استانادا جاساندى ينتەللەكت كومەگىمەن تۇسىرىلگەن فيلمدەرگە ارنالعان Astana AI Film Festival حالىقارالىق كينوفەستيۆالى وتەدى. بيىل بايقاۋعا الەمنىڭ 125 ەلىنەن 8 مىڭنان استام فيلم ۇسىنىلعان. قازاقستان 829 تۋىندىمەن قاتىسۋشى ەلدەر اراسىندا ەكىنشى ورىنعا شىقتى.
فەستيۆالدىڭ نەگىزگى ماقساتى – جاساندى ينتەللەكت مۇمكىندىكتەرىن پايدالانا وتىرىپ جاسالعان فيلمدەردى تانىتۋ، جاڭا ەسىمدەرگە جول اشۋ جانە قازاقستان كينويندۋسترياسىن حالىقارالىق دەڭگەيدە كورسەتۋ.
ءباسپاسوز كونفەرەنتسياسىندا Astana AI Film Festival-ءدىڭ تەڭ قۇرىلتايشىسى ءارى كەڭەس توراعاسى الماس جالي قازاقستاننىڭ ءوزىن الەمگە تانىتۋى ماڭىزدى ەكەنىن ايتتى.
«ەگەر ءوزىمىزدى تانىتپاساق، وزگەلەر ءبىزدى “بوراتپەن” تانىتا بەرەدى. سوندىقتان قازاقستان تۋرالى اڭگىمەنى ءوزىمىز ايتۋىمىز كەرەك. ول ءۇشىن كينو، مادەنيەت جانە زاماناۋي تەحنولوگيالار ۇلكەن مۇمكىندىك بەرەدى»، – دەدى الماس جالي.
ونىڭ بۇل پىكىرىن شەتەلدىك سپيكەر بالادجي سرينيۆاسانۋ دا قولدادى. سۇراق-جاۋاپ كەزىندە ول قازاقستاننىڭ ءوز تاريحىن، مادەنيەتىن جانە قازىرگى كەلبەتىن الەمگە ءوزى تانىستىرۋى قاجەت ەكەنىن اتاپ ءوتتى. سپيكەردىڭ ايتۋىنشا، ەل تۋرالى سىرتتان قالىپتاسقان ستەرەوتيپتەردى وزگەرتۋ ءۇشىن ساپالى ءارى مازمۇندى شىعارمالار كەرەك.
الماس جالي قازاقستاندىق كرەاتورلاردىڭ حالىقارالىق اۆتورلاردان شىعارماشىلىق تۇرعىدا كەم تۇسپەيتىنىن دە اتاپ ءوتتى.
«قازاقستاندىق كرەاتورلاردىڭ فيلمدەرىن اقش، قىتاي، كورەيا جانە باسقا ەلدەردىڭ جۇمىستارىمەن سالىستىرعاندا، ولاردىڭ يدەياسى مەن شىعارماشىلىق دەڭگەيى ەش كەم ەمەس ەكەنىن كورۋگە بولادى. سوندىقتان قازاقستاننان دا جەڭىمپازدار شىعادى دەپ ۇمىتتەنەمىز. دەگەنمەن سوڭعى شەشىمدى حالىقارالىق قازىلار القاسى قابىلدايدى»، – دەدى ول.
پروديۋسەردىڭ ايتۋىنشا، جاقىندا جارىققا شىعاتىن «جەتى قاراقشى» ءفيلمى قازاقستانداعى ەڭ قىمبات جەكە كينو جوبالارىنىڭ ءبىرى بولماق. تۋىندىنىڭ شامامەن 25 پايىزى جاساندى ينتەللەكت كومەگىمەن جاسالعان. ءفيلمنىڭ مونتاج جۇمىستارىنا ءۇش اي ۋاقىت كەتكەن.
Astana AI Film Festival سياقتى حالىقارالىق الاڭدار قازاقستان كينويندۋسترياسىن الەمگە تانىتۋعا مۇمكىندىك بەرەدى. جاساندى ينتەللەكت بۇل ۇدەرىستى جەدەلدەتىپ، قازاقستاندىق اۆتورلارعا جاڭا شىعارماشىلىق قۇرال ۇسىنىپ وتىر.
فەستيۆالدە جاساندى ينتەللەكتتىڭ ءداستۇرلى كينو وندىرىسىنە ىقپالى دا ءسوز بولدى. الماس جالي الداعى جىلدارى ءداستۇرلى ءتۇسىرىلىم مەن AI كومەگىمەن جاسالعان كورىنىستەردىڭ اراسىنداعى ايىرماشىلىق ازايا تۇسەتىنىن ايتتى.
«قازىردىڭ وزىندە كەيبىر كادرلاردى ءداستۇرلى كينو تۇسىرىلىمىنەن اجىراتۋ قيىن. ال الداعى ەكى-ءۇش جىلدا پلاتفورمالار مەن تەحنولوگيالاردىڭ دامۋىمەن بۇل ايىرماشىلىق ودان ءارى ازايادى دەپ ويلايمىن. جاساندى ينتەللەكت كينو يندۋسترياسىنداعى قالىپتاسقان مونوپوليالاردى وزگەرتۋى مۇمكىن»، – دەدى كەڭەس توراعاسى.
بيىل بايقاۋعا ەڭ كوپ فيلم اقش-تان – 1 396 جۇمىس تۇسكەن. قازاقستان 829 فيلممەن ەكىنشى ورىندا تۇر. ءۇشىنشى ورىندا – 705 جۇمىسپەن ءۇندىستان. ودان كەيىن قىتاي – 479, وڭتۇستىك كورەيا – 355 فيلممەن ورنالاسقان.
فەستيۆالدىڭ جالپى جۇلدە قورى – 2 ملن اقش دوللارى. ونىڭ 1 ملن دوللارى بايقاۋ جۇلدەلەرىنە، تاعى 1 ملن دوللارى جاڭا AI-جوبالاردى وندىرۋگە باعىتتالادى. نەگىزگى بايقاۋداعى باس جۇلدە – 450 مىڭ دوللار.
Astana AI Film Festival 1–3 قازان ارالىعىندا استانادا وتەدى. ءۇش كۇنگە جوسپارلانعان كينو مەرەكەسى اياسىندا جاساندى ينتەللەكت كومەگىمەن تۇسىرىلگەن ۇزدىك فيلمدەر كورەرمەن نازارىنا ۇسىنىلىپ، اۆتورلارمەن كەزدەسۋلەر ۇيىمداستىرىلادى. سونداي-اق فەستيۆال سوڭىندا حالىقارالىق بايقاۋدىڭ جەڭىمپازدارى انىقتالىپ، ماراپاتتاۋ ءراسىمى وتەدى.
