Italııalyq Il Foglio basylymy tolyqtaı jasandy ıntellekt arqyly jazylǵan alǵashqy gazet nómirin shyǵardy, dep habarlaıdy "Adyrna" ulttyq portaly The Guardian-ǵa siltep.
Redaktor Klaýdıo Cherasanyń aıtýynsha, bul erekshe tájirıbe jasandy ıntellekt tehnologııalarynyń qazirgi jýrnalıstıkaǵa qalaı áser etetinin kórsetý úshin jasalǵan.
"Bul álemdegi alǵashqy kúndelikti gazet, ony tolyǵymen jasandy ıntellekt jazdy: maqalalar, taqyryptar, tipti pikirler men sarkazmǵa toly dáıeksózder de jasandy ıntellekttiń jumysy", — dedi Cherasa.
Arnaıy shyǵarylym 18 naýryzda jaryq kórdi jáne tórt betten turady. Ol qaǵaz jáne onlaın nusqada qoljetimdi.
Bul basylymda dástúrli jýrnalıstıkaǵa tán tereń taldaý, suhbattar men jeke pikirler joq. Jasandy ıntellekt tek faktilerdi usynýmen shekteldi. Jýrnalıster tek neırondyq jelige suraq qoıyp, onyń jaýaptaryn tekserip otyrdy.
Cherasa bul eksperımenttiń jańalyqtar jasaýda jasandy ıntellekttiń múmkindikterin baǵalaýǵa kómektesetinin atap ótti.
Aıta keteıik, bıyl Alem.ai halyqaralyq jasandy ıntellekt ortalyǵynyń ashylýy josparlanyp otyr.
