شىعىس قازاقستان وبلىسىندا قۇرىلىس سالاسىنىڭ قارقىنى ارتىپ، ەل كولەمىندە ايقىندالعان مىندەتتەر ناقتى جوبالار مەن ءىس-شارالار جوسپارىنا ۇلاسىپ جاتىر. وڭىردە تۇرعىن ءۇي سالۋ، ينجەنەرلىك ينفراقۇرىلىمدى جاڭعىرتۋ، الەۋمەتتىك نىساندار تۇرعىزۋ باعىتتارىنداعى جۇمىستار جۇيەلى تۇردە جۇرگىزىلۋدە. سونىمەن قاتار، بىرەگەي مەديتسينالىق جانە ءىرى سپورت نىساندارىن سالۋ جونىندەگى جوبالار دا جۇزەگە اسىرىلىپ كەلەدى. مەملەكەت باسشىسىنىڭ جولداۋىندا بەلگىلەنگەن مىندەتتەردى ىسكە اسىرۋعا كىرىسكەن ءوڭىر الداعى كەزەڭنىڭ قۇرىلىس جوسپارىن قازىردەن پىسىقتاۋدا.
شىعىس قازاقستان وبلىسى اكىمدىگىندە وڭىرلىك اكتيۆ وتىرىسى ءوتتى. وبلىس اكىمى نۇرىمبەت ساقتاعانوۆتىڭ توراعالىعىمەن وتكەن جيىندا باسقارما باسشىلارى، الەۋمەتتىك-كاسىپكەرلىك كورپوراتسياسىنىڭ وكىلدەرى جانە مەملەكەتتىك-جەكەمەنشىك ارىپتەستىك ورتالىعىنىڭ ساراپشىلارى، قازاقستان حالىق كەڭەسىنىڭ مۇشەلەرى باس قوسىپ، ينفراقۇرىلىمدى جاڭعىرتۋ، الەۋمەتتىك سالانى دامىتۋ جانە حالىقتىڭ ءومىر ءسۇرۋ ساپاسىن ارتتىرۋ باعىتىنداعى مىندەتتەردى تالقىلادى.
جيىندا ءسوز سويلەگەن ايماق باسشىسى الداعى وزگەرىستەرگە قاجەتتى نەگىزدى بۇگىننەن باستاپ قالىپتاستىرۋدىڭ ماڭىزىن اتاپ ءوتتى.
«پرەزيدەنت قاسىم-جومارت توقاەۆ كەلەسى جىلدى حالىقتىق اۋقىمدى قۇرىلىس جىلى دەپ جاريالاۋ باستاماسىنىڭ ماڭىزى ەرەكشە. سونىمەن قاتار، بيىل دا ءبىزدىڭ ءوڭىر ءۇشىن قۇرىلىس جۇمىستارى قارقىندى جۇرگىزىلگەن كەزەڭ بولدى. قازىرگى ۋاقىتتا وبلىستىڭ الەۋمەتتىك-ەكونوميكالىق دامۋى مەن تۇرعىندارىمىزدىڭ ءومىر ءسۇرۋ ساپاسىن ارتتىرۋدا ماڭىزدى ءرول اتقاراتىن بىرقاتار ءىرى، ءوڭىر ءۇشىن ەلەۋلى نىسانداردىڭ قۇرىلىسىن اياقتاپ، پايدالانۋعا بەرىپ جاتىرمىز.
ەندى كەلەسى جىلدىڭ نەگىزگى باسىمدىقتارىن ايقىنداپ، اۋقىمدى قۇرىلىس جىلى وبلىس ءۇشىن ناقتى ناتيجەلەرگە، جاڭا نىسانداردىڭ پايدالانۋعا بەرىلۋىنە جانە ينفراقۇرىلىمنىڭ ساپالى وزگەرۋىنە جول اشۋى ءتيىس. سوندىقتان الداعى كەزەڭگە ارنالعان مىندەتتەردى، باسىم باعىتتار مەن ناقتى قادامداردى قازىردەن ايقىنداۋ ماڭىزدى»، – دەدى نۇرىمبەت ساقتاعانوۆ.
قۇرىلىس سالاسىنىڭ بيىلعى كورسەتكىشتەرى مەن الداعى جوسپارلارى تۋرالى وبلىستىق قۇرىلىس، ساۋلەت جانە قالا قۇرىلىسى باسقارماسىنىڭ باسشىسى رۋفات اكراموۆ باياندادى. ونىڭ ايتۋىنشا، وڭىردە قۇرىلىس قارقىنى جوعارى. 2026 جىلى 408,4 مىڭ شارشى مەتر تۇرعىن ءۇيدى پايدالانۋعا بەرۋ جوسپارلانعان. قازىردىڭ وزىندە جالپى اۋدانى 961 مىڭ شارشى مەتردەن اساتىن تۇرعىن ءۇيدىڭ قۇرىلىسى جۇرگىزىلۋدە.
