Qazaqstannyń bilim berý salasyndaǵy mańyzdy basylymdardyń biri – «Qazaqstan muǵalimi» gazetine bıyl 90 jyl toldy, dep habarlaıdy “Adyrna” ulttyq portaly.
Basylym alǵash ret 1935 jyly «Tóte oqý» degen ataýmen jaryq kórip, mektep muǵalimderine, ózdiginen saýat ashýshylarǵa ádistemelik kómek kórsetýdi maqsat etti.
1939 jyly gazet ataýy «Saýatty bolýǵa kómekshi» bolyp ózgertilse, 1940 jyly Qazaqstanda latyn álipbıinen orys grafıkasyna kóshýge baılanysty «Jańa jazý» degen jańa ataýmen qaıta shyqty. 1952 jyly basylym qazirgi «Qazaqstan muǵalimi» ataýyn aldy. Osy kezeńnen bastap gazet aptasyna bir ret shyǵyp, muǵalimder men oqýshylarǵa arnalǵan túrli materıaldar jarııalaı bastady.
1956 jyldan bastap basylymda «Partııa», «Mektep», «Ǵylym jáne ádebıet» sııaqty bólimder paıda boldy. Sondaı-aq, «Ýchıtel Kazahstana» atty orys tilindegi nusqasy qatar jaryq kórdi. Gazette tek bilim berý máseleleri ǵana emes, muǵalimder men oqýshylardyń ózara qarym-qatynasy, sóıleý mádenıeti, ádep normalary jónindegi maqalalar da jarııalanyp otyrdy..
