Jetısu oblysynda «Auylda densaulyq saqtaudy jaŋǧyrtu» ūlttyq jobasynyŋ aiasynda jalpy sany 59 nysan salyndy. Atap aitqanda, 2023-2025 jyldar aralyǧynda 15 därıgerlık ambulatoriia, 39 feldşerlık-akuşerlık jäne 5 medisinalyq punkttıŋ qūrylysy aiaqtaldy.
Oblystyq densaulyq saqtau basqarmasynyŋ mälımetınşe, medisinalyq kömektıŋ qadamdyq qoljetımdılıgın qamtamasyz etu jäne şalǧaidaǧy auyldardy medisinalyq qyzmetpen qamtu maqsatynda qolǧa alynǧan Ūlttyq joba aiasynda Kerbūlaq audanynda - 17, Panfilov - 11, Alaköl - 9, Qaratal - 6, Eskeldı - 5, Aqsu men Köksu audandarynda – 4-ten, Sarqan audanynda 3 densaulyq saqtau nysany boi köterdı.
Solardyŋ bırı – ötken jyldyŋ soŋynda qūrylysy aiaqtalyp, osy jyldyŋ qaŋtar aiynda aşylǧan Panfilov audany Dihanqairat auylyndaǧy jaŋa feldşerlık-akuşerlık punkt. Atap aitqanda, būl auylda 1 200 tūrǧyny bar. Būǧan deiıngı medisinalyq mekeme 1980 jyly salynǧan eskı ǧimarat bolǧandyqtan, qyzmet körsetude qolaisyz bolatyn. Jaŋadan paidalanuǧa berılgen ǧimarat qajettı medisinalyq qūraldarmen jabdyqtalyp, zamanaui injenerlık jüielermen tolyq qamtylǧan. Mūnda qabyldau bölmesı, aldyn-ala qabyldau jäne kündızgı qabyldau bölmelerı, emdeu bölmelerı, vaksinasiia kabinetıjäne basqa da qajettı bölmeler qarastyrylǧan.
Jaŋa FAP-ta 3 medisina mamany jūmys ısteidı. Solardyŋ bırı otyz jyldan astam täjıribesı bar feldşer Gulinūr Qambarova jaŋa ǧimaratty köpten kütkenın jetkızdı.
- Bız būrynǧy ǧimaratty kömırmen jylytyp, tar bölmelerde qolaisyz jaǧdaida tūrǧyndarǧa medisinalyq kömek körsetıp keldık. Zamanaui medisinalyq jabdyqtar joq bolǧandyqtan, tūrǧyndardy köbıne audan ortalyǧyna jıberetınbız. Qazır jaŋa feldşerlık-akuşerlık punktte alǧaşqy kömek körsetuge, emdık şaralar jürgızuge qajettı jabdyqtardyŋ barlyǧy bar. Mekemenıŋ elektrmen jylytylatyny, keŋ, jaryq ärı qolaily bolǧany quantady, - deidı ol.
Būl quanyşty jaŋalyqqa auyl tūrǧyndary da riza.
- Auylymyzda jaŋa feldşerlık-akuşerlık punkt aşylyp otyr. Būryn da osyndai mekeme bolǧan, bıraq ol tar, eskı ǧimarat edı. Qazırgı FAP keŋ, qajettı emdık bölmelerı jetkılıktı, zamanaui jabdyqtary bar. Auyl tūrǧyndarynyŋ densaulyǧyn saqtauǧa osyndai qolaily jaǧdai jasalǧanyna quanyştymyz, - deidı auyl tūrǧyny Baian Köbenbaeva.
Atap ötsek, Ūlttyq jobaǧa Panfilov audandyq köpsalaly auruhana da engızılgen. Qazır atalǧan nysannyŋ qoldanystaǧy ǧimaratyn qaita jaŋartu men jaŋa korpusyn salu boiynşa qūrylys jūmystary jürgızılude.
