Almaty oblysynda jas jıgıttıŋ ölımıne qatysty qylmystyq ıs qozǧaldy, dep habarlaidy "Adyrna" ūlttyq portaly.
Būl turaly oblystyq polisiia departamentı mälımdedı.
Äleumettık jelılerde taraǧan aqparatqa säikes, 11 mamyr künı marqūmdy bırge biznes aşqan serıktesı aqşaǧa bailanysty janjal kezınde aiausyz soqqyǧa jyqqan. Jelı qoldanuşysynyŋ jazuynşa, olar bırge käuaphana aşqan. Kündık tabysty bölısu kezınde kelıspeuşılık tuyndaǧan.
«Ony sonşalyqty qatty ūrǧan, 3,5 litr qan joǧaltqan. Basynan da doǧal zatpen ūrǧan. Keiın jedel järdem şaqyrudyŋ ornyna üiıne aparyp, juyndyryp, kiımın auystyrǧannan keiın ǧana därıger şaqyrǧan», – delıngen jazbada.
Marqūmnyŋ tuystarynyŋ aituynşa, jıgıt jedel järdem kölıgınde jansaqtau bölımıne bara jatqan jolda köz jūmǧan. Därıgerler onyŋ kökbauyry ısten şyqqanyn habarlaǧan. Sondai-aq jaqyndary oqiǧa ornynda taǧy bır adamnyŋ boluy mümkın ekenın aitady.
Almaty oblystyq polisiia departamentı atalǧan derek boiynşa qylmystyq ıs tırkelıp, sotqa deiıngı tergeu bastalǧanyn habarlady.
«Jinalǧan materialdarǧa säikes, er adamnyŋ jaǧdaiy naşarlap, jedel järdem arqyly auruhanaǧa jetkızılgen. Keiın ol köz jūmdy. Polisiia qyzmetkerlerı maŋaidaǧy mekemelerdıŋ beinebaqylau jazbalaryn zerttep, kuägerler men oqiǧa ornyna kelgen medisina qyzmetkerlerınen jauap aldy», – dep mälımdedı vedomstvonyŋ baspasöz qyzmetı.
Polisiia marqūmnyŋ tuystary aitqan jaittardyŋ barlyǧy tekserılıp jatqanyn atap öttı. Tergeu barysy oblystyq departament basşylyǧynyŋ baqylauynda ekenı habarlandy.
