Búgin A.P.Chehov atyndaǵy kitaphanada Qazaqstannyń halyq jazýshysy Sherhan Murtazanyń 90 jyldyq mereıtoıyna oraı uıymdastyrylǵan ádebı-sazdy kesh ótti.
«Óner» baspasynyń bas dırektory Áshirbek Kópish, jazýshy, «Ana tili» gazetiniń bas redaktory Qalı Sársenbaı, jýrnalıst Gúlzeınep Sádirqyzy arnaıy qonaq bolyp kelip, Sherhan atamyz shyǵarmashylyq jolyna, ómir joldaryna toqtalyp, jastardyń súıispenshiligine bólendi.
T.Júrgenov atyndaǵy óner akademııasynyń túlegi, dástúrli ánshi Qanat Búrlen «Elim meniń», «Qumǵan alǵan», «Týǵan jerim tamasha» ánin dombyramen áýeletse, Qazaqstannyń eńbek sińirgen qaıratkeri Erlan Biláldiń shákirtteri, T.Júrgenov atyndaǵy óner akademııasynyń stýdentteri Medet Batyrjan, Jibek Bolatjanqyzy, Abdýrahman Ǵabıtuly «Myltyqsyz maıdan» shyǵarmasynan úzindi usynyp, sahnalyq qoıylymdy Áshirbek Kópish aǵamyz «Sherhan Murtazanyń jas kezin kórgendeı boldym» dep joǵary baǵalady.
Ál-Farabı atyndaǵy QazUÝ-niń jýrnalıstıka fakýltetiniń jáne Abaı atyndaǵy QazUPÝ-niń fılologııa fakýltetiniń stýdentteri, № 147 mektep-gımnazııanyń oqýshylary keshtiń mándi de sándi ótýine belsene atsalysty. Keshimizdiń unaǵany sonshalyq, Ahmet Baıtursynuly, Muhtar Áýezov, Qabdesh Jumadilge osyndaı keshter uıymdastyrylsa degen degen usynys tústi. Osyndaı urpaq ósip kele jatqanyna ishteı qýandym.
«Adyrna» ulttyq-etnografııalyq portalynyń avtory ári bas redaktory Arman Áýbákirge, osy keshti arnaıy kelip túsirgen «Almaty» telekanalyna shyn júrekten úlken alǵys bildiremiz!!!
Sherhan Murtaza atamyzdyń rýhy árkez qoldap júrsin dep tilek aıtqym keledi.
Aınur Balaýbaeva
