Täjıkstan prezidentı Emomali Rahmon 13 nauryzda tūŋǧyş ret memlekettık saparmen Qyrǧyzstanǧa saparlady. Būl turaly Qyrǧyzstan prezidentınıŋ baspasöz qyzmetı mälımdedı, dep habarlaidy "Adyrna" ūlttyq portaly.
Täjıkstan köşbasşysyn Bışkektegı «Manas» halyqaralyq äuejaiynda Qyrǧyzstan prezidentı Sadyr Japarov qarsy aldy.
«Ūlttyq kiımdegı qyzdar Emomali Rahmondy gül şoqtarymen qarsy aldy. Memleket basşylaryna qyrǧyz jäne täjık önerpazdary oryndaǧan muzykalyq şyǧarmalar ūsynylǧan konserttık baǧdarlama körsetıldı», – delıngen resmi habarlamada.
Memlekettık sapar aiasynda ekı el basşylary ekıjaqty yntymaqtastyqty damytu jäne maŋyzdy mäselelerdı talqylaidy. Sondai-aq bırneşe ekıjaqty kelısımderge qol qoiylady dep josparlanǧan.
Qyrǧyzstan prezidentı äkımşılıgınıŋ syrtqy saiasat bölımınıŋ jetekşısınıŋ mälımdeuınşe, Emomali Rahmonnyŋ sapary barysynda Qyrǧyzstan men Täjıkstan arasyndaǧy memlekettık şekara turaly kelısımge qol qoiylady.
Aita keteiık, 21 aqpanda Bışkekte ötken Qyrǧyzstan men Täjıkstan ükımettık delegasiialarynyŋ bırlesken otyrysynda şekara mäselesı boiynşa tüpkılıktı hattamaǧa qol qoiylǧan bolatyn.
Ūqsas jaŋalyqtar
