Şanhaida 2025 jyly 27-29 mamyr aralyǧynda ötıp jatqan ITB China 2025 halyqaralyq turistık körmesıne Almaty qalasy qatysty. Is-şara QHR eŋ ırı kırmelık turizm platformalarynyŋ bırı, jyl saiyn 800-den astam qatysuşy men 10 000-nan astam sala mamanynyŋ basyn qosady.
Almatynyŋ körme stendınde qalanyŋ tabiǧi sūlulyǧy men mädeni nysandary tanystyryldy. Körmenıŋ bırınşı künı qonaqtardy ūlttyq kiım kigen qazaq batyrlary qarsy alyp, halyq aspaptar ansamblı «Adai» küiı men «Közımnıŋ qarasy» änı jäne t.b. şyǧarma oryndady. Keluşılerge ūlttyq taǧamdar ūsynylyp, dästürlı qazaq kiımderın kiıp köruge mümkındık berıldı.
Körmede qalany 7 otandyq turoperator tanystyrdy. Qazaqstandyq jäne şeteldık turoperatorlar arasynda 100-den astam B2B kezdesu ötkızılıp, 30-dan astam turistı qabyldau turaly kelısımşarttar men Almatyny onlain keŋıstıkte ılgerıletuge baǧyttalǧan sifrlyq platformaly memorandumdarǧa qol qoiyldy. Būl kelısımder ıskerlık bailanysty nyǧaituǧa jäne Almatyǧa turister legın arttyruǧa baǧyttalǧan halyqaralyq serıktestıktı damytuǧa septıgın tigızedı.
«Bız Şanhaimen ärıptestık qarym-qatynasty joǧary baǧalaimyz. Būl Almaty sekıldı öz öŋırınde ekonomikalyq jäne mädeni bailanysty qalyptastyratyn maŋyzdy qala. 2025 jyly bızdıŋ qalalar bauyrlas qala bolu turaly kelısımge qol qoimaq. Būl ūzaq jylǧa jalǧasqan yntymaqtastyqtyŋ zaŋdy jalǧasy. Qarym-qatynasty damytudyŋ kelesı qadamy – Almaty men Şanhai arasynda tıkelei äue reisınıŋ aşyluy bolmaq. 2025 jyly 4 şıldeden bastap China Eastern Airlines kompaniiasy tūraqty reisterdı aşady. Jalpy, Qazaqstandaǧy Qytai turizm jyly bolyp jariialanǧan 2025 jyl bırlesken jobalardy jüzege asyru, turistık baǧyttardy ılgerıletu jäne öŋıraralyq bailanysty nyǧaitu üşın qosymşa mümkındık beredı», – dedı Almaty qalasy Turizm basqarmasy basşysynyŋ orynbasary Ǧaziz Tölebek.
Körme qonaqtary da Almatynyŋ turistık äleuetı turaly oiyn aitty.
«Almaty barǧym keletın qalanyŋ bırı. Şahar turaly köptegen jaqsy pıkır estıdım, būl qala ıskerlık, demalys jäne ekoturizmdı ūştastyruǧa taptyrmas oryn siiaqty körınedı», – dedı körme qonaǧy Djon Vei.
Mūnyŋ qajettı baǧyt ekenın Qytai turisterınıŋ Almatyǧa degen qyzyǧuşylyǧynyŋ tūraqty ösuı de däleldeidı. 2024 jyly Almatyǧa 99 myŋnan astam QHR azamattary kelıp, būl körsetkış aldyŋǧy jylmen salystyrǧanda 50%-ǧa artqan.
