Ýkraına energetıka mınıstrligi reseılik gazdy Eýropaǵa tasymaldaý 1 qańtar tańynda josparlanǵandaı toqtatylǵanyn málimdedi, dep habarlaıdy "Adyrna" ulttyq portaly.
«Ulttyq qaýipsizdikti saqtaý maqsatynda saǵat 07:00-de Reseı tabıǵı gazyn Ýkraına aýmaǵy arqyly tasymaldaý toqtatyldy. Bul týraly sheteldik seriktesterge belgilengen tártippen habarlandy», – delingen mınıstrliktiń málimdemesinde.
«Reseılik gaz tranzıtin toqtattyq – bul tarıhı oqıǵa. Reseı naryqtaryn joǵaltyp, qarjylyq shyǵyndarǵa ushyraıdy», – dep málimdedi mınıstr German Galýenko mınıstrliktiń baspasóz qyzmeti arqyly.
Ol sonymen qatar: «Eýropa Reseı gazynan bas tartý týraly sheshim qabyldady. Repower EU eýropalyq bastamasy dál búgin Ýkraına jasaǵan qadamdy qarastyrady», – dep tolyqtyrdy.
Reseı gazyn Ýkraına aýmaǵy arqyly tranzıtteý kelisimderi 2019 jyldyń sońynda, Reseıdiń aýqymdy shabýyly bastalǵanǵa deıin jasalǵan bolatyn. Bıylǵy Jańa jyl túni kelisimderdiń merzimi aıaqtalyp, Ýkraına olardy uzartýdan bas tartty.
Búl týraly Reseılik «Gazprom» kompanııasy Telegram-arnasynda jazdy.
«Máskeý ýaqytymen tańǵy 8:00-den bastap Reseı gazy Ýkraına aýmaǵy arqyly tasymaldaýǵa jetkizilmeıdi. Ýkraın tarapynan bul kelisimderdi uzartýdan birneshe ret jáne ashyq túrde bas tartylǵandyqtan, «Gazprom» Ýkraına arqyly tranzıtke gaz jetkizýdiń tehnıkalyq jáne zańdy múmkindiginen aıyryldy», – delingen habarlamada.
EADaily málimetteri boıynsha, 2024 jyly «Gazprom» osy marshrýt arqyly shamamen 15 mıllıard tekshe metr gaz jetkizgen, bul EO-daǵy jalpy gaz tutynýdyń 4,5 paıyzyna teń.
Endi eýropalyq elder úshin Reseıdiń gaz qubyrymen tasymaldanatyn jalǵyz kózi «Túrik aǵyny» arqyly jetkiziletin «Balqan aǵyny» bolyp qala beredi. Jyl saıyn shamamen 14-15 mıllıard tekshe metr gaz Rýmynııa, Grekııa, Soltústik Makedonııa, Serbııa, Bosnııa jáne Geregovına, Vengrııa elderine jetkiziledi.
