Sport salasynda teris dinı aǵymdardyń ıdeologııasyna qyzyǵýshylyq tanytatyn keıbir azamattar kezdesip qalady. Kásibı sporttaǵy ekstremıstik aǵymdardyń beleń alýyn toqtatý múmkin be? Sondaı-aq azamattaryń jetistikke jetýine onyń dinı ustanymy keri áser ete me?
Dintanýshy Jandáýlet Súleımenovtyń aıtýynsha, sportshynyń dinı ustanymy onyń jetistikke jetýine kedergi keltirmeıdi. Áıtse de ol sportta joǵary jetistikke jetken azamattyń jastarǵa yqpaly joǵary bolatynyn eskertti.
«Sportshy namazhan bola ma, joq álde baı nemese kedeı bola ma, ol jaǵy asa mańyzdy emes. Eń mańyzdysy fızıkalyq turǵydan myqty bolyp, óz salasy boıynsha jetistikke jetý emes pe? Azamattyń dinı ustanymyna baılanysty sportshynyń jetistigine baǵa berýge bolmaıdy. Áıtse de ásire dinshildik pen sportty ushtastyrý arqyly ózge azamattarǵa dinı motıvtegi áńgimelerdi nasıhattaý óte qaýipti. Másele din ustanýshy azamattardyń jeke basynda emes. Sebebi olardyń arasynda sportta jetistikke jetip jatqan azamattar óte kóp. Sport adamnyń dinı ustanymyna baılanysty emes. Ókinishke qaraı elimizdegi keıbir sportshylardyń ishinde destrýktıvti ustanymdaǵy azamattar bar. Olar elimizdiń atynan álem chempıonaty men Olımpıada oıyndary sekildi ár túrli jarystarǵa barady», – dedi ol.
Dintanýshy jýyrda Atyraý oblysynda bolǵan oqıǵany eske aldy. Esterińizde bolsa, Atyraý oblysy ákimdigi ánuran oryndalǵan kezde ornynan turmaǵan sportshyǵa aıyppul salǵan bolatyn.«Qandaı da bir adam sportqa qansha jetistikke jetse de, ol eń aldymen Qazaq eliniń rámizderine qurmet kórsetý kerek emes pe? Al sportshy ánuranǵa qurmet kórsetpegen soń Atyraý oblysy ákimdigi arnaıy hattama toltyryp, shara qoldandy. Myń jerden myqty sportshy bolyp, qandaı jetistikke jetpeńiz, biraq ánuranǵa qurmetińiz bolmasa, kúni erteń memleketińdi satyp ketýiń ábden múmkin. Mine osy jaǵynan sportshynyń teris dinı ustanymda bolǵany qaýipti. Al endi dinshil adamnyń sportta jetistikke jetpeıdi degen sóz qate. Ókinishke qaraı, sport salasynda ásire dinshildikke burylǵan azamattarǵa nazar aýdarý kemshin bolyp jatyr. Sondyqtan da sporttaǵy dinshil azamattarǵa qandaı da bir shara qoldaný jumystary júrmeı jatyr», – deıdi ol.
Tanymal sportshy bolǵannan keıin ony jastardyń úlgi tutatyny jasyryn emes. Dintanýshy munyń da qaýipti qubylys ekenin eskertti.
«Ashyǵan aıtsaq sportta joǵary jetistikke jetken azamattyń myńdaǵan tabynýshysy bolady. Atyn atap, túsin tústemeı-aq qoıaıyn, keıbir olımpıada chempıondary qazir teris dinı ustanymda júr. Ondaı azamattardy myńdaǵan jastar kýmır tutady. Sol sebepti qoǵamǵa tanymal adamnyń teris jolǵa túsýi qoǵam úshin óte qaýipti. Mysaly men túzeý mekemesine barǵanda terrorızm, ekstremızm baby boıynsha sottalǵan sportshylar da kezdesip qalyp jatady. Tipti olardyń ishinde sportta jaqsy nátıjege jetken azamattar bar», – dedi dintanýshy.
«Adyrna» ulttyq portaly
