Elımızdı ornyqty damytu, demokratiialyq qaǧidattardy nyǧaitu jäne saiasi jüienı keşendı jaŋartuda konstitusiialyq reformanyŋ tarihi ärı strategiialyq maŋyzy zor.
Bügın Senat Töraǧasy Mäulen Äşımbaev Jetısu oblysynyŋ tūrǧyndarymen kezdesu barysynda osyndai pıkır bıldırdı.
«Jaŋa Konstitusiia jobasyna bailanysty respublikalyq referendum – Prezidentımız Qasym-Jomart Kemelūly Toqaevtyŋ eldı auqymdy ärı jüielı jaŋǧyrtu baǧdaryn ıske asyru jolyndaǧy tarihi kezeŋ. Elımızdıŋ bolaşaǧyna qatysty maŋyzdy şeşımderdı azamattardyŋ taŋdauyna süiene otyryp qabyldau demokratiia qaǧidattaryna adaldyqtyŋ aiqyn körınısı ekenı anyq.
Konstitusiialyq reformanyŋ basym mındetı – Täuelsızdıktı nyǧaitu jäne azamattardyŋ äl-auqatyn arttyru. Osyǧan bailanysty jaŋa Konstitusiia jobasynda zaŋ üstemdıgı men qūqyqtyq tärtıptı küşeituge, azamattardyŋ qūqyqtary men müddelerın qorǧauǧa, sondai-aq, eldıŋ ornyqty damuyna basymdyq berılgen», – dedı Mäulen Äşımbaev.
Ol sondai-aq damudyŋ negızgı baǧdary – adam kapitalyn jetıldıru, memlekettılıktı, Täuelsızdık pen egemendıktı nyǧaitu, sondai-aq, ışkı saiasi tūraqtylyq pen qoǧamdyq kelısımdı saqtau Konstitusiia jobasynda naqty belgılengenın tılge tiek ettı.
«Jaŋa Konstitusiianyŋ basty erekşelıgı onyŋ adamǧa baǧdarlanuy ekenın airyqşa atap ötken jön. Azamattardyŋ qūqyqtary men müddelerıne nazar audaru memlekettık saiasattyŋ özegıne ainalyp otyr. Ata Zaŋ jobasynda adam qūqyqtary deklarativtı ereje emes, maŋyzdy qaǧidattar jäne naqty mındetter retınde qarastyrylǧan. Būl – sapaly bılımge qoljetımdılık, tiımdı densaulyq saqtau jüiesı, äleumettık qorǧau jäne är azamattyŋ öz äleuetın ıske asyruyna mümkındık beru sekıldı baǧyttardy qamtidy. Osy qaǧidattardy jüzege asyru barlyq instituttardyŋ – Qūryltaidyŋ, Ükımettıŋ, äkımdıkter men mäslihattardyŋ, sondai-aq, azamattyq qoǧam ökılderınıŋ bırlesken küş-jıgerın talap etedı. Mūndai qadamdar – el igılıgı jolyndaǧy ortaq jauapkerşılıktıŋ jarqyn körınısı ekenı anyq», – dedı Palata Töraǧasy.
Mäulen Äşımbaev sondai-aq öŋırdegı käsıporyn jūmysşylarymen jäne şarualarmen kezdestı. «Hilnichenko jäne K» şarua qojalyǧyndaǧy talqylaudyŋ kün tärtıbınde – inkliuziia, etnosaralyq kelısım jäne azyq-tülık qauıpsızdıgı jönındegı özektı mäseleler qamtyldy. Parlament deputattary «Asar» sporttyq-oŋaltu keşenınıŋ infraqūrylymymen jäne «ASMA Industrial ltd» önerkäsıp akkumuliatorlaryn şyǧaratyn zauyttyŋ qyzmetımen tanysty.
