پرەزيدەنت قاسىم-جومارت توقاەۆ قارجىلىق بارلاۋ قىزمەتكەرلەرىنەن ناعىز جاۋاپكەرشىلىك پەن جاسامپازدىق تۇرعىسىنان قارايتىن وتانشىلدىقتى تالاپ ەتەتىنىن مالىمدەدى، دەپ حابارلايدى «ادىرنا» ءتىلشىسى.
«مۇنداي قاسيەتكە يە ادامدار جەمقورلىقتان، اشكوزدىكتەن، ساۋاتسىزدىقتان ادا بولۋعا ءتيىس. ساۋاتسىز، اسىرەسە اشكوز، كورسەقىزار، جەمقورلىققا بەيىم ادام ەشقاشان پاتريوت بولا المايدى. ارينە، ول ءوزىن پاتريوت ساناۋى، الاۋلاتىپ، جالاۋلاتىپ سويلەۋى مۇمكىن. الايدا ول پاتريوت ەمەس جانە ونى ءبارى بىلەدى. سوندىقتان بۇل ارادا وتانشىلدىقتى دۇرىس تۇسىنە بىلگەنىمىز ابزال»،-دەدى ول.
قاسىم-جومارت توقاەۆ بۇل ماسەلەنى قىزىلوردادا وتكەن ۇلتتىق قۇرىلتاي وتىرىسىندا دا كوتەرگەنىن ەسكە سالدى. ونىڭ ايتۋىنشا، قازىرگى ۋاقىتتا جاڭا كونستيتۋتسيانىڭ مازمۇنى قارالىپ جاتىر جانە وسى وزگەرىستەر اياسىندا پاتريوتيزم ۇعىمىن ناقتىلاۋ كوزدەلىپ وتىر.
«ناعىز پاتريوت بارلىق جەردە، ول قارجىلىق مونيتورينگ اگەنتتىگى نەمەسە مەملەكەتتىك مەنشىكتەگى كاسىپورىن بولسىن، جەكە كاسىپكەرلىك نىسانى، ۋنيۆەرسيتەت، مەكتەپ بولسىن، ادال ەڭبەك ەتۋگە ءتيىس. اركىم ءوز جۇمىسىن جاقسى اتقارسا، ونى پاتريوت دەپ سانايمىز. جالپى تەكسەرۋ شارالارى مەملەكەتتىڭ الەۋمەتتىك مىندەتتەمەلەرىنە قاتىستى جۇمىسقا كەسىرىن تيگىزبەۋى كەرەك. بيۋدجەت قاراجاتىن ۋاقىتىلى يگەرۋگە دە كەدەرگى كەلتىرمەۋى قاجەت. اقپاراتتىق، كوممەرتسيالىق قاۋىپسىزدىكتى جانە جەكە دەرەكتەردى قورعاۋ ماسەلەسىن نازاردا ۇستاعان ءجون»،-دەپ تولىقتىردى مەملەكەت باسشىسى.
