Almatydaǵy jaldamaly páterlerdiń birinde týǵan ákesi eki ulyn aıaýsyzdyqpen óltirgen. Ájesiniń aıtýynsha, qatigez áke balalaryn aýrýhanaǵa aparamyn dep alyp ketken, dep habarlaıdy "Adyrna" ulttyq portaly Massaget.kz-ke silteme jasap.
Belgili bolǵandaı, balalardyń úlkeni 5-synypta, al kishisi bıyl 2-synypta oqıdy eken.
88 jastaǵy zeınetker Valentına Osına kúıeý balasy shóberelerin "jaqsy kórmegenin", tipti ózine qarsy qoıǵanyn jetkizdi.
"Ol eshqashan meniń shóberelerimdi jaqsy kórmegen. Tipti týǵan kúnimen quttyqtamaıtyn. Onyń 7 baýyry, 2 ápkesi bar. Solardyń tek bireýi habarlasty, qalǵandary baýyrlarynyń áreketi durys dep sanaıdy. Úılerdiń bárine kamera qoıyp, meni baqylap júrdi. "Seniń ornyń qoqysta", - dep meni balaǵattap, únemi úıden qýatyn. Balalarǵa: "Ájelerińdi ıterińder, qoqys laqtyryńdar", - dep nashar tárbıe berdi. 10 márte ýchaskelik polıeıdi shaqyrdym. Olar maǵan basqa jerge kóshýimdi usyndy. Alaıda men shóberelerimdi qımadym. Balalardy 4 jeltoqsan kúni aýrýhanaǵa alyp ketken bolatyn. Aqyry osylaı aıaqtaldy", - deıdi marqum balalardyń ájesi Valentına Osına.
Kishi balasy menıngıtpen aýyrǵandyqtan, estý qabileti nasharlaǵan. Oqý maýsymy bastalǵannan beri úıden bilim alypty. Ákesi balany ózi aparyp, emdetip júrgen. Bul joly da balalardy "Aýrýhanaǵa aparamyn" dep alyp ketken.
Kýágerlerdiń aıtýynsha, ol balalardy óltirgennen keıin beınejazbaǵa túsirip, baýyrlarynyń birine jibergen. Balalaryn óltirgen ákeniń bul áreketi esirtkige elitkendikten nemese ay sýdyń býymen jasady degen boljamdar da aıtyldy. Alaıda bul tek boljam ǵana. Er adamnyń balalardy qandaı qarýmen, qalaı óltirgeni de belgisiz. Tek marqumdardyń betinen tilingen pyshaq izderi baıqalǵan.
Keshe, 8 qańtarda balalardyń denesi jer qoınyna tapsyryldy.
"Adyrna" últtyq portaly
