Qyzylorda qalasy mańyndaǵy Qyzyljarma kentinde kópbalaly otbasy turyp jatqan úıden órt shyǵyp, bir bala kóz jumdy. Tórt bala anasymen birge aýrýhanaǵa jetkizildi, dep habarlaıdy “Adyrna” ulttyq portaly Astana telearnasyna silteme jasap.
Órt beısenbige qaraǵan túni shyqqan, ol ýaqytta balalar uıyqtap jatqan. Jeńil materıaldardan salynǵan ýaqytsha turýǵa arnalǵan úı birden janyp ketti.
Órt sóndirýshiler qońyraý túskennen keıin oqıǵa ornyna birneshe mınýt ishinde jetip, jarty saǵat ishinde órtti sóndirdi. Alaıda ol ýaqytta 2020 jyly týǵan bala tunshyǵyp qalǵan. 28 jastaǵy áıel men tórt bala aman qaldy. Áıeldiń qoly qatty kúıip qalǵan, 8, 7, 5 jáne 2 jastaǵy tórt balaǵa ekinshi dárejeli kúıik dıagnozy qoıylǵan. Olardyń ómirine qaýip tónip turǵan joq.
"Astana" teleranasynyń habarlaýynsha, balalardyń ákesi issaparda bolǵan. Otbasynyń kórshileri órtti baıqaǵan kezde anasy balalaryn tereze arqyly shyǵaryp jatqan. Alaıda besinshi balasyna kómektese almaǵan. Sebebi alty aılyq sábı besikte jatqan.
Otbasy ýaqytsha turýǵa arnalǵan úıdi jaldap júrgen. Tanystarynyń aıtýynsha, bar tapqan-taıanǵanyn páteraqysyna beredi.
"Zań boıynsha biz olarǵa 6 aıǵa deıin úı jaldap berýge daıynbyz. Sonymen qatar úıdi qalpyna keltirý maqsatynda qala meenattarymen kelissózder júrgizdik. Olar da kómektesýge daıyn. Sondaı-aq qarjylyq, azyq-túlik sekildi sharalardy qarastyramyz", - dedi Qyzylorda qalasy ákiminiń orynbasary Ermurat Rahmatýllaev.
Qazaqstandyqtar bul jaǵdaıǵa beı-jaı qaramaı, órt kesirinen úı-jaı, múlkinen aıyrylǵan otbasyǵa kómek retinde qarjy jınap jatyr.
