İnvestisiia – auyl ekonomikasynyŋ qozǧauşy küşı. Al käsıpkerlıkke qoldau körsetu men jaŋa öndırısterge jol aşu – öŋırdıŋ tūraqty damuynyŋ kepılı.
Memleket basşysy Qasym-Jomart Toqaevtyŋ Qazaqstan halqyna Joldauynda aiqyndalǧan mındetter aiasynda Batys Qazaqstan oblysynyŋ Kaztalov audanynda «KAZTALOV-INVEST» II audandyq investisiialyq forumy öttı. Basqosudyŋ basty maqsaty – audannyŋ ekonomikalyq äleuetın tiımdı paidalanu, käsıpkerlık bastamalardy qoldau jäne auylǧa jeke investisiia tartu arqyly jaŋa mümkındıkterge jol aşu.
Forumǧa Batys Qazaqstan oblysy äkımınıŋ orynbasary Qaliiar Aitmūhambetov, audan äkımı Aslanbek Sarqūlov, audan prokurory Erlan Gaipov, oblystyq auyl şaruaşylyǧy basqarmasy basşysynyŋ orynbasary Rüstem Zūlqaşev, «AQJAIYQ» äleumettık-käsıpkerlık korporasiiasy töraǧasynyŋ orynbasary Janna Bekqalieva, «Damu» käsıpkerlıktı damytu qorynyŋ oblystyq filialynyŋ basşysy Taras Şalyga, «Agrarlyq nesie korporasiiasy» oblystyq filialynyŋ direktory Marat Sarseev, «Tehnoparkalgoritm» JŞS direktory Aisūlu Amanǧalieva, auyldyq okrug äkımderı, käsıpkerler, şarua qojalyqtarynyŋ jetekşılerı men būqaralyq aqparat qūraldarynyŋ ökılderı qatysty.
Jiynda investisiia tartu mäselesı ekonomikalyq ösımnıŋ ǧana emes, auyldyŋ bolaşaǧyn aiqyndaityn strategiialyq mındet retınde qarastyryldy. Öitkenı investisiia – jaŋa käsıporyn, jaŋa jūmys orny, tūraqty tabys pen tūrǧyndardyŋ tūrmys sapasyn jaqsartuǧa bastaityn naqty mümkındık.
Forumnyŋ aşyluynda söz söilegen oblys äkımınıŋ orynbasary Qaliiar Aitmūhambetov Memleket basşysynyŋ Joldauynda köterılgen mındetterdıŋ öŋır üşın maŋyzyna toqtalyp, investisiialyq ahualdy jaqsartu baǧytyndaǧy jūmystardy atap öttı.
– Memleket basşysy Qasym-Jomart Toqaev 2026 jylǧy 28 qazandaǧy Qazaqstan halqyna Joldauynda investisiia tartu jüiesın jetıldıru men jeke investisiialardy yntalandyruǧa nazar audaryp, sonyŋ ışınde auyl şaruaşylyǧy önımderın tereŋ öŋdeudı damytudyŋ jäne zamanaui tehnologiialardy engızudıŋ maŋyzdylyǧyn atap öttı. Būl baǧytta Batys Qazaqstan oblysynda da jüielı jūmystar jürgızılude. 2025 jyly negızgı kapitalǧa salynǧan investisiialar kölemı 893,4 mlrd teŋgenı qūrap, jospardan 52,4 mlrd teŋgege artyq oryndaldy. Al 2026 jyldyŋ alǧaşqy toǧyz aiynda būl körsetkış 539,5 mlrd teŋgege jettı. Bızdıŋ maqsatymyz – investisiia kölemın ūlǧaitumen qatar, jaŋa öndırıster aşu, tūraqty jūmys oryndaryn qūru jäne öŋır ekonomikasynyŋ äleuetın arttyru, – dedı Qaliiar Şadiiarūly.
Oblys äkımınıŋ orynbasary atap ötkendei, Kaztalov audanynyŋ investisiialyq mümkındıkterı mol. Äsırese, mal şaruaşylyǧy, et pen süt öndıru, mal azyǧyn daiyndau, auyl şaruaşylyǧy önımderın saqtau baǧyttary jaŋa jobalardy jüzege asyruǧa qolaily. Būl salalarǧa zamanaui tehnologiialardy engızu öndırıs tiımdılıgın arttyryp qana qoimai, auyl şaruaşylyǧy önımderınıŋ qosylǧan qūnyn ūlǧaituǧa mümkındık beredı.
