قازاق ءتىلىنىڭ دامۋى، قازاق كونتەنتىنىڭ ورلەۋى تۋرالى جاناشىپ جاندار ۇنەمى جازىپ كەلە جاتىر. تيمۋر بەكتۇر ءوز facebook پاراقشاسىندا ويلانارلىق اسەرلى جازبا قالدىردى، دەپ حابارلايدى “ادىرنا” ۇلتتىق پورتالى.
ء“تىل تۋرالى اڭگىمە قوزعاعىڭ كەلمەيدى-اق. بىراق، حالىقارالىق دەڭگەيدەگى كومپانيالارعا جۇمىسقا تۇرعان، شەتەلدىك وقۋعا تۇسكەن، تاعى سول سياقتى جەتىستىككە جەتكەن ۇل-قىزدارىمىزدى ۇنەمى ىزدەپ ءجۇرىپ تاۋىپ الامىن دا دەرەۋ ينستاگرامىن قارايمىن. بىلەسىزدەر مە، 90-95% ورىسشا جازادى.
ءيا، ولاردىڭ ىشىندە كوبى نەمەسە بارلىعى دەرلىك قازاقشا تۇسىنەتىندەر، سويلەي الاتىندار. بىراق، سىرتقى الەممەن كوممۋنيكاتسياسى ورىس تىلىندە قالىپتاسقان.
نەلىكتەن؟
بىلمەيمىن. بىلگىم دە كەلمەيدى. تەك… سونداي اقىلدى ورەندەرىمىزدىڭ ءوز ءتىلىن وزەككە تەبەتىنى، ورىسشا كونتەنت رۋنەت كونتەنتىن كوبەيتپەسە، ونىڭ قازاقتىڭ دامۋىنا ەش ۇلەس قوسپايتىنى قىنجىلتادى.
ارينە، ولارعا بارىپ مورال وقي المايمىز. تالاپ تا قويا المايمىز. اكە-شەشە، اينالاسىنداعى قورشاعان ورتاسى سولاي بوپ تۇر عوي، دەمەك. اتتەگەن-ايى، نازارباەۆ زياتكەرلىك مەكتەپتەرى دەيمىز، رەسپۋبليكالىق فيزمات مەكتەبى دەيمىز، سول سياقتى وزگە دە ەليتارلىق وردالاردان انا تىلىندە كونتەنت جاسامايتىنداردىڭ كوپتەپ شىعىپ جاتقانى.
ال ەندى رەنجىمەيىن دەسەڭ، ءححى عاسىرداعى قوعامنىڭ دامۋى كونتەنتكە بايلانىستى ەكەندىگىن باسقا-باسقا، تاپ سولار بىلمەيدى ەمەس، بىلەدى.
داتا ينجەنەر، داتا ساينتيستەر كوپ-اق. قازاقشا بىردەڭە ىستەيىن دەسەڭ، كۇنىڭ قازاقشا داتاعا تىرەلەتىنىن ولار بىلمەگەندە، كىم بىلەدى باسقا؟ بىراق ولار نە ىستەپ جاتىر سول جولدا؟
ەش-تە-ڭە!
ءيا… جەتىستىككە جەتە بەرسىن. بالكىم، ءبىر كۇندەرى قازىعىن اينالىپ تابار… ءسويتىپ ءجۇرىپ ۇلتىنان مۇلدەم جەرىنىپ كەتپەسە…
بار ايتايىن دەگەنىم، “قازاقشا كونتەنت، قازاقشا كونتەنت” دەپ تە شارشايدى ەكەنسىڭ. الەمنىڭ ترلن مالىمەتىن جالعىز ءوزىڭ نە ساناۋلى ادام بوپ قازاقشا قالاي جەتكىزەسىڭ، ەگەر ”وقىتتىق، توقىتتىق. ەندى ولار قازاقتىڭ كوگىنە ورمەلەپ شىعىپ كۇن بولادى” دەپ ءۇمىتىڭدى ۇكىلەپ وتىرعاندا، وزگە ءتىلدىڭ توقىمىن قاعىپ جۇرگەندە؟
بىلمەيمىن، نە ىستەۋگە بولاتىنىن… قاراپ تۇرساڭ، مىنا زامان ادامعا رەنجيتىن دە زامان ەمەس. ونىڭ ۇستىنە ءوز كۇشىمەن جەتىستىككە جەتىپ جاتقاندارعا. تەك، تومەن قاراپ، قيقىم تەرىپ كەتەسىڭ بە… سونداي ءبىر كۇي…”،- دەپ كۇرسىندى ول جازباسىندا.
“ادىرنا” ۇلتتىق پورتالى
