Qaraǧandyda qalanyŋ eŋ ırı jasyl aimaqtarynyŋ bırıne ainalatyn jaŋa ekosaiabaq salyna bastady. Ol Maiqūdyq pen Oŋtüstık-Şyǧys şaǧynaudandarynyŋ arasynda ornalasady. Ekosaiaaqqa 200 gektar jer bölıngen. Jobanyŋ bastamasy retınde aǧaş egu jūmystary qolǧa alyndy.
«Taza Qazaqstan» respublikalyq baǧdarlamasy aiasynda myŋ tüp aǧaş – emen, alma, qaraǧai jäne qaraǧaş köşetterı egılıp,
bolaşaq saiabaqtyŋ ırgetasyna simvolikalyq tas qoiyldy.
Auqymdy şaraǧa jastar, erıktıler, qoǧam belsendılerı men deputattar qatysty.
Qaraǧandy oblysynyŋ äkımı Ermaǧanbet Bölekpaev mūndai jobalardyŋ qala tūrǧyndarynyŋ ömır sapasyna tıkelei äser etetının atap öttı.
— Bız Qaraǧandyda jaŋa ekosaiabaq aşyp jatyrmyz. Būl – öte jaqsy bastama. Aumaǧy keŋ, maŋaida jaŋa şaǧynaudan men sporttyq klaster salynyp jatyr. Memleket basşysy Qasym-Jomart Toqaev tabiǧatqa ūqypty qarau är tūrǧynnyŋ kündelıktı mädenietınıŋ bır bölıgıne ainaluy tiıs ekenın bırneşe ret aitqan bolatyn. Bügınde būl qaǧidalar el boiynşa myŋdaǧan adamdy bırıktırgen «Taza Qazaqstan» baǧdarlamasy aiasynda jüzege asyrylyp keledı. Ekosaiaaq – endı jai ǧana demalys orny emes, ekologiia men adamdardyŋ ömır sapasyna äser etetın zamanaui qalalyq ortanyŋ bır bölıgı. Ärbır jaŋa aǧaş – taza aua men Qaraǧandynyŋ bolaşaǧyna qosylǧan üles. Jaily ärı taza qala är adamnyŋ öz aulasyna, köşesıne jäne qorşaǧan ortaǧa degen ıltipatynan bastalady, — dep atap öttı Ermaǧanbet Bölekpaev. — Tūrǧyndar men biznestı kögaldandyru jūmystaryna belsendı qatysuǧa şaqyramyn.
Qaraǧandy tūrǧyny Magomed Zaurov bala kezınen bolaşaq ekosaiabaq aumaǧyndaǧy kölderdıŋ maŋynda uaqyt ötkızgenın aitty.
— Men üşın Qaraǧandy – Qazaqstandaǧy eŋ üzdık qala. Bız osy jerde şomylyp, balyq aulaitynbyz. Endı būl jer būrynǧydan da körkeiıp, egılgen barlyq aǧaştar tamyr jaiyp, qala tūrǧyndary men qonaqtaryn quantsa eken deimın, — dedı ol.
Erıktı Janarai Sanaqbaidyŋ aituynşa, jastar ekologiialyq bastamalardy belsendı qoldaidy.
— Men jetı jyldan berı volonterlıkpen ainalysyp kelemın. Bız ekologiialyq aksiialar men aǧaş egu şaralaryna ünemı qatysamyz. Osyndai saiabaqtyŋ aşyluy – qalanyŋ bolaşaǧy men jastar üşın tamaşa ideia, — deidı ol.
Ekosaiabaq qūrylysy Qaraǧandynyŋ jaŋa audanyn damytu jobasynyŋ bır bölıgıne ainalady. Qazırdıŋ özınde Oŋtüstık-Şyǧys pen Maiqūdyqty bailanystyratyn ainalma jol salynyp jatyr.
Aldaǧy uaqytta mūnda seruendeuge arnalǧan alleialar, sport alaŋdary, velojoldar jäne barlyq jastaǧy tūrǧyndarǧa arnalǧan demalys aimaqtary paida bolady.
Saiabaq aumaǧynda kommersiialyq nysandar salu josparlanbaǧan. Ony seruendeuge, otbasylyq demalysqa jäne taza auada sportpen ainalysuǧa arnalǧan oryn retınde saqtau közdelıp otyr.
Sonymen qatar būl aumaqta kölemı 72 gektar bolatyn ırı sporttyq klaster qūru josparlanǧan.
Joba aiasynda ämbebap arena, Mūz saraiy, jeŋıl atletika manejı, 12 myŋ körermenge arnalǧan UEFA sanatyndaǧy stadion salynyp, Futbol akademiiasynyŋ qūrylysy bastalyp ketken.