Kaztalov audany üşın investisiia tartu – ekonomikany ärtaraptandyrudyŋ, käsıpkerlık belsendılıktı arttyrudyŋ jäne auyl tūrǧyndaryna jaŋa mümkındıkter ūsynudyŋ maŋyzdy tetıgı. Audannyŋ negızgı äleuetı auyl şaruaşylyǧymen tyǧyz bailanysty bolǧandyqtan, būl salada öndırıstı ūlǧaityp qana qoimai, önımdı tereŋ öŋdeu, saqtau jäne daiyn tauarǧa ainaldyru baǧyttaryna basymdyq beru qajet.
Forum barysynda audan prokurory Erlan Gaipov käsıpkerlık salasyna qatysty mäselelerdı qozǧady. Audan äkımınıŋ orynbasary Raşit Näsıpqaliūly Kaztalov audanynda käsıpkerlıktı damytu baǧytynda atqarylyp jatqan jūmystar men aldaǧy mındetterdı baiandady.
Sondai-aq oblystyq auyl şaruaşylyǧy basqarmasy basşysynyŋ orynbasary Rüstem Mülkaiūly öŋırdegı agrarlyq salanyŋ bügıngı jaǧdaiy men damu josparlaryna toqtaldy. «AQJAIYQ» ÄKK» AQ töraǧasynyŋ orynbasary Janna Palatqyzy käsıpkerlerge körsetıletın qoldau şaralaryn tüsındırse, «Damu» käsıpkerlıktı damytu qorynyŋ oblystyq filialynyŋ basşysy Taras Iаroslavūly käsıpkerlık bastamalardy qoldaudyŋ qarjylyq tetıkterı turaly aitty.
Al «Agrarlyq nesie korporasiiasy» AQ oblystyq filialynyŋ direktory Marat Ermekūly auyl şaruaşylyǧy salasyndaǧy jeŋıldetılgen nesielendıru men investisiialyq qarjylandyrudyŋ mümkındıkterın tanystyrdy.
Forumda täjıribelı käsıpkerler de söz alyp, öz jūmystarynyŋ qyr-syryn ortaǧa saldy. «Muslim» şarua qojalyǧynyŋ jetekşısı Mahambet Amanǧaliūly men «Bauyrlar NARM» şarua qojalyǧynyŋ jetekşısı Nūrlybai Joldybaiūly auyl şaruaşylyǧy salasyndaǧy täjıribelerımen bölıstı.
Forumnyŋ basty nätijesı – audan ekonomikasyn damytuǧa baǧyttalǧan naqty kelısımder. Basqosu aiasynda jalpy qūny 2 mlrd teŋgenı qūraityn 26 joba boiynşa memorandumdarǧa qol qoiyldy.
Būl Kaztalov audanynyŋ investisiialyq äleuetın arttyruǧa, jaŋa öndırısterdı qalyptastyruǧa jäne jūmys oryndaryn aşuǧa baǧyttalǧan maŋyzdy qadam. Alaida investisiialyq kelısımderdıŋ şynaiy qūny olardyŋ qaǧaz jüzınde qalmai, naqty ıske asuymen ölşenedı. Sondyqtan aldaǧy kezeŋde jobalardyŋ jüzege asuyn qamtamasyz etu, käsıpkerlerge qoldau körsetu jäne belgılengen mındetterdıŋ oryndaluyn jüielı baqylau erekşe maŋyzǧa ie.
