Qazaqstan Respublikasynyŋ Täuelsızdıgıne 35 jyldyǧyna orai Öskemen qalasynda merekelık daiyndyq jūmystary bastaldy.
Oblys ortalyǧynyŋ ǧimarattary men köşelerı, LED-ekrandary men körnektı oryndary memlekettık merekenıŋ mazmūnyn aişyqtaityn bezendırulermen tolyqtyrylyp jatyr. Qalanyŋ är bölıgınde kök bairaq pen eldık ruhty därıpteitın körnekı beineler paida bolyp, tūrǧyndar men qala qonaqtaryna erekşe merekelık köŋıl küi syilauda.
Qala köşelerınde Täuelsızdıkke arnalǧan körnekılıkter köbeidı
«Qazaqstan Täuelsızdıgıne 35 jyl» degen arnaiy jazuy bar merekelık bezendıruler oblys ortalyǧynyŋ bırqatar maŋyzdy aumaǧyna ornalastyrylǧan. Atap aitqanda, Respublika alaŋyndaǧy ülken LED-ekranda, Abai jäne Äuezov daŋǧyldary boiynda, Jeŋıs daŋǧylynda, Saǧadat Nūrmaǧambetov köşesınıŋ basynda jäne B. Aleksandrov atyndaǧy sport saraiynyŋ aldyndaǧy biık LED-ekranda el Täuelsızdıgınıŋ 35 jyldyǧyna arnalǧan beineler körsetılıp jatyr.
Sonymen qatar, merekelık bezendıruler Qazaqstan köşesınde, qalanyŋ sol jaǧalauyndaǧy Sätbaev daŋǧylynyŋ boiynda, oblystyq Halifa Altai meşıtı maŋyndaǧy jerüstı jaiau jürgınşıler ötkelınıŋ janynda da ornalastyrylǧan. Mūndai körnekılıkter şaǧyn audandardaǧy köpşılık jiı baratyn oryndar men qalanyŋ körıktı nüktelerın de qamtyp otyr. Osylaişa, Täuelsızdıktıŋ 35 jyldyǧyna arnalǧan merekelık bezendıruler tek ortalyq köşelermen şektelmei, şahardyŋ är bölıgınde körınıs tabuda. Būl maŋyzdy tarihi datanyŋ mänın qala keŋıstıgınde aiqyn sezınuge mümkındık beredı.
Kök bairaq – eldıktıŋ nyşany
Öskemen qalalyq äkımdıgınıŋ mälımetınşe, Täuelsızdıktıŋ 35 jyldyǧyna arnalǧan jūmystar jyl basynan berı kezeŋ-kezeŋımen jürgızılıp keledı. Sonyŋ ışınde qala tūrǧyndary men qonaqtary jiı jinalatyn Ertıs jaǧasyndaǧy amfiteatrda biıktıgı 35 metr bolatyn ülken Memlekettık Tu ornatyldy. Būl – el egemendıgınıŋ simvolyn asqaqtatyp, tarihi mereitoidyŋ mazmūnyn aişyqtaityn maŋyzdy nysandardyŋ bırı. Qalanyŋ körkın keltırıp tūrǧan Botpai tauyndaǧy alyp «Qazaqstan» jazuy, tau basyndaǧy ülken Memlekettık Tu, Eltaŋba men Änūranymyz da öŋırdıŋ eldık ruhyn tanytyp tūr. Būl nyşandar täuelsız memleket retınde qalyptasqan Qazaqstannyŋ jetıstıkterın, ūlttyq bıregeilıgı men bırlıgın paş etedı.
Būdan bölek, Ülbı jäne Ertıs özenderı arqyly ötetın köpırlerge, qala ortalyǧyndaǧy köpqabatty üilerdıŋ balkondaryna Memlekettık Tu ılıngen. Kök bairaqtyŋ qalanyŋ är tūsynda jelbıreuı merekelık atmosferany küşeitıp qana qoimai, täuelsızdık qūndylyǧyna degen qūrmettı de aiqyndai tüsedı.
35 jyldyq mereitoi – ötkenge taǧzym, bolaşaqqa baǧdar
Täuelsızdık – Qazaqstan halqynyŋ eŋ basty qūndylyǧy, eldıŋ derbes damu jolyn aiqyndaǧan tarihi beles. Osy jyldar ışınde memleketımız saiasi, ekonomikalyq jäne äleumettık baǧyttarda auqymdy özgerısterdı bastan ötkerıp, halyqaralyq arenada özındık orny bar elge ainaldy. Al Şyǧys Qazaqstan üşın būl kezeŋ öŋırdıŋ öndırıstık äleuetın saqtap, infraqūrylymyn jaŋǧyrtu, turizm men auyl şaruaşylyǧyn damytu, tūrǧyndardyŋ ömır sapasyn jaqsartu jolyndaǧy maŋyzdy belestermen sabaqtas.
Sondyqtan Täuelsızdıktıŋ 35 jyldyǧyna orai ūiymdastyrylyp jatqan bezendıru jäne nasihat jūmystarynyŋ maŋyzy erekşe. Olar merekenıŋ jaqyndaǧanyn bıldıretın körnekı şaralar ǧana emes, sonymen bırge jas ūrpaqtyŋ boiynda otansüigıştık sezımdı qalyptastyruǧa, memlekettık rämızderge qūrmettı arttyruǧa jäne el tarihyna degen qyzyǧuşylyqty küşeituge yqpal etedı. Kendı Altaidyŋ bas qalasy Öskemennıŋ merekege sai türlenuı – Täuelsızdıkke degen ortaq qūrmettıŋ körınısı. Qala köşelerındegı kök bairaqtar men LED-ekrandardaǧy merekelık beineler är tūrǧynǧa azat eldıŋ azamaty boludyŋ jauapkerşılıgı men maqtanyşyn sezındıredı. Aita keteiık, Qazaqstan Respublikasynyŋ Täuelsızdık künı 16 jeltoqsanda atap ötıledı. Biyl elımızdıŋ täuelsızdıgın jariialaǧanyna 35 jyl tolady.
