Batys Qazaqstan oblysynda halyqtyŋ tūrmys sapasyn arttyru jäne äleumettık infraqūrylymdy jaŋǧyrtu baǧytynda auqymdy jūmystar atqaryluda. 2023 jyldan berı öŋırde jalpy qūny 149,8 mlrd teŋgenı qūraityn 129 jaŋa äleumettık nysan salynyp, paidalanuǧa berıldı. Onyŋ ışınde 52 densaulyq saqtau, 38 bılım beru, 24 sport jäne 15 mädeniet nysany bar.
Densaulyq saqtau salasyna erekşe köŋıl bölınude. «Auylda densaulyq saqtaudy jaŋǧyrtu» ūlttyq jobasy aiasynda oblysta 50 medisinalyq nysan paidalanuǧa berılıp, josparlanǧan mındet tolyq oryndaldy. Sonymen qatar Kaztalov jäne Börlı audandarynda audanaralyq auruhanalardyŋ qūrylysy jalǧasuda. Jaŋa nysandar auyl tūrǧyndary üşın medisinalyq kömektıŋ qoljetımdılıgın arttyruǧa mümkındık beredı.
Salanyŋ kadrlyq äleuetı de nyǧaiyp keledı. Soŋǧy üş jylda oblysqa 450 därıger tartylyp, onyŋ 239-y auyldyq jerlerge jıberıldı. Biyl öŋırge kelgen 127 därıgerdıŋ 64-ı auyldarda eŋbek etude. Medisinalyq infraqūrylymdy jaŋǧyrtuǧa 13,3 mlrd teŋge bölınıp, 1259 zamanaui qūral-jabdyq satyp alyndy.
Öŋır medisinasyna jaŋa tehnologiialar da engızılude. Oralda telemedisina ortalyǧy ıske qosylyp, qaşyqtan konsultasiia beru mümkındıkterı keŋeitıldı. Sonymen qatar insulttı jedel diagnostikalauǧa kömektesetın CEREBRA.AI jasandy intellekt jüiesı engızıldı. Ol kompiuterlık tomografiia nätijelerın jedel taldauǧa kömektesıp, därıgerlerge emdeu taktikasyn uaqytyly anyqtauǧa mümkındık beredı.
Osylaişa, öŋırde jaŋa medisinalyq nysandar salumen qatar, kadrlyq äleuettı küşeitu, zamanaui jabdyqtarmen qamtu jäne sifrlyq tehnologiialardy engızu jūmystary qatar jürgızılude.
