Qazaqstan Respublikasynyŋ Mädeniet jäne aqparat ministrlıgı 2026 jyly ötetın 61-şı Venesiia biennalesınde QR Ūlttyq pavilonyna arnalǧan kuratorlyq ūsynystar konkursynyŋ qorytyndysyn jariialady.
Dauys beru nätijesı boiynşa «QOŊYR: arhiv ünı» tūjyrymdamasy jeŋımpaz atandy. Jobanyŋ kuratory – Syrlybek Bekbotaev.
61-şı Venesiia biennalesı 2026 jylǧy 9 mamyr men 22 qaraşa aralyǧynda ötedı. Osy merzımde Qazaqstannyŋ Ūlttyq pavilony Biennale baǧdarlamasy aiasynda ūsynylatyn bolady.
Konkurs ūlttyq pavilondy daiyndauda aşyq ärı tūraqty täjıribenı qalyptastyru maqsatynda ūiymdastyryldy. Ötınımder bır ai boiy qabyldandy. Irıkteu ekı kezeŋnen tūrdy. Bırınşı kezeŋde ūsynylǧan materialdarǧa saraptamalyq baǧalau jasaldy, al ekınşısınde finalistermen onlain-sūhbat jürgızıldı.
Baǧalau üşın jobanyŋ tūjyrymdamalyq tūtastyǧyna (25 ballǧa deiın), menedjmentı men ıske asyryluy (20 ballǧa deiın), täjıribe, etika jäne ornyǧuyna (20 ballǧa deiın) män berıldı. Är sūraq boiynşa 1-den 5 balǧa deiın qoiylyp, qorytyndy nätije ūpai arqyly anyqtaldy.
Bırınşı kezeŋnıŋ finalyna üş joba öttı. Ekınşı kezeŋde qazylar alqasy ärbır finalispen onlain-sūhbat ötkızıp, talqylau qorytyndysy boiynşa aqtyq dauys beru paraqtaryn toltyrdy.
Irıkteu komissiiasy pänaralyq saraptama qaǧidaty boiynşa qūrylyp, onyŋ qūramynda zamanaui öner, önertanu, täuelsız teatr men muzyka salalaryndaǧy jergılıktı jäne halyqaralyq mamandar, sondai-aq akademiialyq qauymdastyq pen memlekettık muzeiler ökılderı boldy.
Eske sala keteiık, konkurs 2025 jyldyŋ qaraşa aiynda jariialanǧan bolatyn. Onyŋ maqsaty – 2026 jyly Biennalede «In Minor Keys» taqyrybyn aşatyn, tūjyrymdamalyq jäne körkemdık tūrǧydan bırtūtas jobany ırıkteu jäne Qazaqstannyŋ zamanaui önerın halyqaralyq deŋgeide tanystyru.
Konkursqa kuratorlar men kuratorlyq toptarǧa Qazaqstan Respublikasynyŋ azamattary, kuratorlyq qyzmet täjıribesı bar mamandar şaqyryldy. Qazaqstanda tūratyn jäne jūmys ısteitın ümıtkerlerge basymdyq berıldı.
Syrlybek Bekbotaev – suretşı ärı kurator, Astana qalasynda tūryp, jūmys ısteidı. Onyŋ şyǧarmaşylyǧy men mol täjıribesı köşpendıler ömırı men mädeni mūra taqyrybyna arnalǧan. 2025 jyly ol L. N. Gumilev atyndaǧy Euraziia ūlttyq universitetın «Mädeniettanu» mamandyǧy boiynşa tämamdaǧan.
