Ukraina Qazaqstannyŋ Kaspii qūbyr konsorsiumyna jasalǧan şabuylǧa bailanysty joldaǧan narazylyǧyna jauap berdı, dep habarlaidy «Adyrna» tılşısı.
Eldıŋ syrtqy ıster ministrlıgı öz äreketterınıŋ eşqaisysy «Qazaqstanǧa nemese basqa da üşınşı taraptarǧa qarsy baǧyttalmaǧanyn» atap öttı.
«Ukraina Kaspii qūbyr konsorsiumynyŋ infraqūrylymyna qatysty Qazaqstannyŋ ündeuın nazarǧa aldy. Ukraina tarapynan jasalǧan eşbır äreket Qazaqstan Respublikasyna nemese özge üşınşı tūlǧalarǧa qarsy emes ekenın erekşe atap ötemız. Bızdıŋ barlyq küş-jıgerımız tolyq masştabty Resei agressiiasyna qarsy tūruǧa, özımızdıŋ özın-özı qorǧau qūqyǧyn jüzege asyruǧa baǧyttalǧan. Taǧy da atap ötkımız keledı, Qarateŋız aimaǧyndaǧy jäne onyŋ şegınen tys öŋırlerdegı tūraqsyzdyqqa sebep bolyp otyrǧan jalǧyz faktor – Resei agressiiasy», – delıngen habarlamada.
Sondai-aq Kiev Qazaqstan tarapynan Resei Federasiiasynyŋ Ukrainadaǧy beibıt halyqqa, tūrǧyn üilerge, azamattyq infraqūrylymǧa jäne energetikalyq jüiege, sonyŋ ışınde ukrain AES-terınıŋ qosalqy stansiialaryna jasaǧan soqqylaryn aiyptaǧan mälımdemelerdıŋ bolmaǧanyna nazar audardy.
«Bız barlyq tarapty memleketımız ben halqymyzǧa qarsy qylmystyq soǧysty mümkındıgınşe tezırek toqtatu üşın agressordy mäjbürleuge küş saluǧa şaqyramyz. Soŋynda bız Qazaqstan halqyna degen qūrmetımızdı jetkızıp, ekı el arasyndaǧy dostyq jäne pragmatikalyq qarym-qatynasty damytuǧa niettı ekenımızdı rastaimyz», – dep qosty Ukraina SIM.
Eske salsaq, 29 qaraşada Ukrainanyŋ ekipajsyz katerlerı Novorossiiskıdegı Kaspii qūbyr konsorsiumynyŋ (KTK) teŋız terminalynyŋ ailaq qūrylǧysyn ısten şyǧarǧan bolatyn. Sonyŋ saldarynan mūnai tieu toqtatylǧan edı. Osy qūbyr arqyly mūnaiynyŋ basym bölıgın halyqaralyq naryqqa şyǧaratyn Qazaqstan bır kün būryn "mūnai tasymaldaudyŋ balama baǧyttaryn" qarastyrady degen. Al 30 qaraşada Qazaqstan syrtqy ıster ministrlıgınıŋ narazylyq notasy jariialandy.
