30 qazanda Taraz qalasynda «Qazaqstan Halyq Keŋesı turaly» Konstitusiialyq zaŋnyŋ negızgı erejelerın tüsındıruge arnalǧan seminar öttı.
Is-şaraǧa Qazaqstan Halyq Keŋesınıŋ ökılderı, etnomädeni bırlestıkterdıŋ, ükımettık emes ūiymdardyŋ jäne Jambyl oblysynyŋ azamattyq qoǧam instituttarynyŋ ökılderı qatysty. Seminar barysynda jaŋa konstitusiialyq organnyŋ mındetterı men ökılettıkterı, sondai-aq qoǧamdyq qūrylymdardyŋ onyŋ qyzmetıne qatysuynyŋ praktikalyq tetıkterı talqylandy.
Seminardy aşqan Jambyl oblysy äkımdıgınıŋ aqparat jäne qoǧamdyq damu basqarmasy basşysynyŋ orynbasary Quanyş Mamaşev jaŋa zaŋnyŋ erejelerın tüsındırudıŋ jäne öŋırdegı qoǧamdyq ūiymdarmen aldaǧy özara ıs-qimyl nysandaryn talqylaudyŋ maŋyzdylyǧyn atap öttı.
Negızgı baiandamany Qazaqstan Halyq Keŋesı Hatşylyǧynyŋ Etnomädeni bırlestıktermen özara ıs-qimyl bölımınıŋ meŋgeruşısı, Qoǧamdyq kelısım jäne jalpyūlttyq bırlık komitetı töraǧasynyŋ orynbasary Ǧalym Şoikin jasady. Ol Qazaqstan Halyq Keŋesın qūrudyŋ alǧyşarttary, onyŋ konstitusiialyq märtebesı men qyzmetınıŋ negızgı baǧyttary turaly baiandady.
Onyŋ aituynşa, Qazaqstan Halyq Keŋesınıŋ qyzmetı Qazaqstan halqy Assambleiasy men Ūlttyq qūryltaidyŋ ozyq täjıribelerınıŋ sabaqtastyǧyna negızdelgen. Būǧan deiın etnosaralyq beibıtşılık pen kelısımdı saqtau mäselelerıne basymdyq berılse, bügınde ortaq azamattyq bıregeilık pen jalpyūlttyq qūndylyqtardy nyǧaitu aldyŋǧy orynǧa şyǧyp otyr.
Ǧalym Şoikin etnomädeni bırlestıkterdıŋ maŋyzdylyǧy saqtalatynyn, sonymen qatar olardyŋ qoǧamdyq ömırge qatysu aiasy keŋeietının atap öttı. Endı olar öŋırlerdı damytu mäselelerınen bastap, äleumettık maŋyzy bar problemalardy şeşuge deiıngı jalpyūlttyq kün tärtıbın talqylauǧa belsendı qatysa alady.
Ol Qazaqstan Halyq Keŋesın qoǧam men memleket arasyndaǧy altyn köpır dep atady. Keŋestıŋ mındetı tek azamattardyŋ ötınışterın jinaumen şektelmeidı. Olardy ǧalymdar, beiındı mamandar men memlekettık organdardy tarta otyryp, saraptamalyq tūrǧydan zerdeleu, sonyŋ negızınde negızdelgen ūsynystar men ūsynymdar äzırleu közdelgen.
«Bügıngı bızdıŋ mındetımız – mäselenı ideialar men ūsynymdarǧa ainaldyryp, olardy memleketke jetkızetın altyn köpır bolu», – dedı Ǧalym Şoikin.
Sondai-aq ol öŋırlerde Qazaqstan Halyq Keŋesınıŋ filialdary qūrylmaitynyn tüsındırdı. Jergılıktı jerlerdegı özara ıs-qimyldyŋ negızgı tetıkterı retınde qoǧamdyq keŋester, mäslihattar, etnomädeni bırlestıkter, Dostyq üilerı jäne basqa da qoǧamdyq qūrylymdar aiqyndalǧan. Olardyŋ jūmysy jalǧasyp, jinaqtalǧan täjıribe odan ärı damytylady.
Qazaqstan Halyq Keŋesınıŋ müşesı Lugmar Bularov öz sözınde Konstitusiia men Konstitusiialyq zaŋda bekıtılgen organnyŋ qūqyqtyq märtebesıne toqtaldy. Onyŋ aituynşa, qoǧamdyq kelısım degenımız – pıkır qaişylyqtarynyŋ bolmauy emes. Onyŋ negızınde aşyq dialog, özara qūrmet, zaŋ talaptaryn saqtau jäne ortaq şeşım ızdeuge daiyn bolu qaǧidattary jatyr. Memleket pen qoǧam arasyndaǧy özara ıs-qimyldyŋ tiımdılıgı kezdesulerdıŋ sanymen emes, talqylaulardyŋ mazmūndylyǧymen jäne äzırlengen ūsynystardyŋ sapasymen ölşenedı.
