Bügın qazaqstandyq ädebiet ökılderımen ötken kezdesude «Kıtap oqityn ūlt» jobasynyŋ pilottyq kezeŋınıŋ aralyq qorytyndylary tanystyrylyp, qoǧamdyq qordyŋ Qamqorşylyq keŋesı qūryldy. Būl jiyn jai ǧana kezdesu emes, şyǧarmaşyl ziialy qauym men qoǧamnyŋ kıtap oqityn, syni oilaityn ärı ruhani bai ūlt qalyptastyru ideiasy töŋıregınde toptasuyna negız boldy.
2026 jylǧy 30 nauryzda Astanada «Kıtap oqityn ūlt» jobasy aiasynda maŋyzdy kezdesu öttı. Oǧan Qazaqstannyŋ körnektı jazuşylary men aqyndary – Tölen Äbdık, Roza Mūqanova, Qoişyǧara Salǧaraūly, Aldan Smaiyl, Quanyş Jienbai, Şärbanu Beisenova, Oŋaigül Tūrjan, Janat Äskerbekqyzy, Mädi Aiymbetov, Sauytbek Abdrahmanov, Janarbek Äşımjanov, Bauyrjan Babajanūly qatysty.
2025 jyldyŋ qyrküiegınde eldıŋ bırneşe öŋırınde pilottyq negızde ıske qosylǧan «Kıtap oqityn ūlt» jobasy Qazaqstan Respublikasynyŋ Prezidentı Qasym-Jomart Toqaevtyŋ kıtap oqityn ūlt qalyptastyru bastamasy aiasynda jüzege asyryluda. Jobanyŋ basty maqsaty – Qazaqstanda tūraqty kıtap oqu mädenietın qalyptastyru.
Pilottyq kezeŋnıŋ alty aiy ışınde Qaraǧandy, Qostanai oblystary men Şymkent qalasynda jobaǧa 189 myŋ adam qatysty. Qatysuşylar orta eseppen 10–15 kıtap oqyǧan. Sondai-aq jobaǧa qatysuşylar kün saiyn 30–50 bet oqu daǧdysynyŋ qalyptasqanyn, onyŋ otbasylyq keşterdıŋ, mekteptegı talqylaulardyŋ jäne tıptı jūmys üzılısterınıŋ bır bölıgıne ainalǧanyn atap ötude.
Jobanyŋ alty baǧyty negızgı jas jäne äleumettık toptardy qamtidy:
• Oquşylar «Kıtap oqityn mektep» baǧyty arqyly qatysady. Mūnda 6–10 synyp oquşylary oqyǧan kıtaptary negızınde viktorinalarda jarysady.
• Kolledj jäne JOO studentterı «Kıtap oqityn kolledj» jäne «Kıtap oqityn universitet» baǧyttary arqyly tartylady. Būl baǧyttarda pıkırtalastar ūiymdastyrylady.
• Pedagogter «Kıtap oqityn pedagog» baǧyty aiasynda komandalyq intellektualdyq kvizderge qatysady.
• Otbasylar «Kıtap oqityn äulet» baǧyty arqyly qatysyp, türlı kvizderde baq synaidy.
• Memlekettık qyzmetşıler «Kıtap oqityn memlekettık qyzmetşı» baǧyty boiynşa kvizderde jarysady.
Ärbır sanat üşın 15 şyǧarmadan tūratyn arnaiy tızımder jasaqtalǧan. Būl tızımderde qazaq klassikasy men älemdık bestsellerler üilesımdı türde qamtylǧan.
Jobany odan ärı damytu maqsatynda «Kıtap oqityn ūlt – Chitaiuşaia nasiia» qoǧamdyq qory janynan Qamqorşylyq keŋesı qūryldy. Keŋestıŋ negızgı mındetterı – jobanyŋ strategiialyq baǧyttaryn aiqyndau, qatysuşylarǧa ūsynylatyn ädebietter tızımın bekıtu, sondai-aq negızgı bastamalar men ıs-şaralardy äzırleu. Keŋes qūramyna ädebiet pen mädeniettı damytuǧa eleulı üles qosqan belgılı jazuşylar men aqyndar endı.
Ūqsas jaŋalyqtar