تۇرعىن ءۇي قۇرىلىسىمەن قاتار ينجەنەرلىك ينفراقۇرىلىمدى دامىتۋعا دا باسىمدىق بەرىلگەن. جالپى قۇنى 102 ملرد تەڭگەنى قۇرايتىن ينجەنەرلىك جەلىلەردى تارتۋ بويىنشا 25 جوبا جۇزەگە اسىرىلۋدا. ناتيجەسىندە 85 كوپقاباتتى تۇرعىن ءۇي مەن جەكە تۇرعىن ءۇي قۇرىلىسىنا ارنالعان 2,6 مىڭنان استام جەر ۋچاسكەسىن قاجەتتى ينفراقۇرىلىممەن قامتاماسىز ەتۋ كوزدەلگەن.
اسىرەسە، دەنساۋلىق ساقتاۋ جانە الەۋمەتتىك سالاداعى جوبالارعا ايرىقشا نازار اۋدارىلىپ وتىر.
«دەنساۋلىق ساقتاۋ سالاسىنداعى 2026 جىلدىڭ نەگىزگى ناتيجەلەرىنىڭ ءبىرى – قازاقستاندا بىرەگەي ءارى جالعىز بولىپ سانالاتىن گەماتولوگيا ورتالىعى قۇرىلىسىنىڭ اياقتالۋى»، – دەپ اتاپ ءوتتى رۋفات اكراموۆ.
بۇدان بولەك، جىل سوڭىنا دەيىن وسكەمەندە ونكولوگيا ورتالىعىنىڭ جاڭارتىلعان حيرۋرگيالىق كورپۋسىن پايدالانۋعا بەرۋ جوسپارلانعان. جوبانىڭ قۇنى – 3,5 ملرد تەڭگە. سونداي-اق، انا مەن بالا ورتالىعى بازاسىندا قۇنى 6,5 ملرد تەڭگە بولاتىن جاڭا پەرزەنتحانا اشىلادى. وڭىردە 300 ورىنعا ارنالعان، جالپى قۇنى 59,9 ملرد تەڭگەنى قۇرايتىن كوپبەيىندى اۋرۋحانانىڭ قۇرىلىسى دا جالعاسىپ جاتىر.
الداعى كەزەڭگە ارنالعان قۇرىلىس جوسپارىندا الەۋمەتتىك ماڭىزى جوعارى 25 جوبا بار. ءبىلىم بەرۋ سالاسىندا قاسىم قايسەنوۆ كەنتىندە، پراپورششيكوۆو اۋىلىندا، زايسان قالاسى مەن وسكەمەندە ءتورت مەكتەپتىڭ قۇرىلىسى باستالۋعا دايىن. تاعى جەتى مەكتەپ پەن ريددەر ماڭىنداعى قالا سىرتىنداعى بالالار لاگەرىنىڭ جوبالارى ازىرلەنىپ جاتىر.
سپورت پەن مادەنيەت سالاسىندا دا اۋقىمدى جوسپارلار بار. وبلىس ورتالىعىندا ۆولەيبول ورتالىعىنىڭ قۇرىلىسى ءجۇرىپ جاتىر، ۇستەل تەننيسى اكادەمياسىنىڭ قۇرىلىسى باستالدى. بۇدان بولەك، جابىق فۋتبول ستاديونىن، 10 مىڭ ورىندىق مۇز ارەناسىن جانە 1 500 ادامعا ارنالعان كونگرەسس-حولل سالۋ كوزدەلگەن.
ريددەر قالاسىنداعى سپورتتىق ينفراقۇرىلىم دا جاڭا نىساندارمەن تولىقپاق. مۇندا شاڭعى-روللەر تراسساسىن سالۋ، «سوكول» ستاديونىن جاڭارتۋ، جابىق حوككەي ءمودۋلىن ورناتۋ جانە شاڭعى ترامپليندەرىن دامىتۋ جوسپارلانعان.
وسىلايشا، شىعىس قازاقستان وبلىسىندا الداعى جالپىحالىقتىق اۋقىمدى قۇرىلىس جىلىنا دايىندىق تۇرعىن ءۇي كولەمىن ارتتىرۋمەن عانا شەكتەلمەيدى. ينجەنەرلىك جەلىلەردى دامىتۋ، مەديتسينالىق كومەكتىڭ قولجەتىمدىلىگىن جاقسارتۋ، ءبىلىم بەرۋ، سپورت جانە مادەنيەت نىساندارىن كوبەيتۋ ارقىلى ءوڭىردىڭ ينفراقۇرىلىمىن كەشەندى جاڭعىرتۋعا باسىمدىق بەرىلىپ وتىر.
