Foto: Jİ
Qazaqstannyŋ Petropavl qalasynda Kyzylzhar Hub kölık-logistikalyq keşenı salynady, dep habarlaidy "Adyrna".
Joba aiasynda Reseidıŋ Ozon marketpleisı men Qytaidyŋ Alibaba onlain sauda alaŋyndaǧy tauarlardy saqtauǧa, öŋdeuge jäne taratuǧa arnalǧan infraqūrylym qūru josparlanyp otyr.
Soltüstık Qazaqstan oblysy äkımdıgınıŋ mälımetınşe, joba elektrondy sauda naryǧyna qyzmet körsetetın zamanaui logistikalyq infraqūrylym qalyptastyrudy közdeidı.
Jobanyŋ investisiialyq qūny 29 milliard teŋgege baǧalanyp otyr. Keşennıŋ tūjyrymdamasyn Bırıkken Arab Ämırlıkterınen kelgen Royal Investment International kompaniiasy ūsynǧan. 18 qaraşada oblys äkımı Ǧauez Nūrmūhambetov kompaniia qūryltaişysy Marat Salihovpen kelıssöz jürgızgen.
Bolaşaq logistikalyq ortalyqtyŋ jalpy aumaǧy 102 myŋ şarşy metrdı qūraidy. Onyŋ qūramynda azyq-tülık pen halyq tūtynatyn tauarlarǧa arnalǧan arnaiy qoimalar, jükterdı qaita tieu alaŋdary jäne keŋse bölmelerı bolady.
Joba ıske asqan jaǧdaida Petropavl qalasynyŋ kölık-logistikalyq äleuetın arttyryp, elektrondy sauda salasyndaǧy tauar ainalymyn damytuǧa mümkındık beredı.
