Bügın – Halyq ärtısı, teatr jäne kino akterı Ydyrys Noǧaibaevtyŋ tuǧanyna 95 jyl. Ol qazaq sahna önerınıŋ damuyna zor üles qosqan körnektı öner qairatkerı, tereŋ psihologiialyq obrazdarymen erekşelengen akter.
Ydyrys Noǧaibaev 1931 jyly 15 mamyrda Almaty oblysy Talǧar qalasynda düniege kelgen. Jastaiynan ūlttyq önerge jaqyn ösıp, 15 jasynda Almaty körkemöner uchilişesıne oquǧa tüsedı. Keiın 1950-jyldardyŋ basynda Mäskeudegı A.V.Lunacharskii atyndaǧy teatr önerı institutynda bılım alady. Onyŋ ūstazy – professor İ.M.Raevskii.
1954 jyldan bastap M.Äuezov atyndaǧy Qazaq memlekettık drama teatrynyŋ qūramynda qyzmet etıp, käsıbi akterlık jolyn bastaidy. Sahnadaǧy alǧaşqy rölderınıŋ bırı – Nazym Hikmettıŋ «Farhat-Şyryn» spektaklındegı Farhat beinesı.
Ydyrys Noǧaibaev sahnada kürdelı mınezdı, tereŋ psihologiialyq keiıpkerlerdı somdaumen tanyldy. Onyŋ repertuarynda qazaq jäne älem klassikasynyŋ ırı tuyndylary bar. Atap aitqanda:
- «Aiman-Şolpan» – Kötıbar
- «Eŋlık–Kebek» – Esen
- «Qaraqypşaq Qobylandy» – Qobylandy
- «Abai» – Abai
- «Qan men ter» – Qalen
- «Qozy Körpeş – Baian sūlu» – Qarabai
- Şekspir şyǧarmalary – Otello, Petruchchio
Akter M. Gorkii şyǧarmalaryndaǧy keiıpkerlerdı somdau arqyly da erekşe tanyldy. Onyŋ şyǧarmaşylyǧynda äleumettık-psihologiialyq tereŋdık, adam janynyŋ kürdelı iırımderın aşu basty oryn aldy.
1955 jyldan bastap Ydyrys Noǧaibaev kino salasynda da jemıstı eŋbek ettı. Ol ūlttyq kinonyŋ damuyna eleulı üles qosty. Tanymal filmderdegı rölderı:
- «Mazasyz köktem» – Ydyrys
- «Botaköz» – Amantai
- «Ömır jolynda» – Ospan
- «Asuda» – Daniiar
- «Alǧaşqy mūǧalım» – Narmaǧanbet
- «Qyz Jıbek» – Syrlybai
1970 jyldan bastap Almaty memlekettık öner institutynda (qazırgı Qazaq ūlttyq öner universitetı) jäne respublikalyq estrada studiiasynda ūstazdyq ettı. Bırneşe buyn jas akterlerdı tärbieledı.
Ol halyqaralyq deŋgeide de öner körsetıp, Mäskeu, Qazan, Ufa, Nükıs jäne İrannyŋ Şiraz qalasynda gastroldık saparlarda bolǧan.
Ydyrys Noǧaibaev – KSRO Memlekettık syilyǧynyŋ laureaty (1974), «Qūrmet Belgısı» ordenınıŋ iegerı, qazaq teatr önerınıŋ altyn qoryna engen tūlǧa.
