2020 jylǵy 11 jeltoqsan kúni Túrkistan oblysy Qazyǵurt taýynyń etegindegi "Keme qalǵan"alańynda "Aýyldyqtar atqa qondy, qoldaıyq!" atty akııasy ótkizilip, Qazaqstan Respýblıkasy Parlamenti Májilisi men máslıhat depýtattaryn saılaý naýqanynyń sımvolıkalyq túrde bastalǵanyn jarııalady, dep habarlaıdy "Adyrna" ulttyq portaly partııanyń baspasóz qyzmetine silteme jasap.
Is-sharaǵa QR Parlamenti Májilisiniń depýtattyǵyna kandıdattar: T.S.Rahımbekov, K. K. Aıtýǵanov, B. Tólegen, Z. A. Álipbekov, D. Kápuly, K. A. Aralbekova, N. G. Arsıýtın, A. A. Satybaldın, D. K. Qýatov jáne B. D. Qystaýov qatysty.
"Aýyl" partııasynyń tóraǵasy Álı Bektaev, QR Parlamenti Májilisiniń depýtattyǵyna kandıdat Qarlyǵash Aralbekova, Parlament Májilisiniń depýtattyǵyna kandıdat, aqyn jáne jazýshy Dáýletkereı Kápuly quttyqtaý sóz sóıledi.
"Ańyz boıynsha, adamzatty sý tasqynynan qutqarǵan Nuh kemesi osy jerge toqtady. Adamzat balasynyń ósip-ónýi dál osy jerden bastaý alady. Sondyqtan qasıetti Qazyǵurt jerin jańǵyrý jáne jańarý mekeni dep ataýǵa bolady. Sol sebepti "Aýyl" partııasy óziniń úgit-nasıhat naýqanyn osy jerden bastaýdy uıǵardy.
"Atqa qoný" uǵymy halqymzdyń múddelerin qorǵaý úshin kúsh jumyldyrýdy bildiredi. Atqa qonǵandar jaqsylyqtyń jarshysy, partııanyń josparlary men usynystarynyń habarshysy bolady. Sondyqtan barlyq kandıdattardyń birinshi kezektegi mindeti partııanyń saılaýaldy baǵdarlamasyn árbir aýylǵa, árbir qazaqstandyqqa jetkizý" - dep atap ótti Á. Bektaev.
Aqsaqaldardyń atynan memleket jáne qoǵam qaıratkeri, "Aýyl" partııasynyń Túrkistan oblysy boıynsha óńirlik fılıalynyń basshysy Ismat Tursynqululy tilek bildirdi.
Qazaqstandyq estrada ókilderi - Jubanysh Jeksenuly, Meıramkúl Tantabaeva, Bákir Bekturov, "Megapolıs" trıosy, Pavel Kım aýyl jaıly, Otanǵa degen súıispenshilik týraly ánder shyrqady.
Is-shara "Aýyldyqtar atqa qondy"sherýimen aıaqtaldy.
Esterińizge sala keteıik, "Aýyl" partııasy óziniń saılaýaldy baǵdarlamasyn qalyptastyrý aldynda "El amanaty"atty jalpyulttyq saýalnama júrgizip, árbir qazaqstandyqtyń usynystary men problemalyq máselelerin qarastyrǵan bolatyn. El-jurttan jınalǵannyń barlyq máselelerdi "Aýyl" partııasy amanat retinde óz nusqaýlyǵyna aldy.
