Respublika künı qarsaŋynda Almatyda Jedel medisinalyq järdem qyzmetıne 50 jaŋa arnaiy avtokölıktı tapsyru räsımı öttı. Kölıkterdıŋ kıltın qala äkımı Darhan Satybaldy tabystady.
Avtopark qūramyna S klasty 12 reanimobil jäne V klasty 38 avtokölık kırdı. Barlyq kölıkter zamanaui medisinalyq qūrylǧylarmen tolyq jabdyqtalǧan jäne halyqaralyq talapqa tolyq sai keledı. Joba memleket qoldauymen jüzege asty.
Qala basşysy avtoparktıŋ jaŋaruy Almatydaǧy densaulyq saqtau jüiesın modernizasiialau aiasyndaǧy maŋyzdy qadam ekenın atap ötıp, būl şara şūǧyl medisinalyq kömektıŋ sapasy men jedeldıgın arttyruǧa mümkındık beretının aitty.
«Almaty – elımızdegı eŋ ırı ärı qarqyndy damyp kele jatqan megapolis. Mūnda tūrǧyndarǧa uaqytyly ärı sapaly medisinalyq kömek körsetu erekşe maŋyzdy. Zamanaui jabdyqtalǧan jaŋa avtokölıkter därıgerler men jürgızuşılerge senımdı kömekşı bolady. Sızderdıŋ eŋbekterıŋızdıŋ arqasynda kün saiyn myŋdaǧan adamnyŋ ömırı qūtqarylady. Bız sızderdıŋ käsıbilıkterıŋızdı jäne halyqqa adal qyzmetterıŋızdı joǧary baǧalaimyz», – dedı Darhan Satybaldy.
Bügınde Almaty qalasynyŋ Jedel medisinalyq järdem qyzmetı 14 beket pen 188 şūǧyl qyzmet brigadasynan tūrady. Dispetcherlık ortalyq täulıgıne şamamen 3 myŋ qoŋyrau qabyldaidy, al brigadalar künıne 2600-ge juyq şaqyrtuǧa şyǧady.
