Şyǧys Qazaqstan oblysynda qūrylys salasynyŋ qarqyny artyp, el kölemınde aiqyndalǧan mındetter naqty jobalar men ıs-şaralar josparyna ūlasyp jatyr. Öŋırde tūrǧyn üi salu, injenerlık infraqūrylymdy jaŋǧyrtu, äleumettık nysandar tūrǧyzu baǧyttaryndaǧy jūmystar jüielı türde jürgızılude. Sonymen qatar, bıregei medisinalyq jäne ırı sport nysandaryn salu jönındegı jobalar da jüzege asyrylyp keledı. Memleket basşysynyŋ Joldauynda belgılengen mındetterdı ıske asyruǧa kırısken öŋır aldaǧy kezeŋnıŋ qūrylys josparyn qazırden pysyqtauda.
Şyǧys Qazaqstan oblysy äkımdıgınde öŋırlık aktiv otyrysy öttı. Oblys äkımı Nūrymbet Saqtaǧanovtyŋ töraǧalyǧymen ötken jiynda basqarma basşylary, äleumettık-käsıpkerlık korporasiiasynyŋ ökılderı jäne memlekettık-jekemenşık ärıptestık ortalyǧynyŋ sarapşylary, Qazaqstan Halyq Keŋesınıŋ müşelerı bas qosyp, infraqūrylymdy jaŋǧyrtu, äleumettık salany damytu jäne halyqtyŋ ömır süru sapasyn arttyru baǧytyndaǧy mındetterdı talqylady.
Jiynda söz söilegen aimaq basşysy aldaǧy özgerısterge qajettı negızdı bügınnen bastap qalyptastyrudyŋ maŋyzyn atap öttı.
«Prezident Qasym-Jomart Toqaev kelesı jyldy Halyqtyq auqymdy qūrylys jyly dep jariialau bastamasynyŋ maŋyzy erekşe. Sonymen qatar, biyl da bızdıŋ öŋır üşın qūrylys jūmystary qarqyndy jürgızılgen kezeŋ boldy. Qazırgı uaqytta oblystyŋ äleumettık-ekonomikalyq damuy men tūrǧyndarymyzdyŋ ömır süru sapasyn arttyruda maŋyzdy röl atqaratyn bırqatar ırı, öŋır üşın eleulı nysandardyŋ qūrylysyn aiaqtap, paidalanuǧa berıp jatyrmyz.
Endı kelesı jyldyŋ negızgı basymdyqtaryn aiqyndap, auqymdy qūrylys jyly oblys üşın naqty nätijelerge, jaŋa nysandardyŋ paidalanuǧa berıluıne jäne infraqūrylymnyŋ sapaly özgeruıne jol aşuy tiıs. Sondyqtan aldaǧy kezeŋge arnalǧan mındetterdı, basym baǧyttar men naqty qadamdardy qazırden aiqyndau maŋyzdy», – dedı Nūrymbet Saqtaǧanov.
Qūrylys salasynyŋ biylǧy körsetkışterı men aldaǧy josparlary turaly oblystyq qūrylys, säulet jäne qala qūrylysy basqarmasynyŋ basşysy Rufat Akramov baiandady. Onyŋ aituynşa, öŋırde qūrylys qarqyny joǧary. 2026 jyly 408,4 myŋ şarşy metr tūrǧyn üidı paidalanuǧa beru josparlanǧan. Qazırdıŋ özınde jalpy audany 961 myŋ şarşy metrden asatyn tūrǧyn üidıŋ qūrylysy jürgızılude.
Tūrǧyn üi qūrylysymen qatar injenerlık infraqūrylymdy damytuǧa da basymdyq berılgen. Jalpy qūny 102 mlrd teŋgenı qūraityn injenerlık jelılerdı tartu boiynşa 25 joba jüzege asyryluda. Nätijesınde 85 köpqabatty tūrǧyn üi men jeke tūrǧyn üi qūrylysyna arnalǧan 2,6 myŋnan astam jer uchaskesın qajettı infraqūrylymmen qamtamasyz etu közdelgen.
Äsırese, densaulyq saqtau jäne äleumettık saladaǧy jobalarǧa airyqşa nazar audarylyp otyr.
«Densaulyq saqtau salasyndaǧy 2026 jyldyŋ negızgı nätijelerınıŋ bırı – Qazaqstanda bıregei ärı jalǧyz bolyp sanalatyn Gematologiia ortalyǧy qūrylysynyŋ aiaqtaluy», – dep atap öttı Rufat Akramov.
Būdan bölek, jyl soŋyna deiın Öskemende Onkologiia ortalyǧynyŋ jaŋartylǧan hirurgiialyq korpusyn paidalanuǧa beru josparlanǧan. Jobanyŋ qūny – 3,5 mlrd teŋge. Sondai-aq, Ana men bala ortalyǧy bazasynda qūny 6,5 mlrd teŋge bolatyn jaŋa perzenthana aşylady. Öŋırde 300 orynǧa arnalǧan, jalpy qūny 59,9 mlrd teŋgenı qūraityn köpbeiındı auruhananyŋ qūrylysy da jalǧasyp jatyr.
Aldaǧy kezeŋge arnalǧan qūrylys josparynda äleumettık maŋyzy joǧary 25 joba bar. Bılım beru salasynda Qasym Qaisenov kentınde, Praporşikovo auylynda, Zaisan qalasy men Öskemende tört mekteptıŋ qūrylysy bastaluǧa daiyn. Taǧy jetı mektep pen Ridder maŋyndaǧy qala syrtyndaǧy balalar lagerınıŋ jobalary äzırlenıp jatyr.
Sport pen mädeniet salasynda da auqymdy josparlar bar. Oblys ortalyǧynda Voleibol ortalyǧynyŋ qūrylysy jürıp jatyr, Üstel tennisı akademiiasynyŋ qūrylysy bastaldy. Būdan bölek, jabyq futbol stadionyn, 10 myŋ oryndyq Mūz arenasyn jäne 1 500 adamǧa arnalǧan Kongress-holl salu közdelgen.
Ridder qalasyndaǧy sporttyq infraqūrylym da jaŋa nysandarmen tolyqpaq. Mūnda şaŋǧy-roller trassasyn salu, «Sokol» stadionyn jaŋartu, jabyq hokkei modulın ornatu jäne şaŋǧy tramplinderın damytu josparlanǧan.
Osylaişa, Şyǧys Qazaqstan oblysynda aldaǧy Jalpyhalyqtyq auqymdy qūrylys jylyna daiyndyq tūrǧyn üi kölemın arttyrumen ǧana şektelmeidı. İnjenerlık jelılerdı damytu, medisinalyq kömektıŋ qoljetımdılıgın jaqsartu, bılım beru, sport jäne mädeniet nysandaryn köbeitu arqyly öŋırdıŋ infraqūrylymyn keşendı jaŋǧyrtuǧa basymdyq berılıp otyr.
