyqtyq rejimdı özgertedı, dep habarlaidy "Adyrna".
Zaŋ qoldanystaǧy «Januarlarǧa jauapkerşılıkpen qarau turaly» zaŋdy tolyqtyryp, bır jaǧynan qatygezdık üşın jauapkerşılıktı küşeitse, ekınşı jaǧynan panajailarda şekteulı merzım ūstalǧannan keiın qarausyz januarlardy evtanaziialauǧa mümkındık beretın tetıktı engızedı.
Mamyr aiynyŋ basynda būl tüzetulerdı mäjılıs pen senat deputattary maqūldaǧan bolatyn. Endı jergılıktı äkımdıkter men mäslihattar januarlardy ūstau erejelerın jäne qaŋǧybas it pen mysyqtardy uaqytşa ūstau punktterınde qanşa uaqyt bolatynyn özderı belgılei alady.
Sondai-aq januardyŋ iesı bar-joǧyn anyqtaityn belgılerı keŋeitıldı. Būryn tek chiptıŋ boluy esepke alynsa, endı moiynbau (oşeinik), belgı (birka) jäne syrtqy kelbet te eskerıletın bolady.
"Evtanaziia" ūǧymy da naqtylandy. Endı ol tek veterinar därıgerdıŋ qorytyndysy negızınde jäne tek medisinalyq körsetkışter boiynşa januardy jansyzdandyru retınde qarastyrylady. Sonymen qatar qaŋǧybas januarlar sanyn retteu tärtıbı jergılıktı äkımdıkter deŋgeiıne berıldı.
Deputat Edıl Jaŋbyrşin ılgerıletken būl tüzetuler qoǧamda qyzu pıkırtalas tudyrdy. Negızgı dau evtanaziia mäselesınen şyqty. Januarlardy qorǧauşylar būǧan deiıngı jappai ūiyqtatu täjıribesın qaitaruǧa qarsy şyǧyp, OSVV (aulau–sterildeu–vaksinasiia–qaitaru) jüiesın saqtaudy talap ettı.
Nätijesınde qoldanystaǧy qaitarymsyz aulau modelı saqtaldy. Bıraq evtanaziia tek medisinalyq negız bolǧan jaǧdaida jäne veterinardyŋ qorytyndysymen ǧana rūqsat etıletını bölek bekıtıldı.
Sondai-aq būǧan deiın deputattar januarlardy ūstau men seruendetu erejelerın būzǧany üşın ielerdıŋ jauapkerşılıgın küşeitudı ūsynǧan edı.
Senat kuluarynda jurnalister aiyppūldarǧa qatysty naqtylady. Vise-ministr Nūrken Şarbiev Äkımşılık qūqyq būzuşylyq turaly kodekstıŋ 407-1-babyn ("Januarlarǧa qatygezdık körsetu") qataŋdatu josparlanyp otyrǧanyn aitty.
Eger qylmystyq qūram bolmasa:
- jeke tūlǧalar üşın aiyppūl 5-ten 30 AEK-ke deiın (21 625-ten 129 750 teŋgege deiın);
- lauazymdy tūlǧalar üşın 10-nan 50 AEK-ke deiın (43 250-den 216 250 teŋgege deiın).
Qaitalanǧan jaǧdaida:
- jeke tūlǧalarǧa 20-dan 50 AEK-ke deiın (86 500–216 250 teŋge);
- lauazymdy tūlǧalarǧa 40-tan 100 AEK-ke deiın (173 000–432 500 teŋge) aiyppūl salynady..
Şarbievtıŋ aituynşa, aiyppūldar barlyq deŋgeide şamamen 2,5 ese ösedı.
Sondai-aq januarlardy aulau, panajailarda ūstau jäne seruendetu erejelerın būzǧany üşın de aiyppūldardy arttyru ūsynyldy:
- jeke tūlǧalar üşın 10-nan 15 AEK-ke deiın (43 250–64 875 teŋge);
- lauazymdy tūlǧalar üşın 20-dan 30 AEK-ke deiın (86 500–129 750 teŋge);
- zaŋdy tūlǧalar üşın 30-dan 40 AEK-ke deiın (129 750–173 000 teŋge).
Qaitalanǧan qūqyq būzuşylyqtar üşın:
- jeke tūlǧalarǧa 20-dan 30 AEK-ke deiın (86 500–129 750 teŋge);
- lauazymdy tūlǧalarǧa 30-dan 60 AEK-ke deiın (129 750–259 500 teŋge);
- zaŋdy tūlǧalarǧa 40-tan 80 AEK-ke deiın (173 000–346 000 teŋge) aiyppūl qarastyrylǧan.
