بۇگىن قازاقستاندىق ادەبيەت وكىلدەرىمەن وتكەن كەزدەسۋدە «كىتاپ وقيتىن ۇلت» جوباسىنىڭ پيلوتتىق كەزەڭىنىڭ ارالىق قورىتىندىلارى تانىستىرىلىپ، قوعامدىق قوردىڭ قامقورشىلىق كەڭەسى قۇرىلدى. بۇل جيىن جاي عانا كەزدەسۋ ەمەس، شىعارماشىل زيالى قاۋىم مەن قوعامنىڭ كىتاپ وقيتىن، سىني ويلايتىن ءارى رۋحاني باي ۇلت قالىپتاستىرۋ يدەياسى توڭىرەگىندە توپتاسۋىنا نەگىز بولدى.
2026 جىلعى 30 ناۋرىزدا استانادا «كىتاپ وقيتىن ۇلت» جوباسى اياسىندا ماڭىزدى كەزدەسۋ ءوتتى. وعان قازاقستاننىڭ كورنەكتى جازۋشىلارى مەن اقىندارى – تولەن ابدىك، روزا مۇقانوۆا، قويشىعارا سالعاراۇلى، الدان سمايىل، قۋانىش جيەنباي، ءشاربانۋ بەيسەنوۆا، وڭايگۇل تۇرجان، جانات اسكەربەكقىزى، ءمادي ايىمبەتوۆ، ساۋىتبەك ابدراحمانوۆ، جاناربەك ءاشىمجانوۆ، باۋىرجان باباجانۇلى قاتىستى.
2025 جىلدىڭ قىركۇيەگىندە ەلدىڭ بىرنەشە وڭىرىندە پيلوتتىق نەگىزدە ىسكە قوسىلعان «كىتاپ وقيتىن ۇلت» جوباسى قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ كىتاپ وقيتىن ۇلت قالىپتاستىرۋ باستاماسى اياسىندا جۇزەگە اسىرىلۋدا. جوبانىڭ باستى ماقساتى – قازاقستاندا تۇراقتى كىتاپ وقۋ مادەنيەتىن قالىپتاستىرۋ.
پيلوتتىق كەزەڭنىڭ التى ايى ىشىندە قاراعاندى، قوستاناي وبلىستارى مەن شىمكەنت قالاسىندا جوباعا 189 مىڭ ادام قاتىستى. قاتىسۋشىلار ورتا ەسەپپەن 10–15 كىتاپ وقىعان. سونداي-اق جوباعا قاتىسۋشىلار كۇن سايىن 30–50 بەت وقۋ داعدىسىنىڭ قالىپتاسقانىن، ونىڭ وتباسىلىق كەشتەردىڭ، مەكتەپتەگى تالقىلاۋلاردىڭ جانە ءتىپتى جۇمىس ۇزىلىستەرىنىڭ ءبىر بولىگىنە اينالعانىن اتاپ وتۋدە.
جوبانىڭ التى باعىتى نەگىزگى جاس جانە الەۋمەتتىك توپتاردى قامتيدى:
• وقۋشىلار «كىتاپ وقيتىن مەكتەپ» باعىتى ارقىلى قاتىسادى. مۇندا 6–10 سىنىپ وقۋشىلارى وقىعان كىتاپتارى نەگىزىندە ۆيكتورينالاردا جارىسادى.
• كوللەدج جانە جوو ستۋدەنتتەرى «كىتاپ وقيتىن كوللەدج» جانە «كىتاپ وقيتىن ۋنيۆەرسيتەت» باعىتتارى ارقىلى تارتىلادى. بۇل باعىتتاردا پىكىرتالاستار ۇيىمداستىرىلادى.
• پەداگوگتەر «كىتاپ وقيتىن پەداگوگ» باعىتى اياسىندا كوماندالىق ينتەللەكتۋالدىق كۆيزدەرگە قاتىسادى.
• وتباسىلار «كىتاپ وقيتىن اۋلەت» باعىتى ارقىلى قاتىسىپ، ءتۇرلى كۆيزدەردە باق سىنايدى.
• مەملەكەتتىك قىزمەتشىلەر «كىتاپ وقيتىن مەملەكەتتىك قىزمەتشى» باعىتى بويىنشا كۆيزدەردە جارىسادى.
ءاربىر سانات ءۇشىن 15 شىعارمادان تۇراتىن ارنايى تىزىمدەر جاساقتالعان. بۇل تىزىمدەردە قازاق كلاسسيكاسى مەن الەمدىك بەستسەللەرلەر ۇيلەسىمدى تۇردە قامتىلعان.
جوبانى ودان ءارى دامىتۋ ماقساتىندا «كىتاپ وقيتىن ۇلت – چيتايۋششايا ناتسيا» قوعامدىق قورى جانىنان قامقورشىلىق كەڭەسى قۇرىلدى. كەڭەستىڭ نەگىزگى مىندەتتەرى – جوبانىڭ ستراتەگيالىق باعىتتارىن ايقىنداۋ، قاتىسۋشىلارعا ۇسىنىلاتىن ادەبيەتتەر ءتىزىمىن بەكىتۋ، سونداي-اق نەگىزگى باستامالار مەن ءىس-شارالاردى ازىرلەۋ. كەڭەس قۇرامىنا ادەبيەت پەن مادەنيەتتى دامىتۋعا ەلەۋلى ۇلەس قوسقان بەلگىلى جازۋشىلار مەن اقىندار ەندى.
ۇقساس جاڭالىقتار