Audan äkımı Aslanbek Sarqūlov forumnyŋ qorytyndysynda investisiia tartu men käsıpkerlıktı qoldau audan damuynyŋ basym baǧyttarynyŋ bırı ekenın atap öttı
– Bügıngı «KAZTALOV-INVEST» II audandyq investisiialyq forumy öz maqsatyna jetıp, naqty nätijelerge jol aşty dep senımmen aita alamyz. Forum aiasynda audan ekonomikasyn ılgerıletuge baǧyttalǧan jalpy qūny 2 mlrd teŋgenı qūraityn 26 jobaǧa qol qoiyldy. Būl – audanymyzdyŋ investisiialyq äleuetın arttyruǧa, jaŋa jūmys oryndaryn aşuǧa jäne tūrǧyndardyŋ äl-auqatyn jaqsartuǧa mümkındık beretın maŋyzdy qadam. Memleket basşysy atap ötkendei, auyldyq aumaqtardy damytuda jeke investisiia tartu men käsıpkerlıktı qoldaudyŋ maŋyzy zor. Osy baǧyttaǧy jūmysymyzdyŋ nätijesı bügıngı qol qoiylǧan kelısımdermen ǧana ölşenbeidı. Eŋ bastysy – bastamalardyŋ naqty ıske asuy, jobalardyŋ jüzege asuy jäne el igılıgıne qyzmet etuı! Audannyŋ örkendeuı – ortaq jauapkerşılıktıŋ jemısı. Sondyqtan käsıpkerlermen ärıptestıktı nyǧaityp, investisiialyq jobalardy jüielı qoldauǧa jäne olardyŋ oryndaluyna basa män beremız. Bügıngı forumǧa qatysyp, audannyŋ damuyna üles qosuǧa niet bıldırgen barşa käsıpkerler men investorlarǧa alǧys aitamyn. Bırlesken eŋbegımızdıŋ nätijesınde Kaztalov audanynyŋ ekonomikasy nyǧaiyp, jaŋa mümkındıkterge jol aşylady dep senemın, – dedı audan äkımı.
Kelelı basqosuda audanymyzdyŋ investisiialyq äleuetın arttyruǧa üles qosqan azamattar audan äkımınıŋ alǧys hatymen marapattaldy.
Forum aiasynda memlekettık baǧdarlamalardyŋ igılıgın körıp otyrǧan azamattardyŋ jäne öz qarajaty esebınen auyl şaruaşylyǧynyŋ damuyna üles qosyp jürgen käsıpkerlerdıŋ önımderı körmege qoiyldy. Körme jergılıktı öndırıstıŋ mümkındıkterın tanystyryp, auyl käsıpkerlerınıŋ eŋbegı men ızdenısın körsetuge mümkındık berdı.
Auyldyŋ örkendeuı tek biudjet qarajaty men memlekettık baǧdarlamalarǧa ǧana bailanysty emes. Oǧan jeke käsıpkerdıŋ bastamasy, tuǧan jerge degen janaşyrlyǧy, jaŋa ıs bastauǧa degen batyldyǧy da tıkelei yqpal etedı. Sondyqtan auylǧa investisiia tartu – ekonomikalyq körsetkışterdı arttyrumen qatar, jergılıktı halyqtyŋ äleuetın aşuǧa, jastardy jūmyspen qamtuǧa jäne auyldyŋ keleşegıne senım qalyptastyruǧa baǧyttalǧan ıs.
Memleket basşysynyŋ Joldauynda köterılgen mındetterdı jüzege asyruda osyndai jergılıktı bastamalardyŋ orny erekşe. İnvestisiiaǧa qolaily jaǧdai jasau, käsıpkerlerdıŋ qūqyqtary men müddelerın qorǧau, qarjylandyru tetıkterınıŋ qoljetımdılıgın arttyru jäne öndırıstık jobalardyŋ ıske asuyna qoldau körsetu – ortaq maqsatqa bastaityn maŋyzdy qadamdar.
«KAZTALOV-INVEST» II audandyq investisiialyq forumy osy baǧyttaǧy jūmysty jaŋa deŋgeige köteruge negız qalady.
2027 jylǧa josparlanǧan investisiialyq jobalar auyl şaruaşylyǧy, mal şaruaşylyǧy önımderın öndıru jäne öŋdeu, sauda men qyzmet körsetu, qoǧamdyq tamaqtandyru, turizm, sport jäne infraqūrylymdy damytu baǧyttaryn qamtidy.
Atap aitqanda, mal bordaqylau alaŋdaryn salu, mal soiu jäne et öŋdeu nysandaryn aşu, ırı qara mal basyn köbeitu, balyq şaruaşylyǧyn damytu, jemşöp daqyldaryn egu, naubaihana aşu, sauda ortalyǧy men sauda üiın salu, biznes ortalyǧyn aşu, kafe, ashana, meiramhana jäne qonaq üi qyzmetterın ūiymdastyru, jaǧajai demalys ornyn qūru, sport keşenı men qoǧamdyq monşa salu, sondai-aq avtobölşekter saudasyn damytu közdelgen. Endıgı mındet – osy bastamalardy jüielı jüzege asyryp, investisiiany jaŋa jūmys oryndaryna, öndırıs kölemınıŋ ösuıne jäne halyqtyŋ äl-auqatynyŋ artuyna ainaldyru.
Asylbek NÄSIPQALİŪLY