Qazaqstan Halyq Keŋesınıŋ müşesı Farida Jünısova öŋırlık ūiymdardy Keŋes jūmysyna tartudyŋ praktikalyq tetıkterı turaly baiandady. Ol halyqtyŋ sūranysy eŋ aldymen jergılıktı jerlerde aiqyn körınetının atap ötıp, qoǧamdyq bırlestıkterdıŋ qatysuy formaldy sipatta bolmauy, al olardyŋ bastamalary şeşımder äzırleu barysynda eskerıluı qajettıgın aitty.
Ol özara ıs-qimyl alaŋdarynyŋ bırı retınde İ.V. Georgiadidıŋ jetekşılıgımen jūmys ısteitın Qazaqstan Halyq Keŋesı janyndaǧy «Bırlık» qoǧamdyq tobyn atady. Onyŋ qūramyna respublikalyq etnomädeni bırlestıkterdıŋ basşylary men öŋırlerdıŋ ökılderı engen.
Farida Jünısova bırlesken jūmystyŋ perspektivaly baǧyttary retınde jastardy qoǧamdyq ömırge tartu, azamattyq bastamalardy qoldau, memlekettık tıldı ılgerıletu, volonterlıktı jäne ekologiialyq mädeniettı damytu, patriottyq tärbie beru, tarihi mūrany saqtau men eldı mekenderdı abattandyru mäselelerın atap öttı.
Qazaqstan Halyq Keŋesınıŋ müşesı Narine Mikaelian Memleket basşysynyŋ Joldauynda köterılgen negızgı baǧyttarǧa, sonyŋ ışınde ekonomikany sifrlandyru, makroekonomikalyq tūraqtylyqty qamtamasyz etu jäne äleumettık saiasat mäselelerıne toqtaldy.
Ol Qazaqstan Halyq Keŋesı memlekettık organdardyŋ qyzmetın almastyrmaitynyn jäne olardyŋ qūzyretıne aralaspaitynyn atap öttı. Keŋes qoǧamdyq dialog jürgızuge jäne bastamalardy saraptamalyq tūrǧydan pysyqtauǧa arnalǧan alaŋ qalyptastyrady.
Sondai-aq Narine Mikaelian jaŋa Azamattyq kodekstı talqylauǧa qoǧam ökılderınıŋ qatysu mümkındıgı turaly aitty. Öŋır tūrǧyndarynan tüsken ūsynystar zaŋnamalyq bastamalardy odan ärı pysyqtauǧa jäne olardy Qūryltaidyŋ qarauyna engızuge negız bola alady.
Qazaqstan Halyq Keŋesınıŋ müşesı Uälihan Bolatbekūly qoǧamdyq mäselelerdı şeşude jüielı täsıldıŋ qajettılıgıne nazar audardy. Atap aitqanda, ol qoǧamdyq keŋesterdıŋ qūramyn qalyptastyru, olardy sailau tärtıbı, mäslihattarmen jäne etnomädeni bırlestıktermen özara ıs-qimyl mäselelerın köterdı.
Onyŋ aituynşa, qoǧam ökılderı Qazaqstan Halyq Keŋesınıŋ komitetterı jūmysyna qatysa alady. Osy oraida ol qatysuşylardy problemalardy aitumen ǧana şektelmei, olardy şeşudıŋ naqty joldaryn ūsynuǧa, sonyŋ ışınde zaŋnamany jetıldıru jönınde bastamalar köteruge şaqyrdy.
Talqylaudy jalǧastyrǧan Ǧalym Şoikin qoǧamdyq baqylaudyŋ maŋyzdylyǧyn atap öttı. Onyŋ pıkırınşe, qoǧamdyq baqylau jobalar aiaqtalǧannan keiın ǧana emes, olardy josparlau kezeŋınen, onyŋ ışınde tehnikalyq erekşelıkterdı äzırleu barysynda bastaluy tiıs.
Qatysuşylardyŋ sūraqtaryna jauap bergen Ǧalym Şoikin men Narine Mikaelian Qazaqstan Halyq Keŋesınıŋ arnaiy sifrlyq platformasyn äzırleu jūmystary turaly aqparat berdı. Platforma eŋ aldymen şaǧymdarǧa emes, azamattardyŋ qoǧamdyq maŋyzy bar ūsynystary men ideialaryna baǧyttalmaq.
Spikerlerdıŋ aituynşa, jaŋa platforma qoǧam üşın maŋyzdy mäselelerdı şeşuge baǧyttalǧan bastamalardy ūsynuǧa, olardyŋ qaralu barysyn baqylauǧa jäne nätijelerı turaly aqparat aluǧa mümkındık beredı.
Jasandy intellekt tehnologiialaryn paidalanu arqyly ūsynystar taqyryptyq baǧyttar boiynşa avtomatty türde jüielenıp, Qazaqstan Halyq Keŋesı müşelerıne olardyŋ käsıbi qūzyretıne säikes joldanady dep josparlanuda. Qazırgı uaqytta platforma äzırleu kezeŋınde.
Seminardy qorytyndylaǧan moderator Quanyş Mamaşev aitylǧan ūsynystar men köterılgen praktikalyq mäselelerdıŋ öŋırlık deŋgeide jūmysty odan ärı ūiymdastyru üşın maŋyzdy ekenın atap öttı.
