Respublika künı qarsaŋynda Astanada Şäken Aimanov atyndaǧy «Qazaqfilm» kinostudiiasy men Ūlttyq kinony qoldau memlekettık ortalyǧynyŋ jäne QR Mädeniet jäne aqparat ministrlıgınıŋ qoldauymen tüsırılgen «Kapitan Baitasov» filmı tanystyryldy.
Filmnıŋ tūsaukeserıne QR Mädeniet jäne aqparat ministrı Aida Balaeva, QR Parlamentı deputattary, qūqyq qorǧau organdarynyŋ ökılderı, mädeniet qairatkerlerı, akterler men tuyndynyŋ şyǧarmaşylyq toby, sondai-aq batyrdyŋ otbasy – jūbaiy Güljamal Tajieva men ūly Armanjan qatysty.
Kinonyŋ körsetılımı aldynda QR Parlamentı Senatynyŋ deputaty Nūrtöre Jüsıp QR Parlamentı Senatynyŋ Töraǧasy Mäulen Äşımbaevtyŋ qūttyqtau hatyn oqyp berdı.
«Memleket basşysy Qasym-Jomart Kemelūly Toqaev biyl qūqyq qorǧau organdarynyŋ keŋeitılgen alqa mäjılısınde erjürek saqşylardyŋ erlıgı halyqqa janqiiarlyqpen qyzmet etudıŋ ülgısı retınde jūrtymyzdyŋ jadynda saqtaluǧa tiıs ekenın aitty. Osy tūrǧydan kelgende, qalyŋ körermenge jol tartqan jaŋa filmdı būl baǧyttaǧy ırgelı ısterdıŋ jarqyn körınısı dep qabyldaimyz. Ǧaziz Baitasov – qysqa ǧūmyrynda qylmysqa qarsy kürestı qasterlı paryz sanap, Otanǧa adal qyzmet etudıŋ ozyq ülgısın körsettı»,– delıngen qūttyqtau hatta.
Filmnıŋ siujetı 2011 jyldyŋ 12 qaraşasynda Taraz qalasynda bolǧan şynaiy oqiǧaǧa negızdelgen. Sol künı polisiia kapitany Ǧaziz Baitasov öz ömırın qiyp, terroristı toqtatyp, beibıt tūrǧyndardyŋ ömırın saqtap qalǧan edı. Poliseidıŋ būl erlıgı batyrlyqtyŋ, patriotizm men adaldyqtyŋ simvolyna ainaldy.
Aida Balaeva öz sözınde mūndai jobalardy qoldau – ūlttyq kinony damytu ǧana emes, sonymen bırge jas ūrpaqtyŋ boiyna erlık, ädıldık, adaldyq siiaqty qūndylyqtardy darytudyŋ maŋyzdy qūraly ekenın atap öttı.
«Kapitan Baitasovtyŋ janqiiarlyq qyzmetı – naǧyz patriotizmnıŋ ülgısı. Film tek erlık turaly ǧana emes, ar-namys pen boryş aldyndaǧy adaldyq jaiynda da tereŋ oiǧa jeteleidı. Memleketımızdıŋ tynyştyǧy men qauıpsızdıgı – eldegı är azamattyŋ ortaq jauapkerşılıgı.
Prezidentımız atap ötken «Zaŋ men tärtıp», «Adal azamat» qaǧidattary osy filmde körınıs tapqan erlık pen elge adaldyq syndy qūndylyqtarmen ündesıp jatyr. Öitkenı memlekettıŋ quaty – zaŋ men tärtıpte, al ūlttyŋ berıktıgı – azamattarymyzdyŋ adaldyǧy men jauapkerşılıgınde ekenı sözsız», – dedı ministr.
Aida Balaeva sondai-aq filmdı tüsıruge atsalysqan barlyq şyǧarmaşylyq ūjymǧa alǧysyn bıldırdı.
Kartinanyŋ rejisserı – Däuren Qamşybaev. Basty rölderdı belgılı qazaqstandyq akterler – Azamat Satybaldy, Erkebūlan Daiyrov, Asan Mäjit, Darhan Süleimenov, Qobylandy Bolat jäne Samal Esliamova somdaǧan.
«Kapitan Baitasov» filmı 23 qazannan bastap Qazaqstannyŋ barlyq kinoteatrlarynda körsetıledı.
