Türkıstan qalasynda qasiettı şahardyŋ tarihy, mädenietı, ruhani mūrasy men tarihi-tanymdyq qūndylyqtaryn jan-jaqty qamtyǧan «Türkıstan» ekı tomdyq ensiklopediiasynyŋ tūsaukeserı öttı, dep habarlaidy «Adyrna» tılşısı.
Qoja Ahmet Iаsaui atyndaǧy Halyqaralyq qazaq-türık universitetınde ötken saltanatty jiynǧa ǧalymdar, ziialy qauym ökılderı, qoǧam qairatkerlerı men ardagerler qatysty. Is-şara barysynda Türkıstan oblysynyŋ äkımı Nūralhan Köşerov öŋırdıŋ qazaq tarihyndaǧy erekşe ornyna toqtalyp, jaŋa basylymnyŋ tarihi jadymyzdy jaŋǧyrtudaǧy maŋyzyn atap öttı.
Oblys äkımınıŋ aituynşa, «Türkıstan» ensiklopediiasy alǧaş ret akademik Äbdımälık Nysanbaevtyŋ jetekşılıgımen jaryq körgen. Sodan berı ötken şirek ǧasyrdan astam uaqytta Türkıstan qalasy men öŋırınde auqymdy özgerıster oryn alyp, köptegen jaŋa ǧylymi derekter men zertteuler paida bolǧan. Osyǧan bailanysty ensiklopediia jaŋartylyp, mazmūny tolyqtyrylyp qaita äzırlengen.
Kıtaptyŋ tanystyrylymyn Qoja Ahmet Iаsaui atyndaǧy HQTU rektory Janar Temırbekova jürgızdı. Jiynda ensiklopediiany qūrastyruşylardyŋ bırı, tarih ǧylymdarynyŋ doktory, akademik Darhan Qydyrälı men ädebiettanuşy ǧalym, filologiia ǧylymdarynyŋ kandidaty Tūrdyqūl Şaŋbai eŋbektıŋ ǧylymi maŋyzy turaly baiandady. Sonymen qatar Türkiia Respublikasynyŋ Türkıstandaǧy Bas konsuly Levent Gürjan men oblystyq ardagerler keŋesınıŋ töraǧasy Jeŋısbek Mäulenqūlov jäne özge de ziialy qauym ökılderı söz söiledı.
Astana qalasyndaǧy «Ǧylym» baspasy äzırlegen 880 betten tūratyn ekı tomdyq basylym Türkıstan oblysy äkımdıgınıŋ qoldauymen jaryq körgen. Ensiklopediiada Türkıstan ūǧymy tek qala men oblys tarihymen ǧana şektelmei, tūtas türkı örkenietınıŋ tarihi-mädeni keŋıstıgı aiasynda qarastyrylǧan.
2021–2025 jyldary jüzege asqan jobaǧa 300-den astam ǧalymnyŋ zertteulerı men maqalalary engızılgen. Ensiklopediiada tört myŋnan astam atau men ūǧym qaita zerdelenıp, būryn ǧylymi ainalymǧa enbegen tūlǧalar, tarihi oqiǧalar, jer-su ataulary men ūǧymdar boiynşa jaŋa maqalalar daiyndalǧan.
Ekı tomdyq eŋbekte Türkıstan men jalpy Türkı älemınıŋ bırneşe myŋjyldyq tarihyna qatysty materialdar qamtylyp, ejelgı jäne ortaǧasyrlyq tarih, arheologiia, säulet önerı, etnografiia, ädebiet, folklor, ruhani mūra jäne tarihi tūlǧalar turaly ǧylymi-tanymdyq mälımetter älıpbilık tärtıppen jüielengen.
Basylym türlı-tüstı fotosurettermen, tarihi jäne geografiialyq kartalarmen, tarihi tūlǧalardyŋ portretterımen, arheologiialyq jäne säulet eskertkışterınıŋ beinelerımen tolyqtyrylǧan.
Aita keteiık, «Türkıstan» halyqaralyq ensiklopediiasynyŋ alǧaşqy nūsqasy 1998 jyly bır tom bolyp jaryq körgen edı. Jaŋa ekı tomdyq basylymda soŋǧy 28 jylda bolǧan maŋyzdy özgerıster, sonyŋ ışınde Türkıstan oblysynyŋ qūryluy men Türkıstan qalasynyŋ oblys ortalyǧy märtebesın aluy siiaqty tarihi oqiǧalar keŋınen körınıs tapqan.
