Qyrǧyzstan prezidentı Sadyr Japarov 2027 jyldyŋ 27 qaŋtarynda ötetın prezident sailauyna qatysty jarlyqqa qol qoidy. Endı mūǧalımder men studentterdı sailaualdy ügıt-nasihat jūmystaryna tartuǧa bolmaidy, dep habarlaidy «Adyrna» tılşısı 24.kg basylymyna sılteme jasap.
Qūjatqa säikes, kandidattardyŋ paidasyna ügıt-nasihat jürgızuge mūǧalımderdı, oquşylardy, oqytuşylardy, studentterdı, medisina qyzmetkerlerın, äleumettık sala mamandaryn jäne memlekettık ärı munisipaldyq ūiymdardyŋ özge de qyzmetkerlerın tartuǧa tyiym salynady.
Ministrler kabinetıne zaŋsyz ügıt-nasihatqa qatysqan nemese qyzmettık jaǧdaiyn kandidattardyŋ müddesıne paidalanǧan lauazymdy tūlǧalardy tärtıptık jauapkerşılıkke tartu tapsyryldy. Qajet bolǧan jaǧdaida mūndai basşylar men qyzmetkerler qyzmetınen bosatylady.
«Jarlyq memlekettık jäne munisipaldyq organdardyŋ sailau prosesıne aralasuyna, sondai-aq äkımşılık resurstardy paidalanuǧa jol bermeuge baǧyttalǧan. Ortalyq sailau komissiiasyna zaŋnamany bırızdı qoldanu jäne azamattardy aqparattandyru boiynşa qosymşa şaralar qabyldau ūsynyldy. Qūjatta Qyrǧyzstan zaŋnamasyna säikes halyqaralyq baiqauşylardyŋ qatysuy da qarastyrylǧan», – delıngen habarlamada.
Eske salsaq, şamamen bır ai būryn Sadyr Japarov 2027 jylǧy qaŋtarda ötetın prezident sailauyna qatysatynyn resmi türde rastaǧan bolatyn.
