Tanymal qaqpaşy Şerhan Qalmyrza Europa chempionatynyŋ ırıkteu kezeŋındegı Ukrainamen matchta alaŋnan şyǧaryldy, dep habarlaidy "Adyrna" ūlttyq portaly.
Bırınşı taimnyŋ 29-minutynda qaqpaşy Şerhan Qalmyrza ukrain oiynşysyna aiyp alaŋynan tys fol jasaǧany üşın tıkelei qyzyl belgı aldy.
Osydan keiın ukraindyq komanda sandyq artyqşylyqty paidalanyp, oiynnyŋ 44-şı minutynda gol soqty. Ekınşı taimda Ukraina qūramasy taǧy ekı märte Qazaqstan qaqpasyna gol saldy. Nätijesınde match 0:3 esebımen aiaqtaldy.
Būl oiynnan keiın Ukrain komandasy topta 6 ūpaimen bırınşı orynǧa köterıldı, al Qazaqstan qūramasy 3 ūpaimen ekınşı orynǧa jaiǧasty. Irıkteu kezeŋınıŋ soŋǧy matchynda Qazaqstan qūramasy Soltüstık İrlandiiamen kezdesedı, al Ukraina Rumyniiaǧa qarsy oinaidy. Matchtar 31 nauryzda ötedı.
