Qazaq baspasözınıŋ qaraşaŋyraǧy sanalatyn «Egemen Qazaqstan» gazetı oqyrman sūranysyna orai arnaiy nömırdı qaita şyǧarady, dep habarlaidy "Adyrna".
24 betten tūratyn nömır «Etjeŋdı» dep atalady.
«Etjeŋdı» būǧan deiın gazettıŋ tūraqty jobalarynyŋ bırı retınde oqyrmanǧa ūsynylǧan. Jaŋǧyrǧan arnaiy şyǧarylymda tanymdyq, tarihi, ädebi-mädeni jäne äleumettık taqyryptar qamtylady. Negızgı maqsat – kündelıktı jaŋalyqtardan bölek, kölemdı zertteu men saraptamalyq materialdardy ūsynu.
Gazet ūjymynyŋ mälımetınşe, «Etjeŋdını» qaita şyǧaru turaly ūsynys öŋırlerdegı oqyrmandarmen kezdesuler kezınde aitylǧan tılekterden keiın qolǧa alynǧan.
«Egemen Qazaqstan» gazetınıŋ şef-redaktory Talǧat Batyrhan arnaiy nömırdıŋ alǧaşqy betınde jariialanǧan maqalasynda jobanyŋ erekşelıgıne toqtalǧan.
«Baspasözge jazyluǧa bailanysty ötetın jer-jerdegı kezdesulerde köpşılık tarapynan ädebi-mädeni, tarihi-tanymdyq sipattaǧy oqylymdy materialdardyŋ otauy ıspettı «Etjeŋdını» el bolyp kütudemız. Jaqsy dästür jalǧassa eken degen ötınıştı är kez estitınbız», – dep jazdy ol.
Jaŋarǧan arnaiy nömırde qoǧamdaǧy özektı mäseleler men Qazaqstan tarihyna qatysty zertteuler jariialanǧan.
Atap aitqanda, äue biletterınıŋ baǧasy, loukosterler saiasaty, Singapur men Vena qalalarynyŋ tūrǧyn üimen qamtu täjıribesı, otandyq kıtap naryǧynyŋ ekonomikasy jäne qazaqstandyq mamandar äzırlegen jasandy intellekt jobalary taldanǧan.
Sonymen qatar basylymda jazuşy Tölen Äbdıktıŋ ǧylym men zaiyrlylyq mäselelerıne arnalǧan filosofiialyq maqalasy, keŋestık atom süŋguır kemesın basqarǧan qazaq ofiserı Maidan Sälmenovtıŋ taǧdyry jäne HH ǧasyrdyŋ basynda Aqmolada jūmys ıstegen Qosşyǧūlovtardyŋ şokolad fabrikasy turaly zertteu ūsynylǧan.
Gazet basşylyǧyna Erjan Baitıles kelgennen keiın şyǧarmaşylyq ūjym merzımdı baspasözdı zamanaui talaptarǧa beiımdeuge basymdyq berıp otyr.
Redaksiia ökılderınıŋ aituynşa, sifrlyq keŋıstıkte qysqa aqparat kölemı artqanymen, baspasözdıŋ tereŋ taldau men sapaly saraptama ūsynatyn alaŋ retındegı maŋyzy saqtalady.
«Etjeŋdı» arnaiy nömırı būdan bylai aiyna bır ret jaryq körıp tūrady.
