Elimizde tirshilik jańarǵan ýaqytta jylda bolatyn aýys-túıistiń bergi beti kórine bastady. Kúni keshe Elbasynyń jarlyǵymen Astana qalasynyń ákimi Áset Isekeshev qyzmetinen bosatylyp, prezıdent ákimshiliginiń basshysy laýazymyna taǵaıyndaldy. Memleket basshysynyń mundaı sheshimine qatysty el arasyndaǵy pikir ekige bólindi. Alaıda qoldap, sheshimnen ońtaıly nátıje kútetinderdiń qatary artqan. Máselen, Isekeshevti jańa ári jaýapty laýazymymen quttyqtap, qýanyshymen bóliskenderdiń qatarynda bloger, sarapshy Syrym Ábdirahmanov, tanymal pıar mamany Qýat Dombaı, belsendi Arýjan Saıyndar bar. Al keıbiri Feısbýkte otyratyn sheneýnikti «endigi paraqshasyn óshirip, menmensip ketetin shyǵar» dep te boljady. Alaıda eks-ákimniń paraqshasy áli sol qalpynda, tipti ákimdiktiń saıtyndaǵy jańalyqpen bólisip qoıypty.
Jalpy Isekeshev halyq úshin nesimen este qaldy? Bir tizip shyqsaq...
Áset Isekeshev eki jyl Astananyń ákimi bolǵan ýaqytta eki jylda da qatty jańbyr saldarynan qalany sý basty. Astana dese, ózge qala turǵyndarynyń kóz aldyna elesteıtini jańbyr men sý astynda qalǵan qala ekendiginde kúmánimiz joq. Iaǵnı ákimniń sheshimin tappaǵan máseleleriniń eń bastysy - qaladaǵy aryq júıesiniń jóndi tartylmaýy. Atalmysh máselege qatysty eks-ákim Elbasydan sógis te aldy. Al byltyr sáýirde qaladaǵy tártipsizdiktiń kesirinen Nazarbaevtan sóz estigen Isekeshev tańǵy 6-dan bastap qalany retke keltirýdi bastap ketken edi.
Budan ózge, ákim qaramaǵyndaǵy sheneýnikterdi taksıge otyrǵyzdy. Velosıpedshilerdiń jaǵdaıyn jasady, ıaǵnı velojoldardyń sany artty. Túrli jobalardy júzege asyrdy. Máselen, "Smart Astana", "Balabaqshaǵa kezekti ESQ" arqyly alý, Astana LRT, t.b.
Isekeshevtiń Astana – «Samaıa vyshka» dep ándetýi ákimniń zamanaýı bolýdan qoryqpaıtyndyǵynyń birden-bir dáleli bolsa kerek.
Jalpy Isekeshev qala turǵyndary úshin qarapaıym ákim retinde este qaldy desek ábden bolady. Al saıasatkerler ne deıdi? Ákimniń prezıdent ákimshiliginiń basshysy bolyp taǵaıyndalýyn saıasattanýshy Aıdos Sarym qoldap otyr. Aıtýynsha, Áset Isekeshev belesterdi baǵyndyrǵan jas ári tájirıbeli maman.
«Prezıdent ákimshiliginiń basshysy – jabyq qyzmettiń biri. Mınıstrliktegi, ákimdiktegi basshylar atqarǵan jumystaryn aıtyp, túsindirýge májbúr bolsa, prezıdent ákimshiliginiń qyzmetkeri óziniń baǵyt-baǵdary jaıynda eshkimge tis jarmaıdy. Áset Isekeshev – zamanaýı adam, osy zamannyń túlegi. Bálkim bir suhbat berip, úlken maqala jazyp, óziniń aldaǵy baǵyt-baǵdary týraly naqty áńgime aıtsa nemese prezıdent mynadaı tapsyrmalar berdi, jumys soǵan negizdeledi dep aıtsa, qoǵam úshin de, saıası mádenıetimiz úshin de jaqsy bolar edi», - dep oıymen bólisti saıasattanýshy.
Sonymen qatar ákimdik qyzmetin de «jaqsy» dep baǵalady.
«Jumysyn barynsha ashyq jasady. Jeke kólikten bas tartý, qoǵamdyq kóliktiń jumysyn ornyqtyrý, jalpy qoǵammen baılanys ornata bildi. Tipti «kimde-kim jeke paraqshasyna jazsa, ózi jaýap beredi» degendi estip qaldym. Jalpy jastarmen tyǵyz baılanysta bolǵan ákim dep oılaımyn. Ákim degen qudaı emes, paıǵambardyń úmbeti emes, qoǵamǵa qyzmet etetin azamat. Isekeshev qoǵamǵa qyzmet kete bildi. Tek osyny ári qaraı damytyp jalǵastyra berse deımiz», - dep sózin qorytyndylady.
Qoǵam belsendisi, saıasattanýshy Muhtar Taıjannyń da pikiri Aıdos Sarymnan alystaı qoımady, tek keıbir jobalaryna synı pikir bildirdi.
«Ol ákim bolǵan ýaqytta qala taza boldy. Saıabaqtardyń sany artty. Qalanyń damýy úshin jyl saıyn qanshama qarajat salynyp jatty. Onyń oryndy-orynsyz jumsalǵanyn bilmeımin, biraq Astananyń kórikti qala bolýyna yqpalyn tıgizdi. Ákim retindegi jumysyna teris pikir bildire almaımyn», - deı kele kóńili tolmaǵan bir jaıtty eskerip ótti.
«Shyny kerek, LRT jobasyna kóńilim tolmady. Astana halyqaralyq áýejaıy, EXPO-2017 kórmesin, odan ári «Abý-Dabı Plaza» kóp qabatty kesheni jáne jańa temirjol vokzalynyń arasynda jalǵaıtyn jańa relsti kólik júıesiniń Astanaǵa qajeti joq. Qala onsyz da kishkentaı. Ol joba úshin Qytaıdan bir jarym mıllıard dollarǵa deıin qaryz aldyq. Ushaqtar da kóp ushpaıdy, beker boldy. Tek syrtqy qaryzymyzdy kóbeıtti», - dedi Muhtar Taıjan.
Al prezıdent ákimshiliginiń basshysy bolyp taǵaıyndalǵan ákimge ekonomıst ári qoǵam belsendisi mynany aıtady:
«Ol myna saıası júıeniń sarbazy. Bul júıe túbi ózgeredi. Sol ýaqytta onyń ár sarbazy istegen is-áreketine jaýap beredi. Qazaq eline paıdasy tıdi me, álde zııany ma? Alǵash ret orta býynnyń ókili osyndaı joǵary dárejege jetip otyr. Sondyqtan oǵan bylaı aıtar edim: «Áset, elimizdiń jaqsarýyna úlesińdi qos. Syrtqy qaryzymyzdy azaıtýymyz kerek. Parlamentti adal, demokratııalyq túrde saılaıyq. Iá, Parlamenttiń ishinde saýatty depýtattar bar. Biraq ózgermeı, sol kúıi turǵanyna 15 jylǵa jýyqtady Parlamentke demokratııalyq zańmen jańa tulǵalar kirý kerek. Sen soǵan úlesińdi qossań, nur ústine nur bolar edi», - dep ssózine aıaqtady dep jazady "Qamshy" saıty.
