Prezident Qasym-Jomart Toqaev Qarjylyq barlau qyzmetkerlerınen naǧyz jauapkerşılık pen jasampazdyq tūrǧysynan qaraityn otanşyldyqty talap etetının mälımdedı, dep habarlaidy «Adyrna» tılşısı.
«Mūndai qasietke ie adamdar jemqorlyqtan, aşközdıkten, sauatsyzdyqtan ada boluǧa tiıs. Sauatsyz, äsırese aşköz, körseqyzar, jemqorlyqqa beiım adam eşqaşan patriot bola almaidy. Ärine, ol özın patriot sanauy, alaulatyp, jalaulatyp söileuı mümkın. Alaida ol patriot emes jäne ony bärı bıledı. Sondyqtan būl arada otanşyldyqty dūrys tüsıne bılgenımız abzal»,-dedı ol.
Qasym-Jomart Toqaev būl mäselenı Qyzylordada ötken Ūlttyq qūryltai otyrysynda da kötergenın eske saldy. Onyŋ aituynşa, qazırgı uaqytta jaŋa Konstitusiianyŋ mazmūny qaralyp jatyr jäne osy özgerıster aiasynda patriotizm ūǧymyn naqtylau közdelıp otyr.
«Naǧyz patriot barlyq jerde, ol Qarjylyq monitoring agenttıgı nemese memlekettık menşıktegı käsıporyn bolsyn, jeke käsıpkerlık nysany, universitet, mektep bolsyn, adal eŋbek etuge tiıs. Ärkım öz jūmysyn jaqsy atqarsa, ony patriot dep sanaimyz. Jalpy tekseru şaralary memlekettıŋ äleumettık mındettemelerıne qatysty jūmysqa kesırın tigızbeuı kerek. Biudjet qarajatyn uaqytyly igeruge de kedergı keltırmeuı qajet. Aqparattyq, kommersiialyq qauıpsızdıktı jäne jeke derekterdı qorǧau mäselesın nazarda ūstaǧan jön»,-dep tolyqtyrdy memleket basşysy.
