AQŞ vise-prezidentı Djei Di Vens Respublikalyq partiianyŋ aralyq sailaudaǧy ırı jeŋılısıne qatysty pıkır bıldırıp, būǧan İranmen soǧystyŋ sebep bolǧanyn mälımdedı. Būl turaly BBC jazdy, dep habarlaidy «Adyrna» tılşısı.
«Bızdıŋ jeŋılısımızge sebep bolǧan – soǧys. Nelıkten jeŋılgenımızdı bärı bıledı. Aldaǧy uaqytta qandai baǧyt ūstanu kerektıgı turaly kez kelgen aşyq äŋgıme osy mäseleden bastaluy tiıs», – dep jazdy ol.
Donald Tramp ta sailaudan keiıngı tünı respublikaşyldardyŋ jeŋılısıne özı aqpan aiynda bastaǧan İranmen soǧystyŋ belgılı bır deŋgeide äser etkenın moiyndady.
Saualnama nätijelerı körsetkendei, būl soǧys AQŞ qoǧamy arasynda şynymen de qoldau tappai otyr. Äsırese äskeri qaqtyǧys saldarynan benzin, dizel otyny jäne kündelıktı tūtynatyn basqa da tauarlardyŋ baǧasy qymbattaǧan.
Sailau künı dauys beru uchaskelerınen şyqqan azamattar arasynda jürgızılgen saualnamaǧa qatysqandardyŋ 63 paiyzy äskeri operasiialardy bastau turaly şeşımdı qate dep sanaǧan. Al respondentterdıŋ törtten üş bölıgı, iaǧni 74 paiyzy, soǧys kımge dauys beru turaly şeşım qabyldauda maŋyzdy faktor bolǧanyn aitqan.
Djei Di Vens öz jazbasynda respublikaşyldardyŋ jeŋılısıne äser etken özge de sebepterdı atady. Onyŋ pıkırınşe, olardyŋ qatarynda AQŞ äkımşılıgınıŋ İzrailmen qarym-qatynasy da bar. Sondai-aq ol amerikalyqtardyŋ Tramptyŋ köşı-qon saiasatyna köŋılı tolmaitynyna da toqtaldy. Vens būl saiasatty özgertu mäselesın talqylauǧa daiyn ekenın aityp, zaŋsyz migranttardy jūmysqa alatyn kompaniialarǧa basymdyq berıp, solarǧa qatysty şaralardy küşeitudı ūsyndy.
Būǧan deiın amerikalyq būqaralyq aqparat qūraldarynda Venstıŋ İranmen soǧysty asa qoldai qoimaityny turaly aqparattar jariialanǧan edı. Sonymen qatar ol İranmen jürgızılgen kelıssözderge belsendı qatysqan. Alaida vise-prezident pen onyŋ ökılderı köpşılık aldyndaǧy mälımdemelerınde prezidenttıŋ ūstanymyna qaişy kelmeuge tyrysatynyn ünemı atap ötken.
Djei Di Vens 2028 jylǧy prezident sailauynda Respublikalyq partiia atynan tüsuı mümkın ümıtkerlerdıŋ bırı sanalady. «The New York Times» pen Siena College bırlesıp 12–19 qazan aralyǧynda jürgızgen saualnamada Respublikalyq partiianyŋ praimerizıne qatysuǧa niettı azamattardan kımge dauys beretını sūralǧan. Respondentterdıŋ basym bölıgı, iaǧni 36 paiyzy, Djei Di Venstı qoldaitynyn aitqan. Ekınşı orynda qazırgı AQŞ memlekettık hatşysy Marko Rubio tūr.
