Jelide túrkistandyq ımamnyń meshit ájethanasyna kirmek bolǵan tazalyqqa jaýapty kommýnaldy sala jumysshylaryn qýyp shyqqan vıdeosy taraǵan edi. Oqıǵanyń mán-jaıy anyqtalyp, áıelge urysqan ımam emes, qarapaıym jumysshy ekeni belgili boldy, dep habarlaıdy «Adyrna» ulttyq portaly.
Áıeldi dinı orynnan qýyp shyqqan er adamnyń esimi Eseı Geruly. Ol ımam emes, aýla tazalyǵyna jaýapty qarapaıym meshit qyzmetkeri.
Onyń aıtýynsha, oqıǵa bir kún buryn bolǵan. Jumysshylar únemi ájethanaǵa kirip-shyǵýdy suraıdy eken. Alaıda, olar dárethana ishin taza ustamaıtyn kórinedi. Sol sebepti meshit qyzmetkeri olardyń bul áreketine shydamaı janjal shyǵarǵan.
«Barlyǵynan keshirim suraımyn. Men ımam emespin, qarapaıym adammyn, tek tazalyqqa jaýaptymyn. Keshe olar ájethanany bylǵaǵan soń eskertý jasadym. Islamda bári taza bolýy kerek. Men bul úshin eshqandaı jalaqy almaımyn. Taǵy da qaıtalap aıtamyn, men ımam emespin, tipti ustaz da emespin. Men munda jumys istemeımin. Mynaý Namazhana, bireýler kelip myna jerdiń múlkin búldiredi, qoqys tastaıdy, zattardy syndyrady. Mundaı jaǵdaılar keıde bolyp turady. Sol úshin aıqaıladym, sol úshin keshirim suraımyn. Endi qaıtalanbaıdy», - dedi Eseı Geruly.
Sondaı-aq ol QMDB men múftııat ókilderin aıyptaýǵa sebepker bolǵany úshin keshirim surady.
«Adyrna» ulttyq portaly
