Qazaq tılınıŋ damuy, qazaq kontentınıŋ örleuı turaly janaşyp jandar ünemı jazyp kele jatyr. Timur Bektūr öz facebook paraqşasynda oilanarlyq äserlı jazba qaldyrdy, dep habarlaidy “Adyrna” ūlttyq portaly.
“Tıl turaly äŋgıme qozǧaǧyŋ kelmeidı-aq. Bıraq, halyqaralyq deŋgeidegı kompaniialarǧa jūmysqa tūrǧan, şeteldık oquǧa tüsken, taǧy sol siiaqty jetıstıkke jetken ūl-qyzdarymyzdy ünemı ızdep jürıp tauyp alamyn da dereu İnstagramyn qaraimyn. Bılesızder me, 90-95% orysşa jazady.İä, olardyŋ ışınde köbı nemese barlyǧy derlık qazaqşa tüsınetınder, söilei alatyndar. Bıraq, syrtqy älemmen kommunikasiiasy orys tılınde qalyptasqan. Nelıkten? Bılmeimın. Bılgım de kelmeidı. Tek… sondai aqyldy örenderımızdıŋ öz tılın özekke tebetını, orysşa kontent runet kontentın köbeitpese, onyŋ qazaqtyŋ damuyna eş üles qospaityny qynjyltady. Ärine, olarǧa baryp moral oqi almaimyz. Talap ta qoia almaimyz. Äke-şeşe, ainalasyndaǧy qorşaǧan ortasy solai bop tūr ǧoi, demek. Ättegen-aiy, Nazarbaev Ziiatkerlık mektepterı deimız, Respublikalyq fizmat mektebı deimız, sol siiaqty özge de elitarlyq ordalardan ana tılınde kontent jasamaityndardyŋ köptep şyǧyp jatqany. Al endı renjımeiın deseŋ, HHI ǧasyrdaǧy qoǧamnyŋ damuy kontentke bailanysty ekendıgın basqa-basqa, tap solar bılmeidı emes, bıledı. Data injener, data saintister köp-aq. Qazaqşa bırdeŋe ısteiın deseŋ, künıŋ qazaqşa dataǧa tıreletının olar bılmegende, kım bıledı basqa? Bıraq olar ne ıstep jatyr sol jolda? Eş-te-ŋe! İä… jetıstıkke jete bersın. Bälkım, bır künderı qazyǧyn ainalyp tabar… Söitıp jürıp ūltynan müldem jerınıp ketpese… Bar aitaiyn degenım, “qazaqşa kontent, qazaqşa kontent” dep te şarşaidy ekensıŋ. Älemnıŋ trln mälımetın jalǧyz özıŋ ne sanauly adam bop qazaqşa qalai jetkızesıŋ, eger ”Oqyttyq, toqyttyq. Endı olar qazaqtyŋ kögıne örmelep şyǧyp kün bolady” dep ümıtıŋdı ükılep otyrǧanda, özge tıldıŋ toqymyn qaǧyp jürgende?
Bılmeimın, ne ısteuge bolatynyn… Qarap tūrsaŋ, myna zaman adamǧa renjitın de zaman emes. Onyŋ üstıne öz küşımen jetıstıkke jetıp jatqandarǧa. Tek, tömen qarap, qiqym terıp ketesıŋ be… sondai bır küi…”,- dep kürsındı ol jazbasynda.
“Adyrna” ūlttyq portaly
