Túrkimenstan bıligi Aýǵanstanǵa halqyna gýmanıtarlyq kómek bergen. Júkti 2 mamyrda Akına portynda aýǵandarǵa tapsyrylǵan. Biraq gýmanıtarlyq kómekti "Talıban" qozǵalysynyń sodyrlary tartyp alǵan. Bul týraly centralasian.org habarlaıdy.
Túrkimenstan gýmanıtarlyq kómekti Akına portyna deıin júk kólikterimen jetkizdi. Azyq-túlikti sol jerde aýǵan júk kólikteri Maımana qalasyna qaraı alyp shyqqan. Kómek Maımana qalasy men soǵan jaqyn aımaqtarda turatyn halyqqa taratylýy tıis edi. Biraq jolda júk kólikterin "Talıban" qozǵalysynyń sodyrlary toqtatyp, kómekti tartyp alǵan.
"Biz ony kedeılerge taratýymyz kerek edi. Azyq-túlik "Talıban" baqylaýyndaǵy aýyldarǵa da berilip júrgen. Biraq gýmanıtarlyq júkti sodyrlar tartyp aldy", - dedi Aýǵanstannyń Farıab ýálaıatynyń basshysy Nakıbýlla Faııp.
Onyń aıtýynsha, júkterdiń bir bóligin sodyrlar ózderiniń áskerı lagerine aparǵan. Al tórt júk kóligin kún astyna qoıyp qoıǵan. Olardyń birinde jemis-jıdek, jumyrtqa bar.
"Talıbannyń" bul áreketi qylmyspen teń. Áıelder men balalar kómek kútip otyr. Tálipter azyq-túlikti halyqqa taratpaı, bizdi de jolatpaı otyr", - dedi Faııp.
Jergilikti keńestegi depýtattar "Talıban" qozǵalysynyń ókilderimen kelissóz júrgizýge barǵan. Olar gýmanıtarlyq kómekti halyqqa taratýyn suraǵan. Jergilikti aqsaqaldar da ótinish jasaǵan. Biraq "Talıban" olarǵa qulaq aspaı otyr.
