Qazaqstan Prezıdenti Nursultan Nazarbaevtyń tóraǵalyǵymen Birikken Ulttar Uıymy Qaýipsizdik Keńesiniń "Jappaı qyryp-joıatyn qarýdy taratpaý: senim sharalary" atty otyrysy ótti, - dep habarlaıdy Aqorda baspasózi.
Jıyndy ashqan Memleket basshysy otyrysqa qatysqany úshin Birikken Ulttar Uıymynyń Bas hatshysy A.Gýterrıshke, Polsha Respýblıkasynyń Prezıdenti A.Dýdaǵa jáne BUU Qaýipsizdik Keńesine múshe basqa da elderdiń delegaııa basshylaryna rızashylyq bildirdi.
"Múmkindikti paıdalana otyryp, Prezıdent Dýdany Polshanyń Birikken Ulttar Uıymy Qaýipsizdik Keńesiniń turaqty emes múshesi retindegi qyzmetiniń bastalýymen quttyqtaımyn. Sonymen birge, Kot-d’Ivýar, Kýveıt, Perý jáne Ekvatorlyq Gvıneıany da bıyl Qaýipsizdik Keńesiniń turaqty emes múshesi bolýymen quttyqtaımyn. Jahandyq uıymnyń osy mańyzdy organy aıasynda yntymaqtastyq pen yqpaldastyq tanytyp, birlese jemisti jumys isteımiz dep úmittenemin", - dedi Qazaqstan Prezıdenti.
Nursultan Nazarbaev bekitilgen kún tártibine sáıkes, sózdi BUU-nyń Bas hatshysy A.Gýterrıshke berdi.
Gýterrıshtiń baıandamasynan keıin Memleket basshysy Keńes múshelerine arnap málimdeme jasady.
"Biz Qazaqstannyń Birikken Ulttar Uıymy Qaýipsizdik Keńesiniń turaqty emes múshesi bolyp saılanýyn jáne búgingi tóraǵalyq qyzmetimizdi álemdik qoǵamdastyqtyń elimizge jáne onyń beıbitshil saıasatyna degen senimi dep bilemiz. Bul mártebeli qyzmettegi Ortalyq Azııanyń birinshi memleketi bola otyryp, biz Dúnıejúzilik uıymnyń bul mańyzdy organyndaǵy óńir halyqtarynyń "únine" aınaldyq, - dedi Qazaqstan Prezıdenti.
Nursultan Nazarbaev Qazaqstannyń BUU Qaýipsizdik Keńesi jumysyna ótken jylǵy qosqan úlesin atap ótti.
"Aýǵanstan/"Talıban", ILIM/DAISh, "ál-Kaıda" jáne Somalı/Erıtreıa jónindegi komıtetterdi basqara otyryp, olardyń jemisti qyzmet etýine óz úlesimizdi qosyp kelemiz. Keńestiń barlyq múshe-memleketterine berik yntymaqtastyǵy úshin rızashylyǵymdy bildiremin", - dedi Memleket basshysy.
Qazaqstan Prezıdenti beıbitshilik pen qaýipsizdikke qol jetkizý jolyndaǵy senim sharalary shıelenistiń aldyn alý jáne mańyzdy jahandyq problemalardy sheshý kezinde negizgi ról atqaratynyn aıtty.
"Men Birikken Ulttar Uıymy Bas Assambleıasynyń 47-shi sessııasynyń minberinen Azııadaǵy qaýipsizdik jáne senim sharalary jónindegi óńirlik qurylym qurý týraly usynys aıtqan bolatynmyn. Tynymsyz dıplomatııalyq jumystyń nátıjesinde bul mehanızmdi qurýǵa qol jetkizildi. Búginde Azııadaǵy ózara yqpaldastyq jáne senim sharalary keńesi óńirdegi 26 memleketti biriktirip, tabysty jumys isteýde. Shırek ǵasyrdan keıin taǵy da Birikken Ulttar Uıymynda Qaýipsizdik Keńesiniń turaqty emes múshesi retinde Qazaqstannyń atynan sóz sóılep turmyn", - dedi Nursultan Nazarbaev.
Memleket basshysy senim sharalaryn kún tártibinen túsirmeý qajettigin aıtyp, buǵan yqpal etetin birneshe faktordy atap ótti.
Qazaqstan Prezıdenti Iadrolyq qarýdy taratpaý týraly shartqa negizdelgen qarýdy taratpaý rejimin nyǵaıtý máselesinde tereń mentaldi ózgerister men kópjaqty jańa saıası sheshimder qajet ekenin aıtty.
Osyǵan baılanysty Nursultan Nazarbaev qarýdy taratpaý salasyndaǵy senimdi nyǵaıta túsýge baǵyttalǵan birqatar sharalardy usyndy.
Sońynda Memleket basshysy qaqtyǵystardy tıimdi sheshý úshin álemdik ıadrolyq derjavalar arasynda ózara túsinistik pen ózara senim ornatýdyń mańyzdylyǵyna nazar aýdardy.
"Álemdik qoǵamdastyq - alýan túrli jáne kóp qyrly sıpaty arqyly kúsheıe túsken birtutas organızm. Ol jer betindegi ulttar men halyqtar arasynda teńgerim men úılesim bolǵan kezde ǵana alǵa basyp, damı alady. Sol sebepti, biz halyqaralyq quqyq ústemdigine negizdelgen qaýipsiz álem men ádiletti álemdik tártipke birlese qol jetkizýimiz kerek. Bul iste Birikken Ulttar Uıymy Qaýipsizdik Keńesiniń róli zor jáne oǵan tarıhı mıssııa júkteletini de sózsiz", - dedi Qazaqstan Prezıdenti.
Sondaı-aq, Keńes otyrysy barysynda Polsha Prezıdenti A.Dýda, Kýveıt premer-mınıstriniń orynbasary – Syrtqy ister mınıstri Sheıh Sabah Haled Ál-Sabah jáne Reseı Federaııasynyń Syrtqy ister mınıstri Lavrov sóz sóıledi.
tengrinews.kz
