Astanada jasandy intellekt kömegımen tüsırılgen filmderge arnalǧan Astana AI Film Festival halyqaralyq kinofestivalı ötedı. Biyl baiqauǧa älemnıŋ 125 elınen 8 myŋnan astam film ūsynylǧan. Qazaqstan 829 tuyndymen qatysuşy elder arasynda ekınşı orynǧa şyqty.
Festivaldıŋ negızgı maqsaty – jasandy intellekt mümkındıkterın paidalana otyryp jasalǧan filmderdı tanytu, jaŋa esımderge jol aşu jäne Qazaqstan kinoindustriiasyn halyqaralyq deŋgeide körsetu.
Baspasöz konferensiiasynda Astana AI Film Festival-dıŋ teŋ qūryltaişysy ärı keŋes töraǧasy Almas Jali Qazaqstannyŋ özın älemge tanytuy maŋyzdy ekenın aitty.
«Eger özımızdı tanytpasaq, özgeler bızdı “Boratpen” tanyta beredı. Sondyqtan Qazaqstan turaly äŋgımenı özımız aituymyz kerek. Ol üşın kino, mädeniet jäne zamanaui tehnologiialar ülken mümkındık beredı», – dedı Almas Jali.
Onyŋ būl pıkırın şeteldık spiker Baladji Srinivasanu da qoldady. Sūraq-jauap kezınde ol Qazaqstannyŋ öz tarihyn, mädenietın jäne qazırgı kelbetın älemge özı tanystyruy qajet ekenın atap öttı. Spikerdıŋ aituynşa, el turaly syrttan qalyptasqan stereotipterdı özgertu üşın sapaly ärı mazmūndy şyǧarmalar kerek.
Almas Jali qazaqstandyq kreatorlardyŋ halyqaralyq avtorlardan şyǧarmaşylyq tūrǧyda kem tüspeitının de atap öttı.
«Qazaqstandyq kreatorlardyŋ filmderın AQŞ, Qytai, Koreia jäne basqa elderdıŋ jūmystarymen salystyrǧanda, olardyŋ ideiasy men şyǧarmaşylyq deŋgeiı eş kem emes ekenın köruge bolady. Sondyqtan Qazaqstannan da jeŋımpazdar şyǧady dep ümıttenemız. Degenmen soŋǧy şeşımdı halyqaralyq qazylar alqasy qabyldaidy», – dedı ol.
Prodiuserdıŋ aituynşa, jaqynda jaryqqa şyǧatyn «Jetı qaraqşy» filmı Qazaqstandaǧy eŋ qymbat jeke kino jobalarynyŋ bırı bolmaq. Tuyndynyŋ şamamen 25 paiyzy jasandy intellekt kömegımen jasalǧan. Filmnıŋ montaj jūmystaryna üş ai uaqyt ketken.
Astana AI Film Festival siiaqty halyqaralyq alaŋdar Qazaqstan kinoindustriiasyn älemge tanytuǧa mümkındık beredı. Jasandy intellekt būl üderıstı jedeldetıp, qazaqstandyq avtorlarǧa jaŋa şyǧarmaşylyq qūral ūsynyp otyr.
Festivalde jasandy intellekttıŋ dästürlı kino öndırısıne yqpaly da söz boldy. Almas Jali aldaǧy jyldary dästürlı tüsırılım men AI kömegımen jasalǧan körınısterdıŋ arasyndaǧy aiyrmaşylyq azaia tüsetının aitty.
«Qazırdıŋ özınde keibır kadrlardy dästürlı kino tüsırılımınen ajyratu qiyn. Al aldaǧy ekı-üş jylda platformalar men tehnologiialardyŋ damuymen būl aiyrmaşylyq odan ärı azaiady dep oilaimyn. Jasandy intellekt kino industriiasyndaǧy qalyptasqan monopoliialardy özgertuı mümkın», – dedı keŋes töraǧasy.
Biyl baiqauǧa eŋ köp film AQŞ-tan – 1 396 jūmys tüsken. Qazaqstan 829 filmmen ekınşı orynda tūr. Üşınşı orynda – 705 jūmyspen Ündıstan. Odan keiın Qytai – 479, Oŋtüstık Koreia – 355 filmmen ornalasqan.
Festivaldıŋ jalpy jülde qory – 2 mln AQŞ dollary. Onyŋ 1 mln dollary baiqau jüldelerıne, taǧy 1 mln dollary jaŋa AI-jobalardy öndıruge baǧyttalady. Negızgı baiqaudaǧy bas jülde – 450 myŋ dollar.
Astana AI Film Festival 1–3 qazan aralyǧynda Astanada ötedı. Üş künge josparlanǧan kino merekesı aiasynda jasandy intellekt kömegımen tüsırılgen üzdık filmder körermen nazaryna ūsynylyp, avtorlarmen kezdesuler ūiymdastyrylady. Sondai-aq festival soŋynda halyqaralyq baiqaudyŋ jeŋımpazdary anyqtalyp, marapattau räsımı ötedı.
